Փաստ ինֆո

Կաշառք ստանալու կասկածանքով ձերբակալված Շենգավիթ վարչական շրջանի ընդհանուր իրավասության դատարանի դատավոր Իշխան Բարսեղյանին շաբաթ օրը՝ ուշ երեկոյան, մեղադրանք է առաջադրվել՝ ՀՀ քրեական օրենսգրքի 311-րդ հոդվածի 4-րդ մասի 3-րդ կետով՝ որպես խափանման միջոց ընտրելով կալանավորումը: 

Այդ մասին «Փաստինֆո»-ն տեղեկացավ Իշխան Բարսեղյանին պաշտպան Վարդուհի Էլբակյանից:

Պաշտպանը նաև տեղեկացրեց, որ Իշխան Բարսեղյանը ցուցմունք չի տվել, հրաժարվել է մեղադրանքի վերաբերյալ որևէ դիրքորոշում հայտնել:

Տեղեկացանք նաև, որ շաբաթ օրը կատարվել է առերեսում քննչական գործողություն, սակայն այդ մասին պաշտպանը հրաժարվեց որևէ տեղեկություն հայտնել, նշելով, որ ստորագրություն է տվել նախաքննական գաղտնիք չհրապարակելու վերաբերյալ:

Միևնույն ժամանակ պաշտպանը նշեց, որ գործով նախաքննությունը ընդհանարապես գաղտնի չի ընթանում, քանի որ տարբեր լրատվամիջոցներում հրապարակվել են տեղեկություններ անգամ առերեսում կատարած անձի ցուցմունք:

Ավելի վաղ տեղեկացրել ենք, որ հոկտեմբերի 27-ին ձերբակալվել է դատավոր Իշխան Բարսեղյանը` Ազգային անվտանգության ծառայության կողմից, կաշառքի ստանալու կասկածանքով:

ԱԱԾ հաղորդագրության համաձայն` քաղաքացիական գործով կողմի օգտին որոշում կայացնելու համար դատավորը պահանջել և Երևանի հետիոտնային գետնանցումներից մեկում անձամբ ստացել է 1000 ԱՄՆ դոլար գումար, որի փոխանցումն իրականացվել է Ազգային անվտանգության ծառայության աշխատակիցների օպերատիվ վերահսկողության ներքո:

Նյութերն ուղարկվել են ՀՀ հատուկ քննչական ծառայություն, որտեղ քրեական գործ է հարուցվել ՀՀ քրեական օրենսգրքի 311-րդ հոդվածի 4-րդ մասի 3-րդ կետով: ՀՀ գլխավոր դատախազը միջնորդություն է ներկայացրել ՀՀ արդարադատության խորհրդին Երևան քաղաքի Շենգավիթ վարչական շրջանի ընդհանուր իրավասության դատարանի դատավորին որպես մեղադրյալ ներգրավելու և կալանավորելու համաձայնություն տալու առաջարկով ՀՀ Նախագահին դիմելու համար: Արդարադատության խորհուրդը բավարարել է գլխավոր դատախազի միջնորդությունը:

Աղբյուր` Փաստինֆո