Փաստ ինֆո

Անցենզուր բնույթի հայհոյանքներ տալու և Ավանի ՔԿԱԳ բաժնի աշխատակիցների բնականոն աշխատանքը խանգարելու մեջ մեղադրվող 50-ամյա Սամվելն այսօրվա դատական նիստում հայտարարեց, որ Ավանի ՔԿԱԳ բաժնի պետ Քրիստինե Մխոյանը ծաղրել է իրեն, ու վիրավորել, անվանելով՝ բոմժ:

Ամբաստանյալն իր ցուցմունքում հայտնեց, որ անվանափոխության դիմում է ներկայացրել Ավանի ՔԿԱԳ բաժին, սակայն բաժնի պետ Ք.Մխոյանն իրեն շուրջ 2 տարի «տարել-բերել» է, ինքն էլ հավասարակշռությունից դուրս է եկել և վիճաբանել նրա հետ, սակայն չի հիշում, որ անցենզուր բնույթի հայհոյանքներ տված լինի:

Նշենք, որ նախորդ դատական նիստերից մեկում դատարանը հետազոտել էր Մխոյանի կողմից կատարված հայհոյանքներով լի մի ձայնագրություն, որը գործով ապացույց է ճանաչվել:

Ձայնագրության վերաբերյալ էլ ամբաստանյալը հայտարարեց, որ այդ օրը կրկին գնացել է Ավանի ՔԿԱԳ բաժին՝ պարզաբանում ստանալու, թե ինչո՞ւ են մերժել իր անվանափոխության դիմումը, սակայն լսել է, թե ինչպես է Մխոյանն ասում. «էդ բոմժին ճանապարհեք, թող գնա, հավես չունեմ»: Այստեղ ամբաստանյալի ինքնասիրությունը վիրավորվել է, նա վիճաբանել է Ք.Մխոյանի հետ, իսկ Մխոյանը ձայնագրել է այդ ամենը:

«Մի երկու բառ գուցեև ասել եմ, բայց 80 տոկոսը մոնտաժված և փոփոխված է»,- ասաց ամբաստանյալը՝ հավելելով, որ Մխոյանը ևս սեռական բնույթի հայհոյանքներ է տվել իր հասցեին:

Դատված լինելու և դատվածությունը մարված չլինելու հիմքով իր անվանափոխության դիմումը մերժելու մասին ամբաստանյալը նշեց, որ երբ դատվածությունը մարված լինելու մասին համապատասխան տեղեկանք է ներկայացրել, Մխոյանը կասկածի տակ է դրել այդ փաստաթղթի օրինական լինելը, ապա հարցրել է, թե ինչքան գումար է տվել՝ այն ձեռք բերելու համար, ինչին ի պատասխան Սամվելը նշել է, որ «միլիցայությունը անասուն չի, որ առնես»:

Ամբաստանյալը պնդեց, որ սկզբնական շրջանում ՔԿԱԳ բաժնի պետը խոստացել է գործը գլուխ բերել՝ հավատացնելով իրեն, որ հնարավոր է անվանափոխությունը, սակայն 2 տարի շարունակ իրեն տարել-բերել է, ապա ասել՝ սպասիր դատվածությունդ մարվի, իսկ երբ դատվածությունը մարված լինելու մասին տեղեկանք է տարել, չի վերցել, որից հետո էլ մերժել է դիմումը:

Ամբաստանյալը պնդում էր, որ իր դատվածությունը մարվել է 2013թ. հունիսին, այս մասին նա տեղեկացել է այն փաստաբանից, ով ՌԴ-ում սպանության փորձի մեջ մեղադրանքի գործով իր շահերն է ներկայացրել:

Մեղադրողի հարցին, թե ամբաստանյալն ինչու՞ է ցանկացել անունը փոխել, վերջինս նշեց, որ «ձախորդ անուն է, ուզում էի փոխել պապիս անունով՝ Մեխակ Մեխակյան»:

Ժամանակ առ ժամանակ ամբաստանյալը վրդովվում էր, շեղվում մեղադրանքի ծավալին վերաբերող հարցերին պատասխանելիս, սակայն հարցաքննության ավարտին դատարանից ներողություն խնդրեց՝ հավասարակշռությունից դուրս գալու համար:

Չնայած որ ամբաստանյալն իրեն ֆիզիկապես և հոգեպես առողջ մարդ է համարում, սակայն իր ցուցմունքից և դատավարության մասնակիցների և նախագահող դատարանի հարցերին տված պատասխաններից այլ տպավորություն է ստեղծվում:

Ըստ մեղադրանքի՝ Սամվել Մ.-ն, իր անվանափոխության դիմումի վերաբերյալ Ավանի ՔԿԱԳ բաժնի կողմից մերժում ստանալու կապակցությամբ 2014թ. մայիսի 19-ին՝ ժամը 18:00-ի սահմաններում, նշված վայրի աշխատասենյակների պատուհանների մոտ, դիտավորությամբ, կոպիտ կերպով խախտելով հասարակական կարգը և բացահայտ անհարգալից վերաբերմունք դրսևորելով ՔԿԱԳ տարածքային բաժնի  պետ Քրիստինե Մխոյանի և մյուս աշխատակիցների նկատմամբ, 20 րոպե տևողությամբ տվել է անցենզուր բնույթի հայհոյանքներ՝ խանգարելով վերջիններիս բնականոն աշխատանքը:

Սամվել Մ.-ին մեղադրանք է առաջադրվել ՀՀ քրեական օրենսգրքի 258-րդ հոդվածի 1-ին մասով՝ խուլիգանություն, նրա նկատմամբ որպես ափանման միջոց է ընտրվել չհեռանալու մասին ստորագրությունը:

Նշենք նաև, որ Սամվել Մ.-ի վերաբերյալ մեկ այլ քրեական գործ ևս մուտք է եղել նույն դատարան՝ նոր գործի շրջանակներում.նա մեղադրվում է իր անվանափոխության դիմումի մերժվելուց հետո վրեժի շարժառիթով, 2014թ. հոկտեմբերի 2-ի լույս 3-ի գիշերը Ավան վարչական շենքի պատերի վրա, որտեղ գտնվում է՝ ՔԿԱԳ բաժինը, Ք.Մխոյանի հասցեին կարմիր գույնի ներկանյութով անպարկեշտ գրագրություններ կատարելու համար: