Փաստ ինֆո

Օրերս իրավապահները հայտնաբերել ու ձերբակալել են 2009թ օգոստոսից հետախուզման մեջ գտնվող Վահագն Ունջուղուլյանին, ով մեղադրվում էր ավազակային հարձակման մեջ: Ի դեպ, նրա հանցակիցները վաղուց արդեն դատապարտվել են այդ արարքի համար ու հիմա իրենց պատիժն են կրում:

Հիշեցնենք՝ 2009թ. 16-ի լույս 17-ի գիշերը Արարատի մարզի Զորակ գյուղի բնակչուհի Ռոզա Հարությունյանի տան վրա ավազակային հարձակում էր կատարվել:

Դիմակավորված 3 անհայտ հանցագործները, մտնելով Ռոզա Հարությունյանի տուն, նրան ծեծի էին ենթարկել, կապկպել ու հափշտակել 400 ԱՄՆ դոլար, 80 000 ՀՀ դրամ, 5000 ՌԴ ռուբլի և ոսկյա զարդեր:

Հարուցված քրեական գործի նախաքննության փուլում հանցագործներից 2-ը` Արսեն Հայրապետյանն ու Մակիչ Լևոնյանը, դեպքից օրեր անց ձերբակալվել էին, իսկ Վահագն Ունջուղուլյանի նկատմամբ հայտարարվել էր հետախուզում:

Հանցագործությունը ծրագրվել և իրականացվել էր այսպես. Մակիչ Լևոնյանն իր ծանոթ Արսեն Հայրապետյանից իմացել էր, որ նա Ռոզա Հարությունյանից տոկոսով գումար է վերցրել: Հայրապետյանը նաև պատմել էր, որ կինը մենակ է ապրում, շատ գումար ու ոսկյա զարդեր ունի, և առաջարկել էր նրանից ավազակությամբ հափշտակել դրանք: Մ.Լևոնյանն ընդունել էր այդ առաջարկը, և նույն օրը երեկոյան իր ավտոմեքենայով գնացել էին Զորակ գյուղ` ապագա զոհի տունն ու տան դիրքն ուսումնասիրելու: Հետո կանչել էին նաև Լևոնյանի ընկեր Վահագն Ունջուղուլյանին և նրան էլ հայտնել իրենց մտադրության մասին:  

Իսկ արդեն դեպքի օրը՝ ուշ գիշերով, Մակիչ Լևոնյանը, Վահագն Ունջուղուլյանն ու վերջինիս ընկեր ոմն Եղոն դիմակավորված եկել էին գյուղ, իսկ Արսեն Հայրապետյանը մնացել էր Էջմիածնում, որտեղ սպասել էր նրանց վերադարձին: Դիմակավորված 3 հանցակիցները, մտնելով Ռոզա Հարությունյանի տուն, նրան ծեծի էին ենթարկել, ապա կպչուն ժապավենով փակել բերանը, կապկպել ձեռքերն ու ոտքերը և տանը փնտրել ու գտել նրա գումարներն ու ոսկեղենը և դրանք վերցնելով՝ հեռացել:

Կիրառած բռնության արդյունքում տանտիրուհին ստացել էր կյանքին վտանգ սպառնացող ծանր վնասվածքներ` գանգուղեղային փակ վնասվածք, գլխուղեղի ցնցում, աջ կողմից 9-րդ կողի կոտրվածք, գանգաթաղանթի վնասվածք, նաև` սալջարդեր, քերծվածքներ և արյունազեղումներ` մարմնի ու դեմքի տարբեր մասերում:

Նշենք, որ առաջադրված մեղադրանքը հաստատվել է նաև դատարանի վճռով, ինչի արդյունքում Մակիչ Լևոնյանը դատապարտվել է 8.5 տարվա, Արսեն Հայրապետյանը` 6 տարվա ազատազրկման:

Նրանց հանցակից Վահագն Ունջուղուլյանի և անձը չպարզված Եղոյի մասով գործն անջատվել էր բուն գործից` մինչ նրանց հայտնաբերումը:

Այժմ արդեն Ունջուղուլյանը հայտնաբերվել է և նրան ևս մեղադրանք է առաջադրվել՝ Քրեական օրենսգրքի 175-րդ հոդվածի 2-րդ մասի 1-ին, 3-րդ և 4-րդ կետերով, այն է` մի խումբ անձանց կողմից նախնական համաձայնությամբ բնակարան ապօրինի մուտք գործելով, զենքի կամ որպես զենք օգտագործվող այլ առարկաների գործադրմամբ կատարված ավազակությունը: