Փաստ ինֆո

Հայաստանի Հանրապետության ֆինանսների նախարար Վարդան Արամյանը համաձայն չէ ԲՀԿ խմբակցության պատգամավոր Միքայել Մելքումյանի հետ, թե ՀՀ 2017թ. պետական բյուջեի նախագիծը «ծրագրերի հետաձգման» բյուջե է:

Ազգային ժողովում 2017թ. պետբյուջեի նախագծի քննարկման ժամանակ Վարդան Արամյանը, պատասխանելով պատգամավոր Միքայել Մելքումյանի հարցին, ընդգծեց, որ բյուջեն ոչ թե «ծրագրերի հետաձգման», այլ կայունացման բյուջե է:

«Մենք չենք կարող միանգամից 4-5 ուղղություն թիրախավորել: Մենք պետք է հասկանանք, թե որն է մեզ համար գերակա: Իսկ ես մի քանի անգամ ասել եմ, որ մեզ համար գերական ապագա տնտեսական աճի համար հիմքեր ստեղծելն է»,- «Արմենպրես»-ի հաղորդմամբ՝ նշեց Արամյանը:

Նրա խոսքով՝ ապագա տնտեսական աճի համար գերագույն պայմանը մակրոտնտեսական կայունությունն է:

«Ես չեմ տեսել որևէ երկիր, որն ունի անկայուն մակրոտնտեսական ﬕջավայր, և դա տնտեսական աճի համար հիմքեր ստեղծի: Դրա համար մենք թիրախավորել ենք մակրոտնտեսական կայունությունը»,- ասաց նախարարը:

Անդրադառնալով պատգամավորի հարցին՝ արդյո՞ք 2017թ. համար նախատեսված տնտեսական աճի 3.2 ցուցանիշը ցածր չէ՞, նախարարը պատասխանեց. «Մենք կարծում ենք, որ 2017թ. համար դա ադեկվատ ցուցանիշ է, միջնաժամկետի համար ցածր է: Միջնաժամկետի առումով մենք կարծում ենք, որ մեր ամբիցիաները պետք է լինեն ավելին, քան 3.2 տոկոսը: Բայց 2017թ. համար մենք ուսումնասիրել ենք համապարփակ բոլոր գործոնները ինչպես են ազդում մեր տնտեսության վրա և մենք ինչ գործիքներ ունենք հակազդելու: Ակնհայտ է՝ եթե ամբողջ աշխարհում իրավիճակ է, երբ չես կարողանում թռիչքային աճ ապահովել, ոչ խելամիտ կլինի, եթե 3.2 տոկոսի փոխարեն 7 տոկոս աճ դնես: Դա հղի կարող է լինել տնտեսական վտանգներով: Դու պետք է իրատեսական թիվ դնես, որի վրա պետք է խարսխվի հարկաբյուջետային քաղաքականությունը»,- եզրափակեց Արամյանը:

Աղբյուր` Փաստինֆո