Փաստ ինֆո

Ազգային ժողովի ոչ իշխանական քառյակի՝ «Բարգավաճ Հայաստան», «Հայ ազգային կոնգրես», «Ժառանգություն» և ՀՅԴ խմբակցությունների այսօրվա դռնփակ նիստի օրակարգը բավականին հագեցած էր: Բացառությամբ սահմանադրական փոփոխությունների՝ մյուս հարցերի շուրջ քառյակի դիրքորոշումը միասնական է:

Այս մասին շուրջ մեկուկես ժամ տևած քննարկումից հետո լրագրողներին հայտնեց ՀՅԴ խմբակցության ղեկավար Արմեն Ռուստամյանը:
Սահմանադրական փոփոխությունների կապակցությամբ չորս քաղաքական ուժերը, տեսակետների փոխանակումից հետո, արձանագրել են, որ իրենցից յուրաքանչուրն այս հարցում պետք է հարգի մյուսների տեսակետները, քանի որ, ինչպես նշեց Ա.Ռուստամյանը, բացառությամբ ՀՅԴ-ի, քառյակի մյուս  երեք ուժերը՝ «այս կամ այն պատճառաբանությամբ», դեմ են սահմանադրական փոփոխությունների  անցկացմանը:

Այսօր քննարկաված երկրորդ հարցը կուտակային կենսաթոշակների հարցով Սահմանադրական դատարան դիմելն էր: Թեև ՀԱԿ-ը և «Ժառանգություն»-ը նպատակահարմար չէին գտնում դիմելը՝ ՍԴ-ից «ակնկալիքներ առանձնապես չունենալով», բայց դիմումին միանալու պատրասատակամություն են հայտնել: Արդյունքում որոշվել է առաջիկայում դիմել ՍԴ:

Հաջորդ հարցը կապված է եղել խորհրդարանական բոլոր ուժերի՝ սահմանամերձ տարածքներ կատարած այցելության արդյունքների ամփոփման հետ:  Դրա հետ կապված որոշվել է համատեղ հանդես գալ սահմանապահ գյուղերի մասին օրենսդրական նախաձեռնությամբ և այն ներկայացնել խորհրդարանական մյուս ուժերի քննարկմանը: Ըստ Ա.Ռուստամյանի՝ նախագիծն, ըստ էության, պատրաստ է:

«Նաիրիտ»-ի հարցով ԱԺ ժամանակավոր հանձնաժողով ստեղծելու կապակցությամբ քառյակի դիրքորոշումը դարձյալ միասնական է: Այս հարցը իշխանություններին ներկայացրած պահանջների 12 կետերից մեկն է: Մեծամասնությունը ժամանակին մերժեց հանձնաժողովի ստեղծումը, և աշնանը հարցին անդրադառնալու պայմանավորվածություն ձեռք բերվեց:

Քառյակն այսօր տեսակետներ է փոխանակել աշնանային նստաշրջանում յուրաքանչյուր ուժի կողմից կարևորվաղ օրենսդրական նախաձեռնությունների վերաբերյալ, իսկ նախօրեին ԱԺ նիստում բարձրացված՝ արտագաղթի, վերջինիս պատճառների և կասեցմանն ուղղված լուծումների թեմայով խորհրդարանական լսումներ կազմակերպելու հարցով քառյակը որոշել է դիմել ԱԺ նախագահին:  
 
Ոչ իշխանական քառյակը նաև կատարել է 12 կետերից բաղկացած պահանջների կատարման նախնական ամփոփում: Ինչպես հայտնեց Ա.Ռուսատամյանը, հաշվի առնելով, որ իշխանություններին ժամանակ էր տրվել մինչև սեպտեմբերի 30-ը, քառյակը որոշել է, որ կուսակցություններն այս հարցի շուրջ ներքին քննարկումներ կանցկացնեն, իսկ քառյակը վերջնական ամփոփումը կիրականացնի ավելի ուշ:

Ա.Ռուստամյանը վստահեցրեց, որ աշնանը քառյակի կողմից հանրահավաք անցկացնելու պայմանավորվածությունն ուժի մեջ է, իսկ հանրահավաքի օրը կհրապարակվի առաջիկայում: