Փաստ ինֆո

Հայաստանում տնտեսական փոփոխություններ են հարկավոր:

Tert.am-ի հաղորդմամբ՝ այս մասին այսօր «Ժողովրդավարության ազգային պլատֆորմի» և Ֆ․ Նաումանի «Հանուն ազատության» հիմնադրամի կողմից կազմակերպված «Ազատ շուկայական տնտեսություն․ Հայաստանի ապագայի տեսլականը» թեմայով քննարկման ժամանակ հայտարարել է Հայաստանում Եվրամիության դեսպան Պյոտր Սվիտալսկին: 

Վերջինս նշել է, որ հանդիպել է ՀՀ նորանշանակ վարչապետ Կարեն Կարապետյանի հետ՝ քննարկելու համագործակցությունը Հայաստանի և Եվրամիության միջև, ապա ասաց. «Վարչապետի նպատակն ակնհայտ էր՝ բարելավել բիզնես միջավայրը, եվրոպական փորձ ներմուծել կառավարման ոլորտում: Սա համընկնում է եվրոպական քաղաքականությանը: Մենք համարում ենք, որ պետք է բարելավել բիզնես միջավայրը, աճի նոր միտումներ ներմուծել»:

Պյոտրի Սվիտալսկին նշել է, որ ոչ միայն տնտեսագետների, այլև՝ հանրության կողմից շատ է լսել, որ սա կարևոր փուլ է Հայաստանի համար, ավելին՝ ոլորտի փորձագետները հավաստիացրել են, որ տնտեսական աճի ավանդական գործոնները սպառել են իրենց, ուստի պետք է նոր մոտեցում: 

Այս առումով ՀՀ-ում Եվրամիության պատվիրակության ղեկավարը շեշտել է. «Հայաստանը պետք է փնտրի աճի նոր հնարավորություններ, շեշտը դնի բավարար աճի միտումների վրա: Մեր վերլուծությամբ երկու այսպիսի կարևոր աճի հնարավորություններ կան: Առաջինը՝ փոքր և միջին բիզնեսի զարգացումն է: Եվրամիությունում ՓՄՁ-ները զբաղվածության 60-ից 70 տոկոսն են կազմում, իսկ ՀՀ-ում՝ միայն 30 տոկոսը։ Այս առումով Հայաստանը հետ է մնում Մոլդովայից, Վրաստանից, նույնիսկ Բելառուսից: Ուստի պատահական չէ, որ ԵՄ-ն ծրագիր է սկսում ՓՄՁ-ների աջակցության համար, որ նրանց համար հեշտանա ֆինանսական աջակցություն որոնելը: Հայաստանում ՓՄՁ-ները ուշադրության կարիք ունեն:

Երկրորդ գործոնը, որը կարող է ազդել տնտեսական աճի վրա՝ արտաքին ներդրումներն են: ԵՄ-ն ամենախոշոր արտաքին ներդրողն է Հայաստանում, մենք հավատում ենք, որ այս միջավայրը պետք է բարելավել, վերացնել քաղաքական խոչընդոտները, որոնք ներդրողներին են խանգարում: Իհարկե, Լեռնային Ղարաբաղի հակամարտության կարգավորումն այն գործոններից է, որը դեր է խաղում ներդրումների համար, բայց կարծում եմ, որ Հայաստանում կա պոտենցիալ: Մեր առաջնային նպատակն է վերացնել խոչընդոտները, որոնք խանգարում են բիզնես գործունեությանը: Սա հենց այն է, ինչ վարչապետը նկատի ուներ, որովհետև եթե սա չկատարվի՝ արտաքին ներդրողները Հայաստան չեն գա»:

Սվիտալսկին նշել է, որ Հարկային նոր օրենսգիրքը ևս կարող է բարելավել միջավայրը՝ տնտեսական զարգացումների հեռանկարներով, եթե ստեղծվի թափանցիկ ու համակողմանի հարկային դաշտ: 

Ըստ դեսպանի, տնտեսության զարգացման, ազատ շուկայական հարաբերությունների ստեղծման համար, հարկավոր է հավասար դաշտ բիզնես միջավայրի համար, պետական գնումները պետք է կատարվեն թափանցիկ, ինչպես նաև դատական համակարգի անկախությունը պետք է ապահովվի, որովհետև արդար բիզնեսի ամենակարևոր երաշխիքը դատարանների անկողմնակալությունն է:

«Հայաստանը գտնվում է կարևոր փուլում և պետք է քննարկի տնտեսական քաղաքականության փոփոխություններ: Սա ոչ միայն ձեռնարկատերերի ակնկալիքն է, այլև՝ քաղաքացիների»,- նշել է նա:

Հոդվածն ամբողջությամբ կարող եք կարդալ սկզբնաղբյուր-կայքում:

Աղբյուր` Փաստինֆո