Փաստ ինֆո

Երևանի Կենտրոն Նորք Մարաշ ընդհանուր իրավասության դատարանում այսօր պաշտպանական ճառով հանդես եկավ քանաքեռցի հեղինակություն, Տույ մականունով հայտնի Արթուր Ղազարյանի պաշտպան Երեմ Սարգսյանը, ով դատարանին միջնորդեց իր պաշտպանյալի նկատմամբ նշանակել նվազագույն պատիժ և այն պայմանականորեն չկիրառել` սահմանելով փորձաշրջան:

Ինքը` ամբաստանյալը հրաժարվեց իր վերջինխոսքի իրավունքից` դատավորի հարցին պատասխանելով. «Ինչ պիտի ասեմ: Ես ով եմ, որ բան ասեմ: Ասողն էլ եք դուք, չասողն էլ: Որը բարին է, թող դա էլ լինի»:

Երեմ Սարգսյանն իր պաշտպանական ճառում ներկայացրեց այն հիմքերը, որոնց հիման վրա դատարանից պահանջեց իր պաշտպանյալի նկատմամբ նվազագույն պատժաչափ կիրառել: Փաստաբանը հիշեցրեց, որ Արմեն Ղազարյանն ի սկզբանե ընդունել էր իրեն մեղսագրվող արարքն ու պահանջեց արագացված դատավարություն, որով, ըստ փաստաբանի`«նպաստել էր գործի քննությանն ու աջակցել հանցագործության բացահայտմանը»:

Երեմ Սարգսյանը նաև թվարկեց Արթուր Ղազարյանին անձը բնութագրող հատկանիշները` հիշեցնելով, որ մեղադրող դատախազն իր ճառում դրանց չէր անդրադարձել, մինչդեռ, իր խոսքով` «պարտավոր էր վկայակոչել պատիժը մեղմացնող հանգամանքները»:

Թվարկելով դրանք` Երեմ Սարգսյանը նշեց, որ իր պաշտպանյալը դատված չի եղել, ունի միջնակարգ ու բարձրագույն կրթություն, 2-րդ կարգի հաշմանդամ է, խնամքին ունի 3 երեխա, որոնցից կրտսերը` 9 տարեկան և զաղվել է բարեգործությամբ, ինչի համար ստացելէ բազմաթիվ պատվոգրեր եւ շնորհակալագրեր, Քիքբոքսինգի ֆեդերացիայի պատվավոր անդամ է:

Որպես պատիժը մեղմացնող հանգամանք, Երեմ Սարգսյանը վկայակոչեց նաև Արթուր Ղազարյանի առողջական վիճակը:

Ըստ փաստաբանի` ԱրթուրՂազարյանը ներկայում գտնվում է «Նուբարաշեն» ՔԿՀ-ի նյարդահոգեբույժի հսկողության տակ: Նրա հիվանդությունը սրվել է դեռևս ՁՊՎ-ում, արտահայտվելով որպես փակ տարածություններից վախ: Բժիշկները Արթուր Ղազարյանին մի քանիհոգեմետ դեղեր են նշանակել, որոնք նա ընդունում է ՔԿՀ-ում, բայց նրա մոտ «չնչին առիթից կամ առանց դրա հաճախակի առաջանում են վախեր, լարված վիճակ»,- ասաց Երեմ Սարգսյանը` հավելելով, որ մասնագետները մասնագիտացված հիմնարկում ստացիոնար բուժում և համապատասխան վիրահատական միջամտության խորհուրդ են տվել իր պաշտպանյալին, քանի որ ՔԿՀ-ում հնարավոր չէ խուսափել փակ տարածություններից ու բուժվել դրանցից ունեցած վախերից:

Անդրադառնալով այս հանգամաներում իր պաշտպանյալի նկատմամբ մեղադրող դատախազի պահանջած առավելագույն` 1.5 տարվա ազատազրկման ձևով պատժին, Երեն Սարգսյանն ասաց, որ դա իր համար ոչ միայն անհասկանալի պահանջ է, այլև «հավասարազոր է խոշտանգման»:

 Իր թվարկած հանգամանքները հաշվի առնելով` Երեմ Սարգսյանը դատարանին միջնորդեց իր պաշտպանյալի նկատմամբ կիրառել առաջադրված մեղդրանքի համար քրեական օրենսգրքով նախատեսված նվազագույն` 3 ամիս ազատազրկում պատժաչափը,  իսկ դրանից ավելին սահմանելու դեպքում, ՔՕ 70 հոդվածը կիրառելով , պատիժը պայմանականորեն չկիրառել՝ սահմանելով փորձաշրջան:

Հիշեցնենք, Արթուր Ղազարյանին մեղադրանք է առաջադրվել ապօրինի զենք-զինամթերք ձեռք բերելու և պահելու համար: Նրա մոտ հայտնաբերվել էր «Վիկինգ» մոդելի 9 մմ տրամաչափի գործարանային արտադրության ակոսափող ատրճանակ և ռազմամթերք հանդիսացող 17 փամփուշտ: