Փաստ ինֆո

ԱԱԾ տարածած հաղորդագրության համաձայն, 1981 թվականին ծնված, 1997 թվականից Իսպանիայի Թագավորությունում բնակվող եւ 2015 թվականի ապրիլից Երեւան քաղաքում ժամանակավոր բնակություն հաստատած  ՀՀ քաղաքացի Արթուր Վալերիկի Վարդանյանը, ՀՀ-ում ծանր եւ առանձնապես ծանր հանցագործություններ կատարելու նպատակով, 2015 թվականի ընթացքում ստեղծել եւ ղեկավարել է հանցավոր համագործակցություն, դրանում հավաքագրելով հիմնականում չաշխատող ՀՀ 19 քաղաքացիների, որոնցից 5-ը՝ Երեւան քաղաքի բնակիչներ են, 7-ը՝ Շիրակի մարզի, 3-ը՝ Արմավիրի մարզի, 2-ը՝ Լոռու մարզի, 1-ը՝ Կոտայքի մարզի, 1-ը՝ Գեղարքունիքի մարզի եւ 1-ը՝ Սյունիքի մարզի բնակիչներ: Նույն պաշտոնական հաղորդագրության համաձայն, նրանցից 4-ը կանայք են, 3-ը՝ արցախյան ազատամարտի մասնակիցներ։

Ի դեպ, հետաքրքրական է, որ նախաքննական մարմնի ներկայացմամբ, խմբի անդամները` ղեկավարի հետ միասին, նոյեմբերի 25-ին տարածված վերոհիշյալ հաղորդագրության համաձայն, 20-ն են եղել: Այսօր արդեն ԱԱԾ քննչական վարչության պետի տեղակալը հայտարարեց 21 թիվը: Ավելի ուշ 21 ձերբակալվածներ բերվեցին դատարան` կալանքի միջնորդության քննարկման համար:

Նոյեմբերի 25-ին հաջորդած 3 օրերի ընթացքում ԱԱԾ-ն այդպես էլ չհայտնեց կասկածյալների անունները` բավարարվելով միայն զինված խմբի ղեկավար ու կազմակերպիչ ներկայացված Արթուր Վարդանյանի մասին որոշ տեղեկություններ հայտնելով:  Խմբի անդամներից մի քանիսի ով լինելը բացահայտեցին արդեն լրատվամիջոցները: Բացահայտումները սկսեցին ԱԱԾ հատուկ գործողության տեսանյութի հրապարակումից  անմիջապես հետո: Այդ տեսանյութում երևում էր, որ Նորք-Մարաշի առանձնատանը իրավապահների գրոհի ժամանակ եղել էր 10 մարդ որոնց անուններն էլ առաջինը հայտնվեցին լրատվամիջոցներում:

Եվ, այսպես, այս պահին խմբի անդամներից, լրատվամիջոցների հաղորդած տեղեկություններով, հայտնի են հետևյալ անձանց անունները.

1. Խմբի ղեկավար Արթուր Վարդանյան- ծնվել է 1981 թվականի սեպտեմբերի 7-ին Երեւանում, ՀՀ քաղաքացի է, համացանցում տարվա ընթացքում հանդես է եկել որպես Քեսաբի ազատագրմանը մասնակցած «Հայոց Վահան» գնդի հրամանատար:

2.  Ավետիս Բարեյան- Արմավիրի մարզի Արևիկ համայնքի բնակիչ, արցախյան ազատամարտի մասնակից:

3. Վաղինակ Ստեփանյան-  Արմավիրի մարզի Արևիկ համայնքի բնակիչ, արցախյան ազատամարտի մասնակից: Երկու անգամ վիրավորվել է պատերազմում: Վերջին շրջանում տնից բացակայելիս տանն ասել է, թե Ղարաբաղ է գնում-գալիս՝ կռվելու:

4. Արթուր Եղիազարյան-  Արմավիրի մարզի Արևիկ համայնքի բնակիչ, 34 տարե-կան, բարձրագույն կրթու¬թյամբ: Հարազատների խոսքով` վերջերս է ծանոթացել Արթուր Վարդանյանի հետ, ով ներ¬կայացել է որպես Ռուսաստան ապրանք արտահանող, նրա մոտ ընդունվել է աշխատան¬քի որպես բանվոր:

5.  Խաչիկ Ավետիսյան- ազատամարտիկ, պահեստազորի փոխգնդապետ, ռազմադաշտային հրամանատարների խորհրդի անդամ: Հայտնի է ընդդիմադիր հայացքներով:

6. Արման Հայրապետյան- վերջին 10 ամիսների ընթացքում աշխատել է Հայաստանի հանրային հեռուստաընկերությունում` որպես արբանյակային հեռուստացանցի համակարգող:

7. Նելլի Մինասյան- 21 տարեկան, ամուսնացած է: Երեւանում բնակվում է վարձով, իսկ ամուսինը մնացել է Սյունիքի մարզի Հարթաշեն գյուղում, որտեղ զբաղվում է գյուղատնտեսությամբ: Նելլին սովորում էր Երեւանի Գլաձոր համալսարանի իրավաբանական ֆակուլտետի 4-րդ կուրսում` գերազանց առաջադիմությամբ: Ուսմանը զուգահեռ աշխատում է Երեւանի սուպերմարկետներից մեկում, օգնում սոցիալական ծանր պայմաններում ապրող ծնողներին: Մի քանի օր մասնակցել է Բաղրամյան պողոտայի` ընդդեմ էլեկտրաէներգիայի թանկացման ցույցերին:

8. Ասյա Մկրտչյան- բնակվում է Նուբարաշեն համայնքում, նույն կասկածանքով բերման ենթարկված Մարինե Կատանյանի քույրը:

9. Մարինե Կատանյան- բնակվում է Նուբարաշեն համայնքում, նույն կասկածանքով բերման ենթարկված Ասյա Մկրտչյանի քույրը:

10.  Տիգրան Բոյաջյան – ծնվել է 1996թ., սովորել Երևանի պետական համալսարանի «Ակտուարական և Ֆինանսական մաթեմատիկա» ֆակուլտետում: վերջերս հեռացվել է համալսարանի 2-րդ կուրսից: Ըստ ուսանողների՝ նա վերջին շրջանում դարձել էր Ժիրայր Սէֆիլյանի նախաձեռնած «Հիմնադիր խորհրդարանի» աջակիցներից, մասնակցւմ էր քաղաքական ակցիաներին, միջոցառումներին, և բացակայում դասերից:

11.  Գեւորգ Ջնդոյան- ծնվել է 1989թ-ի հոկտեմբերի 20-ին, Շիրակի մարզի Փանիկ գյուղում։ Մասնագիտությամբ լրագրող է, գրում է հեքիաթներ։ Ունի հրապարակված գիրք: Կաթոլիկ եկեղեցու հետևորդ է,  ուսանել է Իտալիայում, զբաղվել է հոգեւորականի գործունեությամբ: Բարեկամների խոսքերով` ակտիվ քաղաքացիական գործունեություն է ծավալել, մասնակցել բողոքի ակցիաների, այդ թվում` «Ոչ»-ի ճակատի հանրահավաքներին:

Գևորգ Ջնդոյանը ձերբակալվել է ոչ թե Երևանում, այլ Գյումրիում`  Ղորղանյան 83 հասցեում նոյեմբերի 25-ին կատարված խուզարկությունների ժամանակ: Այս շենքում է գործում նաեւ «Մարիամ» ռադիոկայանը: «Ռադիո Մարիամ Հայաստանը» գործում է Կաթողիկե եկեղեցու հովանու ներքո եւ ունի հոգեւոր մշակութային ուղղվածություն: Դրա ղեկավարը Հայ Կաթողիկե եկեղեցու հոգեւորական Հայր Անտոն ծայրագույն վարդապետ Թոթոնջյանը ևս այդ շենքում բնակարան ունի:

Ի դեպ, Երևանի Նորք-Մարաշ համայնքում խմբի վարձած տան լուսանկարներում երևում են երկու առյուծների պատկերով եռագույն փոքր դրոշներ։   Այս զինանշանը նույնությամբ համապատասխանում է մեկ տարի առաջ գրանցված «Հայոց Վահան» կազմակերպության նշանին, որը նաև կազմակերպության ֆեյսբուքյան էջի գլխավոր նկարն է:

Մամուլում առկա տեղեկություններով, «Մարիամ» ռադիոկայանը մի քանի անգամ հարցազրույց է վարել Արթուր Վարդանյանի հետ` որպես «Հայոց Վահան» գնդի հրամանատարի: