Փաստ ինֆո

Նախկին ոստիկան Էդգար Վարագյանի պաշտպան Կրոմվել Գրիգորյանը արդեն երկրորդ բողոքն  է ներկայացրել Վերաքննիչ դատարան՝  խնդրելով  բեկանել առաջին ատյանի դատավճիռը և գործն ուղարկել համապատասխան դատարան՝ լրիվ ծավալով  նոր քննության:

Վերաքննիչ բողոքում պաշտպան Կրոմվել Գրիգորյանը գտել է, որ Է.Վարագյանի վերաբերյալ քրեական գործի քննությունը պետք է իրականացվի ոչ թե միայն ապացույցների մասով, այլ լրիվ ծավալով, որովհետև դատարանի  կողմից գործը քննելիս և դատավճիռ կայացնելիս խախտվել է գործի քննության ընդդատությունը (գործն ընդդատյա է Երևանի Արաբկիր և Քանաքեռ-Զեյթուն և ոչ թե Կենտրոն և Նորք-Մարաշ վարչական շրջանների դատարանի քննությանը): Իսկ դա արդեն բավարար է, ըստ պաշտպանի, դատավճիռը լրիվ ծավալով բեկանելու և նոր քննության ուղարկելու:

Վերաքննիչ բողոքն այսօր չքննվեց ու դատական նիստը հետաձգվեց դատարանի կազմը համալրելու նպատակով:

Նշենք, որ Է.Վարագյանը  առաջին ատյանի դատարանի դատավճռով  մեղավոր էր ճանաչվել ՀՀ քրեական օրենսգրքի 175-րդ հոդվածի 3-րդ մասի 1-ին կետով՝ ավազակություն՝ առանձնապես խոշոր չափերով գույք հափշտակելու նպատակով, 183-րդ հոդվածի 3-րդ մասի 3-րդ կետով՝ առանց հափշտակելու նպատակի ավտոմեքենային կամ տրանսպորտային այլ միջոցին ապօրինաբար տիրանալը, որը կատարվել է կյանքի կամ առողջության համար վտանգավոր բռնություն գործադրելով, կամ դա գործադրելու սպառնալիքով,  131-րդ հոդվածի 2-րդ մասի 2-րդ, 3-րդ, 4-րդ և 6-րդ կետերով՝ մարդուն առևանգելը, որը կատարվել է երկու կամ ավելի անձանց նկատմամբ, որոնցից մեկը՝ անչափահաս,  կյանքի կամ առողջության համար վտանգավոր բռնություն գործադրելով կամ դա գործադրելու սպառնալիքով, զենքի կամ որպես զենք օգտագործվող առարկաների գործադրմամբ, 139-րդ հոդվածի 1-ին մասով՝ սեքսուալ բնույթի բռնի գործողություններ,  և 138-րդ հոդվածի 1-ին մասով՝ բռնաբարություն, և դատապարտվել 15 տարվա ազատազրկման:

Կրոմվել Գրիգորյանի առաջին վերաքննիչ բողոքի հիման վրա  ՀՀ վերաքննիչ քրեական դատարանը  բեկանել էր   հիշյալ դատավճիռը  և որոշել գործն ուղարկել նույն՝ Երևանի Կենտրոն և Նորք-Մարաշ վարչական շրջանների առաջին ատյանի դատարան՝ այլ կազմով նոր քննության՝ Վերաքննիչ դատարանի կողմից սահմանված ծավալով:  

Վերաքննիչ դատարանը գտել էր, որ գործը քննելիս առաջին ատյանի դատարանը նախաքննության ժամանակ գործին կցված փաստաթղթերի հրապարակումը կատարել է ՀՀ քրեական դատավարության օրենսգրքի 349-րդ հոդվածով սահմանված պահանջների խախտմամբ:

Մասնավորապես, նախաքննության ժամանակ ձեռք բերված, մեղադրանքի հիմքում դրված և գործին կցված փաստաթղթերը /ապացույցները/, որոնցում արտացոլված կամ հաստատված են գործի համար նշանակություն ունեցող հանգամանքներ, առաջին ատյանի դատարանում «ըստ էության չեն հրապարակվել և չեն հետազոտվել, այլ հրապարակվել են մեղադրական եզրակացությունում՝ որպես ապացույցներ արձանագրված գրառումները, ինչը կոնկրետ դեպքում հանգեցրել է դատավարական իրավունքի այնպիսի էական խախտման, որը կարող է ազդել գործով ճիշտ որոշում կայացնելու վրա»:

Վերաքննիչ դատարանը գտել էր  նաև, որ առաջին ատյանի դատարանը կոնկրետ դեպքում թույլ է տվել դատավարական իրավունքի այնպիսի էական խախտում, որը ՀՀ քրեական դատավարության օրենսգրքի 398-րդ հոդվածի համաձայն՝ հիմք է 17.11.2014թ. դատավճիռը բեկանելու ու քրեական գործը նույն դատարան այլ կազմով նոր քննության ուղարկելու համար:

Վերաքննիչ դատարանը սահմանել էր նոր քննության ծավալը. ըստ այդմ, նոր դատաքննությամբ անհրաժեշտ է հետազոտել նախաքննության ժամանակ գործին կցված կամ դատական նիստում առաջին ատյանի դատարանին ներկայացված փաստաթղթերը:

Իսկ Է.Վարագյանի նկատմամբ առաջադրված մեղադրանքներով արդարացման դատական ակտ կայացնելու մասին պաշտպանի ու ամբաստանյալի պահանջի վերաբերյալ Վերաքննիչ դատարանը գտել էր, որ հիշյալ ապացույցների պատշաճ ընթացակարգով հետազոտված չլինելու պայմաններում «ամբաստանյալի անմեղության հարցին անդրադառնալը դեռևս վաղաժամ է և օբյեկտիվորեն հնարավոր չէ»: