Փաստ ինֆո

 

«1072 ծառայողական մեքենաների վարորդներ ամեն առավոտ ժամը 8-ին, 9-ին նստում են ղեկին ու սկսում են մեր հաշվին ծառայություններ մատուցել իրենց ղեկավարներին ու նրանց ընտանիքների անդամներին»,- այսօր ԱԺ ամբիոնից հայտարարեց Էդմոն Մարուքյանը` հավելելով, որ այս ուռճացված ծախսը կրճատելու մասին չի խոսվում, փոխարենը քննարկվում է մեկ- երկու դատավորներ ավել ունենալու հարցը: 

 

ԱԺ-ն այսօր շարունակում է երեկ անավարտ մնացած «Հայաստանի Հանրապետության դատական օրենսգրքում փոփոխություններ կատարելու մասին» օրինագծի քննարկումը, որով Արդարադատության նախարարությունն ռաջարկում է ավելացնել Երեւանի Արաբկիր եւ Քանաքեռ-Զեյթուն, ինչպես նաեւ` Աջափնյակ եւ Դավթաշեն վարչական շրջանների ընդհանուր իրավասության դատարաններում դատավորների թվակազմը: Կառավարության նախաձեռնությամբ ԱԺ արտահերթ նիստի օրակարգում ներառված այս նախագծի անհրաժեշտությունը հիմնավորվում է նշված դատարաններում դատավորների գերծանրաբեռնվածությամբ: 

 

Պատգամավորները Արդարադատության նախարարությանն առաջարկեցին նախ ուսումնասիրել ու բացահայտել, թե ինչու է Երևանի երկու համայնքներում դատական գործերի թիվն ավելացել:

 

ԱԺ պատգամավոր Խոսրով Հարությունյանն անգամ կարծիք հայտնեց, որ դատական գործերի քննության ձգձգումների արդյունքում հարցերը իրենց լուծումն են ստանում «արտադատական հեղինակությունների միջամտությամբ»:

 

Գագիկ Ջհանգիրյանն էլ, ՀԱԿ խմբակցության տեսակետը ներկայացնելով, տարօրինակ համարեց այն հանգամանքը, որ Ոստիկանությունն ամեն տարի հայտարարում է, թե նախորդ տարվա համեմատ հանցավորությունը նվազել է, մինչդեռ դատարանները` հակառակը` հայտարարում են, որ քրեական գործերն աճել են:

 

«Ուրեմն այդ համակարգը չի գործում, արդարադատություն չի իրականացվում»,- ասաց Գագիկ Ջհանգիրյանը` հավելելով, որ դատարաններն աշխատում են «ով վճարում է, նա պատվիրում է» սկզբունքով, մարդիկ 4-5 ամիս ստիպված են լինում սպասել մինչև իրենց գործի լսվի, ուստի գույքային և այլ վեճերի դեպքում ավելի շատ դիմում են «քրեական տարբեր հեղինակությունների»:

 

Հարակից զեկուցող, ԱԺ պետաիրավական հանձնաժողովի անդամ Լևոն Մարտիրոսյանը կոչ արեց առաջին ընթերցմամբ կողմ քվեարկել օրինագծին և ակտիվ քննարկումներ ծվալել ու սպասել վիճակագրության վերաբերյալ նախարարության մեկնաբանություններին:

 

Արդարադատության փոխնախարար Արսեն Մկրտչյանն էլ նշեց, որ դատական գործերի թվի ավելացման կայուն միտումները շարունակական են: Բացի այդ փոխնախարարի խոսքով, դատարաններին արդեն պատվիրակված է համապատասխան վերլուծություններ անել, ընդ որումէ ոչ միայն թվաքանակի, այլև վեճի առաջացման պատճառների վերաբերյալ:

 

Իսկ բարձրացված հարցին, թե ինչու  են քրեական գործերն ավելացել հատկապես Արաբկիր և Քանաքեռ- Զեյթուն համայնքներում, Արսեն Մկրտչյանը պատասխանեց. «Միայն մինչդատական և հետաքննության մարմինների առկայությունը, որոնք աշխարհագրական դիրքով Արաբկիր և Քանաքեռ- Զեյթուն վարչական շրջաններում են, և ՔԴՕ կանոնակարգումների համաձայն միջնորդությունները պետք է ներկայացվեն այդ վարչական շրջանների դատարան, դրանց թիվը 7-ն է` Արաբկիր քննչականը, Քանաքեռ քննչականը, Քննչական 4-րդ կայազորայինը, Քննչական բաժինը, որը սպասարկում է Կոտայք, Արմավիր մարզերը և Երևան քաղաքն ամբողջությամբ, Քննչական կոմիտեի ՀԳԿ վարչությունը, Քննչական կոմիտեի ՀԿԳ գլխավոր վարչությունը և ՀՔԾ-ը: Երևան քաղաքի քննչական վարչությունը վերջին մեկ ամսում է տեղափոխվել: Ակնհայտ է, որ միայն այս մարմինների գոյությունը այս վարչական տարածքում ակնհայտորեն ավելացնելու է միջնորդությունների ծավալը մինչդատական վարույթի հատվածում»: