Փաստ ինֆո

Սյունիքի մարզպետի կինը՝  Լորետա Բարսեղյանը, ով մարզպետի առանձնատան մոտ հայտնի միջադեպի գործով ճանաչվել է որպես տուժող, հրաժարվել է ցուցմունք տալուց, մասնավորապես՝ պաշտպանական կողմի հարցերին պատասխանելուց:

Մասնավորապես, Լորետա Բարսեղյանը չի ցանկացել  պատասխանել, թե «Որտե՞ղ և քանի՞  տեսախցիկ կա Ձեր  առանձնատանը»,  «Որտե՞ղ է եղել Սուրիկ  Խաչատրյանի ննջասենյակը, սպառնալիքների ձայները, որոնց մասին նշում է  տուժողը, հնարավո՞ր էր, որ  չլսվեր ննջասենյակում, որտեղ Սուրիկը Խաչատրյանը գտնվում էր»,  «Ի՞նչ առնչություն ունեն Ձեր ընտանիքի հետ Զարզանդ Նիկողոսյանը և Նիկոլայ Աբրահամյանը»: Սակայն տուժողը պատասխանել է ըստ ամենայնի «անվտանգ» հարցին, թե ով է Արագած Ղևոնդյանը՝ Սուրիկ Խաչատրյանի վարորդն է: 

Ինչպես «Փաստինֆո»-ի թղթակցի հետ զրույցում հայտնեց  գործով միակ ամբաստանյալ Արտակ Բուդաղյանի պաշտպան Հայկ Ալումյանը,  դատարանն ամեն անգամ հարցին պատասխանելուց հրաժարվելուց հետո պարզաբանում էր.  «Դուք պարտավոր եք պատասխանել հարցերին, առաջարկում եմ պատասխանել», սակայն ապարդյուն: Ի վերջո, դատարանը գնահատեց, որ տուժողը հրաժարվում է հարցերին պատասխանել: «Մենք եզրակացությունները կանենք, դատարանն էլ եզրակացություններ արեց»,- ասաց պաշտպանը:

Տուժողը ցուցմունք է տվել 10-15  վայրկյան տևողությամբ իրադարձությունների վերաբերյալ՝ այն պահից հետո, երբ տեսել է ինչպես է ընկել  Արտակ Բուդաղյանը, ինքն էլ՝ Լորետան, ընկել է,  դրանից հետո սթրեսային վիճակի պատճառով ոչինչ չի հիշում:

Մայրը երկու տարբերակ ուներ՝ կամ ասել, որ իրականում  Բուդաղյանների կողմից սպառնալիք չի եղել, այդ ժամանակ կարձանագրվի, որ իր որդին՝ Տիգրան Խաչատրյանն իրավաչափ չի գործել ու պետք է պատասխան տա,  կամ պետք է ներկայացներ, որ Բուդաղյանները ռեալ սպառնալիք էին ներկայացնում, այդ ժամանակ իր որդու կրակոցներն եղել են իրավաչափ: Լորետա Բարսեղյանը, բնականաբար, գիտակցելով, որ իր ցուցմունքից է կախված իր որդու ճակատագիրը, խտացրել է գույները՝ ներկայացնելով, որ  «Արտակ Բուդաղյանը շատ սարսափելի սպառնալիքներ էր տալիս»:

Հայկ Ալումյանը նկատեց, որ տուժողի ցուցմունքներն աստիճանաբար էվոլյուցիա են ապրել՝  այն պահից սկսած, երբ  հավանաբար քննիչները վերջնականապես հրահանգավորվել են,  թե ինչպես պետք է փորձեն «օգնել» Տիգրան Խաչատրյանին ու Զարզանդ Նիկողոսյանին, այդ ժամանակ արդեն Լորետա Բարսեղյանի  ցուցմունքներում հառնել են Արտակ   Բուդաղյանի սպառնալիքները: Այդ ժամանակ է ի հայտ եկել նաև «վարկածը», թե, իբր, «Ավետիքն հենց իր մեքենայից իջավ՝  իր ձեռքին էլ կար ատրճանակ»: Մինչդեռ տեսանյութից երևում է, որ Ավետիք Բուդաղյանը խաղաղարար դեր էր կատարում, փորձում էր, ի դեպ՝  Լորետա Բարսեղյանի հետ,  ընդհարման հատվածից հեռացնել Արտակ Բուդաղյանին:  Ավետիքի ձեռքում զենք  հայտնվում է այն բանից հետո,  երբ Տիգրանը կրակում  է ու վիրավորում Արտակին:

Հատկանշական է, որ  Ավետիքի վրա վերջին կրակոցի ձայնը շատ տարբերվում է Զարզանդ Նիկողոսյանի ու Տիգրան Խաչատրյանի նախորդ կրակոցներից: Փորձագետի եզրակացության համաձայն, այդ տարբերությունը կարող է պայմանավորված լինել  նրանով, որ ոչ թե ուրիշ զենքից են կրակել, այլ  արձակվել են  երկու միաժամանակյա կրակոցներ: «Զարզանդ Նիկողոսյանն ու Տիգրան Խաչատրյանը միաժամանակ կրակում են  Ավետիքի վրա, երբ որ նա արդեն ընկած է,  էլի ինքնապաշտպանություն չի ստացվում»,- ասաց Հայկ Ալումյանը:

Դատարանում հարցաքննվել է նաև Խաչատրյանների ընտանիքի փաստաբանի միջնորդությամբ հրավիրված փորձագետը, ով կազմել էր Սուրիկ Խաչատրյանի  առանձնատան խոհանոցում տեսախցիկի ձայնագրության վերծանումները:  Փորձագետը, սակայն, եկել  ու իր ցուցմունքով ամրապնդել է այն, ինչի մասին բարձրաձայնում էր պաշտպանական կողմը:

Փորձագետը,  մասնավորապես,  հաստատել է, որ խոհանոցի խոսակցությունն հենց այնպես է եղել, ինչպես արձանագրվել է  վերծանումներում:

«Քանի որ այդ ապացույցը շատ լուրջ հարվածում է ու հերքում է տեղի ունեցածի մասին Սուրիկ Խաչատրյանի կողմի վարկածը, դրա համար իրենց  փաստաբանները շատ  կենտրոնացած էին ապացուցելու, որ գուցե փորձագետը ինչ-որ մի բան լավ չի լսել, գուցե բարբառը լավ չի հասկացել, գուցե ինչ-որ բառի փոխարեն ինչ-որ ուրիշ բառ է լսել: Փորձագետը բացառեց, որ կարող է ինչ-որ մի բան սխալ  գրած լինել, նա ասել է, որ եթե ինքը ինչ-որ տեղ կասկածում է, նշում էր ոչ թե բառ, այլ բազմակետ է դնում, այսինքն՝ այն,  ինչ գրված է, դա այն է, ինչի վրա փորձագետն ընդհանրապես չի կասկածում:

Ձայնագրություն-ապացույցը  պայմանականորեն կարելի է երեք մասի բաժանել:  Առաջին հատվածն առնչվում է անմիջականորեն մինչև հրաձգության սկսվելու ժամանակահատվածին.  Զարզանդ  Նիկողոսյանը շատ հստակ անկեղծանում է, որ  Սուրիկ Խաչատրյանն է ավտոմեքենայի մեջ հարվածներ հասցրել Ավետիք Բուդաղյանին,  Զարզանդը,  մասնավորապես,  ասում է.  «Ավոյին հավայի տեղը խփին-մփին, ավտոյից իջացրին»: Ավտոմեքենայի մեջ բացի Զարզանդից ու Ավետիք Բուդաղյանից եղել են Սուրիկ Խաչատրյանն ու վարորդը, ուստի Զարզանդի  ասածը  կարող է վերաբերվել Սուրիկ Խաչատրյանին ու վարորդին:

Երկրորդ հատվածը առնչվում է բուն հրաձգությանը՝ երբ հրաձգությունը սկսվում է,  կանայք գոռում են՝  «Տիգրան, չկրակես, Տիգրան,  չկրակես: Թաղեմ բոյդ, ինչի՞ կրակեցիր»:  Հայկ Ալումյանն ընդգծեց՝ ի՞նչ  պաշտպանության մասին կարող է խոսք լինել, երբ «Տիգրանի հարազատ կանայք գոռում են՝  Տիգրան,  մի կրակիր»:

Ձայնագրության մեջ արտացոլվել են  նաև դեպքերի ավարտից ու ոստիկանության գալուց հետո քննարկումները, մասնավորապես, Սուրիկ Խաչատրյանի խոհանոցում մերձավորները մտածում են, թե ինչպես  անեն,  զենքերն  ինչպես  թաքցնեն.  Զարզանդն  ասում է՝  կտրեմ զենքը,   նոր հանձնեմ, մի ուրիշն ասում է՝  օրինականները տանք,  թող գնան, մյուսն էլ ասում է՝  ո՞ւր  է  այստեղ օրինական, օրինական չկա: Հետագայում «խուզարկության արձանագրությունում տեսնում ենք 7  զենք՝ բոլորը օրինական»:  Հայկ Ալումյանը նշեց, որ Սուրիկ Խաչատրյանի ընտանիքի անդամները չէին պատկերացնում, որ տեսախցիկը նաև ձայնագրում է, արդյունքում՝  «մենք այսօր ունենք մի ապացույց, որը պարզապես անգնահատելի է»:

Հայկ Ալումյանը նշեց նաև, որ բերման ենթարկվելուց հետո յուրաքանչյուր նիստին պարտաճանաչորեն ներկայանում է Տիգրան Խաչատրյանը:  «Նա ըմբռնեց, որ  դատարանը ատյան է, որին անհրաժեշտ է հարգել, նրա կանչով ներկայանալ: Եթե  մինչև այդ ոստիկանները չէին համարձակվում զանգահարել ու ասել՝  Տիգրան ջան,  խնդրում ենք արի, մի անգամ բերեցին, սկսեց բարեխիղճ ներկայանալ: Ինչքան կարևոր է, որ գոնե  մեկ անգամ մարդուն ցույց են տալիս, որ Սյունիքում էլ ՀՀ օրենքները գործում են»: