Փաստ ինֆո

Հուլիսի 21-ին Մովսես Խորենացի փողոցում «iravaban.net»  լրատվական կայքի լրագրող Գևորգ Թոսունյանի մասնագիտական գործունեությունը խոչընդոտելու և նրա նկատմամբ կիրառված բռնության դեպքով  լրագրողը 2 օր առաջ հրավիրվել է ՀՔԾ:

«Փաստինֆո»-ի թղթակցի հետ զրույցում Գևորգ Թոսունյանը հայտնեց, որ ՀՔԾ-ի խոշտանգումների վարչությունից իրեն հրավիրել են: Նա հայտնել է, որ արդեն ոստիկանության Էրեբունու բաժին հաղորդում է ներկայացրել՝  իր լրագրողական գործունեությանը խոչընդոտելու վերաբերյալ: Բացի այդ, նա նաև նշել է, որ իրեն է տրվել դատաբժշկի ուղեգիր, իրեն  զննել են: Լրագրողը հայտնել է, որ չի ցանկանում կրկնակի դատաբժշկական փորձաքննություն նշանակվի և  ՀՔԾ-ում այդքանով ավարտվել է  իր այցելությունը:

Հիշեցնենք, որ քաղաքացիական հագուստով անձինք լրագրողին գցել են գետնին ու հարվածներ հասցրել մարմնի տարբեր մասերին, բռնության հետևանքով քերծվածքներ ու կապտուկներ են առաջացել:

Սակայն դրանից զատ լրագրողը հոգեբանական տրավմայի ու սթրեսի է ենթարկվել՝ մտածելով, որ իրեն կսպանեն: Այդ ամենից հետո լրագրողից բռնությամբ վերցրել են տեսախցիկի հիշողության քարտը և սպառնացել՝ այլևս այստեղ քեզ չտեսնենք, թե չէ կսպանենք:

Մեր հետ զրույցում Գևորգ Թոսունյանը նաև նշեց, որ նախօրեին Սարի-թաղում ոստիկանների և ցուցարարների միջև բախումը լուսաբանելիս կրկին քաղաքացիական հագուստով անձինք հետապնդել են իրեն, վազել են հետևից, ասելով՝ «գնացեք ստեղից» այդ ընթացքում նաև հարվածներ են հասցրել՝ գլխի և ձեռքի շրջանում:

Նշենք նաև, որ երեկ այդ բախումները լուսաբանելիս մեծ թվով լրագրողներ են տուժել՝ վնասվածքներ են ստացել «Ա1+»-ի լրագրողն ու օպերատորը։ Ծեծի են ենթարկվել «Արմենիա» հեռուստաընկերության «ԺԱՄԸ»  լրատվականի թղթակից Աղվան Ասոյանը և օպերատոր Ալբերտ Գալստյանը: Պայթուցիկից տուժել է «Panorama.am»-ի օպերատոր Հովիկ Գրիգորյանը, ինչպես նաև «ՍիվիլՆեթի» լրագրողը և օպերատորը:  Իսկ «Առաջին լրատվական»-ի լրագրող Մարիամ Գրիգորյանին և օպերատոր Դավիթ Հարությունյանին ոստիկանները դաժան ծեծի են ենթարկել, ջարդել նրա տեսախցիկը, նա պայթուցիկի պայթյունից ստացել է ոտքի վնասվածք:

Վիրավորվել է նաև ռուսական «Life» հեռուստաընկերության օպերատորը, նրա մոտ արյունահոսություն է սկսվել:

Աղբյուր` Փաստինֆո