Փաստ ինֆո

Մեր երկրի իրավական բազան, համակարգը, օրենսդրական դաշտն ամբողջությամբ բավարար է ցանկացած հանցագործության դեմ հաջող պայքար մղելու համար: «Փաստինֆո»-ի թղթակցի հետ զրույցում նման կարծիք հայտնեց փաստաբան Նորայր Նորիկյանը մեր խնդրանքով անդրադառնալով Կառավարության նոր ծրագրի՝ «Կոռուպցիայի դեմ պայքար» բաժնին:

Փաստաբանի կարծիքով՝ ըստ էության, Կառավարության ծրագրում տեղ գտած «Կոռուպցիայի դեմ պայքար» բաժնում ընդգրկված ծրագրային դրույթներով ծրագրի հեղինակներն ընդունում են, որ մեր երկրի պետական համակարգում առկա է հովանավորչություն, յուրացումներ, կաշառակերություն ու կոռուպցիայի այլ դրսևորումներ և խոստանում են գործադրել առավելագույն ջանքեր դրանց վերացման ուղղությամբ:

Միայն այն հանգամանքը, որ նոր կառավարությունն ընդունել է այս խնդիրների գոյությունը և այս մարտահրավերների առկայությունը, այն արդեն իսկ որոշակի դրական սպասումներ է ծնել հասարակության շրջանում:

Թե ինչ արդյունքներ կարձանագրվեն այս ուղղությամբ, ցույց կտա միայն ժամանակը:

Բայց, այնուամենայնիվ, անհրաժեշտ է արձանագրել, որ այլ բան է ընդգծել նշված երևույթների առկայությունը, բոլորովին այլ բան՝ պայքարել դրանց դեմ:
Այդպես չի լինում, որ կա կոռուպցիա, բայց չկա կոռուպցիոներ, կա հովանավորչություն, բայց չկա հովանավորող, կան յուրացումներ, սակայն չկան յուրացնողներ, կա կաշառակերություն, սակայն չկա կաշառակեր:

Նորայր Նորիկյանը գտնում է, որ այս կառավարության խնդիրն էլ հենց այն է, որ պետք է տարբերվի մնացած կառավարություններից հենց միայն նրանով, որ հռչակագրային ելույթներից զատ հասարակությանը ցույց տա, թե ովքե՞ր են այդ կոռուպցիոնիստները, կաշառակերները, յուրացնողներն ու հովանավորները և իր առջև խնդիր դնի՝ պատասխանատվության ենթարկելու այդ սուբյեկտներին անխտիր, անկախ նրանից, թե ովքեր են նրանք:

Քանի դեռ մեր հասարակությունը չի անցել այս ճանապարհով, խոսել որևէ դրական արդյունքի մասին, կլինի միամտություն և ինքնախաբեություն:

Բացի այդ, ծրագրով նոր կառավարությունը պատասխանատվություն է ստանձնել եռամսյա ժամկետում քրեականացնել ապօրինի հարստացումը և վեցամսյա ժամկետում ներդնել դրա կիրառումն ապահովող գործուն կառուցակարգեր:

Փաստաբանի կարծիքով՝ գործող իրավակարգավորումները նույնպես բավարար են վերը նշված հանցագործությունների դեմ պայքարելու համար: Այստեղ որևէ երկրորդ կարծիք լինել չի կարող, բայց, այդուհանդերձ, ապօրինի հարստացման քրեականացումը իսկապես նոր հնարավորություն կտա այդ խնդիրների լուծման համար:

Ըստ Նորիկյանի՝ այստեղ ոչ այնքան կարևոր է նոր գործիքակազմի ներդրումը, որքան դրանց ռացիոնալ կիրառումը:

Առհասարակ, անհրաժեշտ եմ համարում ընդգծել հետևյալ միտքը. Մեր երկրի իրավական բազան, համակարգը, օրենսդրական դաշտն ամբողջությամբ բավարար է ցանկացած հանցագործության դեմ հաջող պայքար մղելու համար:

Մեր խնդիրը իրավակիրառ դաշտում է: Մեր օրենքները կա՛մ չեն գործում, կամ գործում են ընտրովիաբար:

Այստեղ է, որ պետք է նոր շնչառություն ստանան քրեական օրենսդրության այնպիսի հիմնարար սկզբունքներ, ինչպիսիք են օրենքի առջև հավասարության, պատասխանատվության անխուսափելիության, անձնական պատասխանատվության սկզբունքները: Բայց նշված սկզբունքների կիրառման համար այն կիրառողները պետք է ունենան կամք, նրանց ձեռքերը պետք է լինեն մաքուր և չլինեն կապված:

Փաստաբանն արձանագրում է, որ ծրագրում բավականին ուշագրավ սիգնալ է տրված, որով կառավարությունը պարտավորվում է մեկ տարվա ընթացքում մշակել պետական ծառայության դեմ ուղղված հանցագործությունների համար ավելի խիստ պատասխանատվություն նախատեսող օրենսդրություն՝ հաշվի առնելով առավել բարձր վտանգավորության աստիճանը։

Սա նշանակում է, որ քրեական օրենսգրքի պետական ծառայության դեմ ուղղված հանցագործությունների համար նախատեսվող պատիժները, (պաշտոնեական լիազորությունները չարաշահելը, անցնելը, խոշտանգումը, ձեռնարկատիրական գործունեությանն ապօրինի մասնակցելը, կաշառք ստանալը, տալը, կաշառքի միջնորդությունը, պաշտոնատար անձ չհանդիսացող հանրային ծառայողի կողմից ապօրինի վարձատրություն ստանալը, իրական կամ ենթադրյալ ազդեցությունը շահադիտական նպատակով օգտագործելը, պաշտոնատար անձ չհանդիսացող հանրային ծառայողին ապօրինի վարձատրություն տալը, իրական կամ ենթադրյալ ազդեցությունն օգտագործելու համար ապօրինի վարձատրություն տալը, պաշտոնեական կեղծիքը, անփութությունը և այլն) խստացվելու են՝ դրանից բխող բոլոր հետևանքներով հանդերձ:

Սա իսկապես հանրությանն ուղղված կարևոր ուղերձ է, որով կառավարությունը փորձում է խաղի նոր կանոններ սահմանելու միջոցով նվազագույնի հասցնել կամ վերացնել պետական համակարգում առկա կոռուպցիոն մեխանիզմները:

«Արդարության դեմ չմեղանչելու համար նշեմ, որ գործող պատժաչափերն էլ պակաս խիստ չեն, սակայն ունենք այն, ինչ ունենք…»,- ասաց Նորայր Նորիկյանը:

Հիշեցնենք, որ հոկտեմբերի 21-ին ԱԺ-ն 85 կողմ, 7 դեմ, 6 ձեռնպահ ձայներով հաստատեց Կառավարության ծրագիրը:

Աղբյուր` Փաստինֆո