Փաստ ինֆո

Սահմանադրության նոր նախագծում կան որոշ հետընթացներ, որոնցից ամենակարևորը մարդու հիմնարար իրավունքներն ու ազատություններն են: Այս մասին այսօր լրագրողների հետ հանդիպմանն ասաց «Ոչ սահմանադրական փոփոխություններին» նախաձեռնող խմբի անդամ, «Սարգսյան իրավաբանական խումբ» իրավաբանական միավորման ղեկավար Տիգրան Սարգսյանը` միաժամանակ ներկայացնելով դրանցից մի քանիսը: Այսպես, օրինակ, գործող Սահմանադրությամբ մարդու արժանապատվության իրավունքն ամրագրված է որպես ազատությունների հիմքը, բարձրագույն արժեք, իսկ նախագծով այնընդամենը  անխախտելի իրավունք է ներկայացվում: «Ցանկացած իրավունք է անխախտելի, բայց մարդու արժանապատվության իրավունքը պետք է ավելի բարձր ներկայացվեր»,- ասաց բանախոսը:

Բացի այդ, Տիգրան Սարգսյանի դիտարկմամբ, ինչպես գործող Սահմանադրույունն, այնպես էլ ներկայացված նախագիծը չեն ամրագրում քաղաքացու աշխատանքի իրավունքը: «Նախատեսված է աշխատանքի ազատ ընտրության իրավունք, չկա աշխատանքի իրավունք: Երբ ասում ենք աշխատանքի ազատ ընտրության իրավունք, այստեղ պետությունը որևէ պարտավորություն չի ստանձնում մարդկանց աշխատանքով ապահովելու»,- մեկնաբանեց նա:

Գործող Սահմանադրությամբ, ըստ Տիգրան Սարգսյանի, քաղաքացին պետական կառավարմանը մասնակցելու ավելի լայն իրավունքներ ունի, իսկ նախագծով դրանք սահմանափակված են, օրինակ` նախագահն ընտրվում է ընտրիչների կողմից: ԱԺ-ում կայուն մեծամասնության ձևավորման պահանջը ևս, ըստ իրավաբանի, սահմանափակում է մարդու իրավունքը քանի որ շատ կուսակցություններ, որոնք կստանան ընտրողների ձայները, բայց չեն ունենա կայուն մեծամասնություն, կզրկվեն խորհրդարանում հայտնվելու հնարավորությունից:

Իսկ ինչ վերաբերում է պարլամենտական կառավարմանը, Տիգրան Սարգսյանը թերահավատ է, որ այն Հայաստանում կգործի: Նրա խոսքով, այսօր մեր խորհրդարանի ընդունած օրենքները Կառավարության թելադրածն են, ուստի, եթե անգամ անցնենք խորհրդարանական համակարգի, միևնույն է, ունենալու ենք վարչապետական համակարգ: «Այսինքն՝ ունենք չգործող կառույց, որի վրա ենք դնում կառավարման ամբողջ բեռը»,- ասաց բանախոսը: