Փաստ ինֆո

ԱԺ պետաիրավական հարցերի հանձնաժողովի հերթական նիստում այսօր երկրորդ ընթերցմամբ քննարկվեց կարգազանց պատգամավորների պատժելու կամ «ականջները քաշելու» որակումն ստացած օրինագիծը:

Նախագծի հեղինակ «Ժառանգություն» խմբակցության պատգամավորներ Զարուհի Փոստանջյանը, Ռուբիկ Հակոբյանն ու Թևան Պողոսյանը, հիշեցնենք, առաջարկում են փոփոխություններ ու լարացումներ կատարել «Ազգային ժողովի կանոնակարգ» օրենքում, որով բացակա պատգամավորի փոխարեն գրանցվող կամ քվեարկող պատգամավորը կհամարվի կարգազանց, և նրա նկատմամբ նիստը վարողը կարող է ձեռնարկել կանոնակարգով նախատեսված պատժամիջոցները:

Նախագծի հեղինակ Զարուհի Փոստանջյանն այսօր իր գործընկերներին տեղեկացրեց, որ առաջին ընթերցմամբ հավանության արժանացած օրինագիծը հարստացվել է ևս մի քանի դրույթով: Մասնավորապես` պատգամավորներից բացի կարգազանց համարել նաև ԱԺ նիստում ներկա այն անձանց, ովքեր նիստի ընթացքում աղմկում են, վիրավորական արտահայտություններ են անում, չեն կատարում ԱԺ նիստը վարողի` սույն օրենքից բխող պահանջները կամ կատարում են սույն օրենքով սահմանված կարգը խախտող այլ գործողություններ:

Բացի այդ, նախագծով կարգազանց է համարվում այն պատգամավորը, ով իր գործողություններով խոչընդոտում է պատգամավորին՝ անարգել օգտվելու քվեարկության համար օրենքով սահմանված հնարավորություններից, աղմկում է, վիրավորական արտահայտություններ է հնչեցնում:

Այս դրույթի վերաբերյալ որոշ անհամաձայնություն հայտնեց ԱԺ ՀՅԴ խմբակցության պատգամավոր Արծվիկ Մինասյանը` նշելով, որ չկան հստակ չափորոշիչներ, որով հնարավոր լինի որակել «աղմուկ» կամ «վիրավորական արտահայտություն» երևույթները:

Հարցին Զարուհի Փոստանջյանը կարճ պատասխանեց: «Աղմուկի օրինակ է Առաքել Մովսիսյանը»,- ասաց պատգամավորն ու հավելեց, որ այդ պատգամավորն իր պահվածքով մի քանի ագնամ ցույց է տվել, թե ինչ ասել է «աղմուկ» և «վիրավորական արտահայտություն»:

Ինչևէ, քննարկումից հետո հանձնաժողովը որոշեց դրական եզրակացություն տալ նախագծին, և այն երկրորդ ընթերցմամբ ընդգրկել ԱԺ առաջիկա քառօրյայի օրակարգում: