Փաստ ինֆո

Բրազիլիայում ընթացող ամառային Օլիմպիական խաղերում կայացան ֆուտբոլի մրցաշարի խբային փուլի 2-րդ տուրի հանդիպումները: 

Ավելի վաղ armsport.am-ը տեղեկացրել էր, որ A խմբում Բրազիլիան 2-րդ ոչ-ոքին խաղաց, իսկ Դանիան դարձավ առաջատար:

B խմբում Նիգերիան 1:0 հաշվով հաղթել է Շվեդիան և վաստակած 6 միավորով վաղաժամ զբաղեցրել առաջին տեղը: Միակ գոլը խփել է այս ամառ «Ռոմայի» լիիրավ ֆուտբոլիստը դարձած Ումար Սադիքը:

Խմբի մյուս մրցավեճում Կոլումբիան չի կարողացել պահպանել 2 գնդակի առավելությունը և Ճապոնիային թույլ է տվել ոչ-ոքի կորզել (2:2): Կոլումբիան վաստակած 2 միավորով երկրորդ տեղում է, իսկ Ճապոնիան ու Շվեդիան 1-ական միավոր ունեն:

C խմբում դրամատիկ ընթացք է ունեցել Գերմանիա – Հարավային Կորեա հանդիպումը: Գերմանացիները մոտ են եղել 2:3 հաշվով պարտվելուն, սակայն «Արսենալի» կիսապաշտպան Սերժ Գնաբրին մրցավարի կողմից ավելացրած 2-րդ րոպեին կարողացել է գրավել ասիացիների դարպասը (դուբլ): Գրանցվել է 3:3 հաշիվը:

Մյուս խաղում գործող չեմպիոն Մեքսիկայի հավաքականն առաջին կեսից հետո սենսացիոն պարտություն էր կրում Ֆիջիի ընտրանուց, սակայն երկրորդում 5 գնդակ ուղարկեց կղզիաբնակների դարպասը (5:1): Պոկերի հեղինակ դարձավ Էրիկ Գուտիերեսը:

2-րդ տուրից հետո Հարավային Կորեան ու Մեքսիկան ունեն 4-ական միավոր, Գերմանիան՝ 2, իսկ Ֆիջին դեռ միայն խոշոր հաշվով պարտություններ է կրում:

D խմբում կարևոր հաղթանակ տարավ Արգենտինան, որը մրցաշարը սկսել էր պարտությամբ: «Ալբիսելեստեն» 2:1 հաշվով պարտության մատնեց Ալժիրին: Հարավամերիկացիների կազմում գոլերի հեղինակ դարձան «Ատլետիկոն» ներկայացնող Անխել Կորեան և «Սան Պաուլոյի» հարձակվող Խոնաթան Կալյերին:

Պորտուգալիայի հավաքականը Հոնդուրասի հետ մրցավեճի առաջին րոպեին գոլ ընդունելուց հետո կարողացել է 2:1 հաշվով կամային հաղթանակ տոնել և 6 միավոր խմբի միանձնյա առաջատարը դառնալ: Արգենտինան ու Հոնդուրասն ունեն 3-ական, իսկ Ալժիրը՝ 0 միավոր:

Աղբյուր` Փաստինֆո