Փաստ ինֆո

Վերնիսաժի գործով կալանավորված Վալերի Հովհաննիսյանը նկատմամբ ընտրված խափանման  միջոցը կմնա անփոփոխ: Այսօր ՀՀ Վերաքննիչ քրեական դատարանն անփոփոխ է թողել Վալերի Հովհաննիսյանի նկատմամբ կալանքը որպես խափանման միջոց կիրառելու առաջին ատյանի դատարանի որոշումը:

Ինչպես «Փաստինֆո»-ի հետ զրույցում հայտնեց Վալերի Հովհաննիսյանի փաստաբան Լեւոն Բաղդասարյանը, ինքը՝ կալանավորն այդ դատին չի մասնակցել: «Պատճառաբանեց դատարանը, որ քանի որ ընդհանուր իրավասության  դատարանում վերջինի ներկայությունն եղել է  կարիք չկա»,- ասաց փաստաբանը և ավելացրեց. «այն դեպքում, երբ նրա ներկայությունն այդտեղ եղել է միայն ֆիզիկապես, այսինքն՝ պատգարակին պառկած, աղիքը կողքից կախված, կիսագիտակից վիճակում, բժշկի հսկողության տակ, և եղել է բժշկի կողմից տրված գրավոր տեղեկանք, որ քննչական գործողություններ նպատակահարմար չէ կատարել»:

Փաստաբանը նաև պարզաբանեց, որ այսօր Վերաքննիչ ատյանն, ըստ էության քննում էր, թե իրավաչա՞փ է արդյոք ընդհանուր իրավասության դատարանի որոշումը, և «պատկերացրեք՝ առանց Վալերի Հովհաննիսյանի դրեց քննեց և որոշեց, որ իրավաչափ է եղել, այն դեպքում, երբ սա դասական խոշտանգման օրինակ է Վալերի Հովհաննիսյանի նկատմամբ», - ասաց Լևոն Բաղդասարյանը՝ հավելելով, «կալանքի որոշում են կայացնում, երբ մարդը անգամ չի գիտակցում, թե իր հետ ինչ է կատարվում, չի կարողանում խոսել, չի կարողանում փաստաբանի հետ խորհրդակցել»:

Փաստաբանը տեղեկացրեց, որ կալանքի հետ կապված հարցով առաջիկայում դիմելու է ոչ միայն Վճռաբեկ դատարան, այլև հասնելու է մինչև ՄԻԵԴ:

Մեր հարցին, թե ո՞րն է իր պաշտպանյալի նկատմամբ իրականացվող «խոշտանգումների» նպատակը, փաստաբանը պատասխանեց. «Ես իրավաբան եմ, չեմ ուզում գնահատական տալ»:

Ի դեպ, ինչպես արդեն հայտնել ենք մեր նախորդ հրապարակումներից մեկում, այսօր ՀՀ կառավարությւան շենքի դիմաց բողոքող Վալերի Հովհաննիսյանի մայրը՝ Լիա Հովհաննիսյանը հայտարարել էր, թե իր որդու նկատմամբ նման ձևով ճնշում է գործադրվում ԱԺ ԲՀԿ-ական պատգամավոր Կարապետ Կարապետյանի դրդմամբ՝ վերջինիս փեսայի համար ձեռնտու ցուցմունք կորզելու նպատակով:

Ի դեպ, Արդարադատության նախարարն այսօր նշել էր, թե տեղեկություն չունի Վալերի Հովհաննիսյանին «Դատապարտյալների հիվանդանոցում» անհրաժեշտ բժշկական օգնություն չտրամադրելու մասին:

Փաստաբանը մեզ հետ զրույցում հակառակը պնդեց. «Վալերի Հովհաննիսյանի ծնողները դիմել են Արդարադատության և Առողջապահության նախարարներին, որպեսզի կազմեն հանձնաժողով, և  վերջիվերջո տան մասնագիտական եզրակացություն՝ կարո՞ղ է Վալերի Հովհաննիսյանը նման պայմաններում առողջությունը վերականգնել, և նպատակահարմար չի՞ լինի բուժումը քաղաքացիական հիվանդանոցում շարունակել», քանի որ Լևոն Բաղդասարյանի խոսքով, Վալերիի աղիքը դեռևս բաց վիճակում է, նա պետք է ապաքինվի, որից հետո պետք է կատարվի նաև երկրորդ վիրահատությունը: