Փաստ ինֆո

Իրանից Հայաստան մաքսանենգ ճանապարհով` սեռական օրգանում թմրամիջոցը պահելու եղանակով տեղափոխելու համար ԻԻՀ քաղաքացի Էլհամ Շիրխանին դատապարտվեց 12 տարվա ազատազրկման, թեեւ որոշ դրվագներով արդարացվեց։

Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի դատավճռով Էլհամ Շիրխանին ճանաչվեց անպարտ և արդարացվեց 2 դրվագով՝  2013թ. հունիսի 25 –ին մաքսանենգության դրվագով՝ ՀՀ քրեական օրենսգրքի 215-րդ հոդվածի 2-րդ մասով և 268-րդ հոդվածի 3-րդ մասով  և նույն թվականի հոկտեմբերի 21-ի  դրվագով՝ ՀՀ քրեական օրենսգրքի 38-215 2-րդ մասով և 38-268-րդ հոդվածի 3-րդ մասի 2-րդ կետով առաջադրված մեղադրանքներում հանցագործության դեպքերի բացակայության հիմքերով: Նշված դրվագները վերաբերում են «մետամֆետամին» տեսակի թմրամիջոցների տեղափոխմանը։ Ըստ նախաքննական մարմնի՝ 2013թ. հունիսի 25-ին մաքսային հսկողությունից թաքցնելով, Շիրխանին Հայաստան է ներկրել «մետամֆետամին» տեսակի թմրամիջոց: Իսկ 2013թ. հոկտեմբերի 21-ին դրդել է իր ընկերոջը, ով ևս Իրանի Իսլամական հանրապետության քաղաքացի է, կոշիկի մեջ թաքցնելով Հայաստան ներկրել և իրացնել «մետամֆետամին» տեսակի թմրամիջոց:Այս դրվագներով մեղադրանքը դատարանը հիմնավոր չի համարել եւ  պարսկուհուն արդարացրել է։

Իսկ երկու այլ դրվագներով Շիրխանին մեղավոր է ճանաչվել եւ դատապարտվել 12 տարվա ազատազրկման: Գործով անցնող մյուս ամբաստանյալ Զոհրաբ Ստեփանյանն էլ մեղավոր է ճանաչվել ՀՀ քրեական օրենսգրքի 34-268-րդ հոդվածի 3-րդ մասով և դատապարտվել 3 տարի 6 ամիս ժամկետով ազատազրկման:
 
Նշենք, որ մեղադրող դատախազը միջնորդել էր ամբաստանյալ Էլհամ Շիրխանին դատապարտել 15 տարվա, իսկ Զոհրաբ Ստեփանյանին՝ 4,5 տարվա ազատազրկման:

Ամբաստանյալների պաշտպանները «Փաստինֆո»-ին տեղեկացրեցին, որ  առաջին ատյանի դատարանի դատավճիռը բողոքարկելու են վերաքննիչ դատարան:

Ըստ մեղադրանքի՝ Իրանի Իսլամական Հանրապետության քաղաքացի Էլհամ Շիրխանին, 2013 թվականի նոյեմբերի 8-ին, ՀՀ պետական սահմանի Մեղրիի մաքսակետով Իրանից ժամանելով Հայաստան, մաքսային հսկողությունից թաքցնելով, իր սեռական օրգանում` հեշտոցում պահելով, Հայաստան ապօրինի տեղափոխել է 23,67 գրամ ընդհանուր քաշով, ապահովիչի մեջ փաթեթավորված 13,744 գրամ քաշով մաքուր քաշով «մետամֆետամին», 86 հատ՝ ընդհանուր 0,43 գրամ քաշով «մեթադոն» տեսակի թմրամիջոց հանդիսացող հաբեր: Դրանք  տեղափոխել է Երևան՝ իր ծանոթին՝ Զոհրաբ Ստեփանյանին իրացնելու նպատակով:

Սակայն ըստ նախաքննական վարկածի` Զ.Ստեփանյանը  չի հասցրել թմրամիջոցները գնել, քանի որ նույն օրը ՀՀ Ոստիկանության Կազմակերպված հանցավորության դեմ պայքարի վարչության աշխատակիցները, օպերատիվ տվյալները իրացնելով, բերման են ենթարկել նրան և էլհամ Շիրխանիին, որի անձնական խուզարկությամբ թմրամիջոցները հայտնաբերվել են։ է.Շիրխանիի մոտ հայտնաբերվել են նաև հոգեմետ նյութ հանդիսացող ընդհանուր 0,39 գրամ քաշով 39 հաբ «Նորտրիպտիլին» անվանումով դեղամիջոցներ, որոնք վերջինս ապօրինի, մաքսային հսկողությունից թաքցնելով, Հայաստան էր ներկրել՝ իր կողմից օգտագործելու նպատակով:

Ըստ Զոհրաբ Ստեփանյանին առաջադրված մեղադրանքի՝ նա, 2013 թվականի օգոստոս ամսին ծանոթանալով Իրանի Իսլամական Հանրապետության քաղաքացի էլհամ Շիրխանիի հետ և տեղեկանալով, որ վերջինս զբաղվում է  թմրամիջոցների իրացմամբ, ցանկացել է նրանից ապօրինի ձեռք բերել «մեթադոն» և «մետամֆետամին» տեսակի թմրամիջոցներ։