Փաստ ինֆո

 «Մենք պտտվել ենք գյուղերում, բայց էլ կարիք չկա: Մարդիկ գիտեն՝ էստեղ Սահմանադրության խնդիր չկա, իրավական խնդիր չկա, Սարգսյանը կամք ա արտահայտել շարունակի պաշտոնավարել»,-այսօր Ազատության հրապարակում կայացած «Չե՛ք անցկացնի»-ի հանրահավաքի իր ելույթում ասաց ՀԱԿ խմբակցության պատգամավոր Արամ Մանուկյանը:

Նրա խոսքով, Սերժ Սարգսյանը լավ գիտի, որ իրեն աջակցող չկա, եթե «կեղծիքի ռեժիմը» չմիացվի, ուստի այդ օրը ռեժիմից ազատվելու միասնական կամք ցույց տալու լավ հնարավորություն է:

Իսկ  «Ոչ»-ի քարոզչական շտաբի պետ, ՀԱԿ խմբակցության քարտուղար Լևոն Զուրաբյանն իր ելույթը սկսեց մի փոքր տարօրինակ հայտարարությամբ՝ «Այս անձրևային եղանակին միայն մեզ նման աննորմալները կարող էին գալ կանգնել այստեղ, և մենք իսկապես աննորմալ ենք, որովհետև ամեն ինչ պատրաստ ենք զոհաբերել երկրում ժողովրդավարության կառուցման նպատակով»:

«Առաջին հայացքից «Այո»-ի թիվը շատ մեծ է՝ այնտեղ է Ս.Սարգսյանը՝ իր քաղաքական թիմով, այնտեղ են այն քաղաքական ուժերը, որոնք արդեն պայմանավորվել են, որ մի որոշ տոկոս ձայն կստանան 2017թ-ի խորհրդսարանական ընտրություններում, այնտեղ են նաև նրանք, ովքեր ձևականորեն «Ոչ» ասելով Սահմանադրությանը, ժողովրդին համոզում են, որ անիմաստ է պայքարը»,- ասաց նա:

Լևոն Զուրաբյանը նաև նշեց իշխանությունների կողմից կիրառվող կեղծիքների տարբերակները՝ կաշառք, կարուսել, շրջիկ խմբերի միջոցով բազմակի քվեարկություն և հանրային թույլ հսկողությամբ տեղամասերում արձանագրությունների կեղծում ու կեղծ արդյունքների ներկայացում:

Իսկ քանի որ, ըստ Լևոն Զուրաբյանի, միայն այս տարբերակներն անհրաժեշտ ձայների քանակ չեն ապահովում, ուստի ԱԺ-ում օրինականացվեց բազմակի քվեարկության հնարավորություն ապահովող ևս մեկ միջոց՝ նույնականացման քարտերով քվեարկությունը:

Լևոն Զուրաբյանը կոչ արեց ՀՀ քաղաքացիներին «զինվորագրվել» կեղծարարության դեմ համաժողովրդական պայքարին՝ միաժամանակ հայտնելով, որ իրենք օգտվելու են քարոզչության բոլոր միջոցներից, այդ թվում՝ հեռուստաեթերից:

Ավարտելով ելույթը Զուրաբյանը հայտարարեց «Ոչ»-ի նոր  կարգախոսները՝ «Ասա ոչ, դու կարող ես», «Ասա ոչ և դու կհաղթես»: Հանրահավաքի մասնակիցներն ի պատասխան վանկարկեցին «Ոչ, ոչ, ոչ», իսկ Լևոն Զուրաբյանը փոխելով կարգախոսը հայտարարեց «Պայքար, պայքար մինչև վերջ»:

Ազդարարելով այսօրվա հանրահավաքի ավարտը՝ Լևոն Զուրաբյանը  հայտարարեց, որ հաջորդ հանրահավաքը տեղի կունենա նոյեմբերի 20-ին, ժամը 17: 00-ին, Ազատության հրապարակում: