Փաստ ինֆո

Այնտեղ, ուր  մենաշնորհներն ու դրանց ամենակարող տերերն օրեցօր հզորանում են, ուր մեծերն անհագ ախորժակով ամընդհատ կուլ են տալիս փոքրերին, շատ ավելի հեշտ է այս ամենի դեմ պայքարելու փոխարեն դատարկ հայտարարություններ անել ու դրանով արդարացնել սեփական անիմաստ գոյությունը:

Մարտի 14-ին Տնտեսական մրցակցության պետական հանձնաժողովը հրավիրել էր լրատվամիջոցներին ներկայացնելու իր կատարած աշխատանքների արդյունքները:

Ինչպես հայտարարվել է, հանձնաժողովի մարտի 14-ի  նիստի օրակարգում ընդգրկված հարցերից մեկը վերաբերել է բջջային կապի 3 օպերատորներին:  Ըստ հանձնաժողովի նախագահ Արտակ Շաբոյանի, քաղաքացիների դիմում-բողոքների հիման վրա իրենք ուսումնասիրություն են իրականացրել և խախտումներ բացահայտել «Ղ-Տելեկոմ», «ԱրմենՏել» և «Օրանժ Արմենիա» ընկերությունների կողմից USB-մոդեմի միջոցով մատուցվող ինտերնետ ծառայությունների ոլորտում: Օրինակ, պարզվել է, որ օպերատորներն արհեստականանորեն ձգձգում են պայմանագրի լուծման գործընթացը, որպեսզի ստանան եկամուտներ այն ժամանակահատվածում, երբ ծառայություններ փաստացի չեն մատուցվում: Հանձնաժողովի նախագահը նույնիսկ հայտարարել էր, թե «սա անարդար է, քանի որ քաղաքացիները չեն ստանում ինտերնետ ծառայություններ, սակայն, պարտավոր են վճարել չստացված ծառայությունների դիմաց»:

Քարոզչական ցանկալի արձագանքն այսքանով իսկ ապահովված էր: Լրատվամիջոցների վերնագրերն առավել քան խոսուն էին. «Չտրամադրած ինտերնետի դիմաց սպառողներից գումարներ են ուզել», «Բջջային 3 օպերատորները խիստ նկատողության արժանացան» և այլն:

Հանձնաժողովն իր հիմնական առաքելությունը կատարեց: Ցույց տվեց, որ աշխատում է, ու դրանով արդարացրեց իր գոյությունը մեր պետական կառավարման համակարգում: Իրերի իրական բնույթի մեջ առանձնապես չխորացող ընթերցողն ու հեռուստադիտողն էլ հավատացին, որ այսքանով ՀՀ տնտեսությունը փրկվեց:

Իրականում այս որոշման մասին ոչ միայն ՀՀ շարքային քաղաքացիներն են տեղեկացել մամուլից, այլև հենց իրենք` այն երեք ընկերությունները, որոնց հնաձնաժողովի որոշմամբ անմիջապես վերաբերում էր հանձնաժողովի ընդունած  որոշումը: Այս մասին «Փաստինֆո»-ի հետ զրույցում նշեցին, ընկերությունների ներկայացուցիչները:

«Մենք էլ ձեզ պես մամուլից ենք տեղեկացել այդ որոշման մասին»,- մեր հարցին ի պատասխան ասաց «ՎիվաՍել ՄՏՍ»-ի ներկայացուցիչը, հավելելով, թե որևէ վարչական վարույթի կամ նիստի մասին չեն ծանուցվել:

«ԱրմենՏել»-ի իրավաբանական բաժնից եւս հայտնեցին, որ վարչական վարույթի կամ նիստի մասին տեղեկացված չեն եղել եւ ինֆորմացիայի աղբյուրը մամուլն է եղել։ Ընկերություններին նիստին չհրավիրելով Արտակ Շաբոյանն, ըստ էության,  իրեն ապահովագրել է հնարավոր ընդդիմախոսներից: Խնդիրն այն է, որ օրինակ  ինտերնետի կապի ծառայության մատուցումը դադարեցնելու պահից «ԱրմենՏել»-ը գումար չի գանձում: Ինչպես պարզաբանեցին «ԱրմենՏել»-ից, բաժանորդներից գումարը գանձվում է մատուցված ծառայությունների ժամանակահատվածի համար, իսկ փաստացի ընդհատման  պահից, այսինքն՝ նախքան պայմանագրի դադարեցումը, նոր պարտք չի գումարվում։

Օպերատորներից հանձնաժողոը հարցի շուրջ որոշակի տեղեկատվություն պահանջել է, բայց, պարզվում է, սա էլ զուտ ձևի համար է արվել:

«Որոշակի պատճառաբանություններ ներկայացրել են, սակայն մենք կարծում ենք, որ դրանք հիմնավոր չեն»,- նիստի ընթացքում հայտարարեց Արտակ Շաբոյանը, փաստորեն, հաստատելով, որ որոշումը հիմնված է ոչ այնքան փաստերի, որքան իրենց անձնական կարծիքի վրա:

Այս անձնական կարծիքի հիման վրա էլ հանձնաժողովը ընկերություններին տվել է խիստ նախազգուշացում՝ խախտումը վերացնելու հանձնարարականով:

Թե ինչ խախտում պիտի վերացնեն, մեզ հետ զրույցում, բջջային 3 օպերատորներից գոնե 2-ի ներկայացուցիչները հայտարարեցին, թե չեն էլ պատկերացնում: Նախ, որովհետև, նման խախտում իրենց գործունեության մեջ չկա, երկրորդ, որովհետև հանձնաժողովի որոշումն իրենք չեն ստացել:

«ՎիվաՍել ՄՏՍ»-ի ներկայացուցիչը, մեր խնդրանքով, այդուհանդերձ, մեկնաբանեց մամուլի հրապարակումներում առկա որոշման որոշ մանրամասներ, միաժամանակ նշելով, թե քանի որ իր դատողություները հիմնված են բացառապես մամուլի հրապարակումների վրա, դրանք հնարաոր է և վերաբերելի չլինեն հանձնաժողովի իրական որոշմանը, որն, ինչպես նշեցինք, իրենք դեռ չեն ստացել:

«Կա օրենքի պահանջ, և ՎիվաՍելը խստորեն հետևում է դրան: Մասնավորապես՝ . ծառայությունների կասեցման պահից բաժանորդից որևէ գումար չի գանձվում: Պարզեպոս լուրջ չէ ենթադրել, որ օպերատորները կարող են արհեստականորեն ձգձգել բաժանորդի պայմանագրի լուծումը՝ չմատուցված ծառայությունների դիմաց գումար գանձելու ակնկալիքով», - նշեց մեր զրուցակիցը: «Օրենքը նախատեսում է, որ խախտման դեպքում որպես պատասխանատվության միջոց հնաձնաժողովի որոշմամբ կարող է տրվել նախազգուշացում: Նման որոշումը կարող է կայացվեր վարչական վարույթի արդյունքում, սակայն մենք չենք ծանուցվել վարչական վարույթի մասին, ինչպես նաև տեղյակ չենք, թե ինչ խախտման մասին է խոսքը»,- ասաց ընկերության ներկայացուցիչը:

Իսկ հանձնաժողովը, հիշեցնենք, վարույթ չի հարուցել, այլ ուղղակի ուսումնասիրություն է արել: Առնվազն անհասկանալի է, եթե հանձնաժողովի ուսումնասիրությունը խախտում է բացահայտել, եթե հանձնաժողովում բացահայտել են, թե  ինչպես են օպերատորները անհիմն գանձումներ անում բաժանորդներից, ապա ինչու, ի վերջո հանձնաժողովը վարույթ չի հարուցել և օրենքով նախատեսված պատասխանատվության չի ենթարկել օրինախախտներին: Ստացվում է կամ խախտումն այնքան էլ հիմնավոր չի եղել, կամ հանձնաժողովը վարույթ չի հարուցել, հետագա բարդություններից խուսափելու համար: Չկա վարույթ, չկա որոշում, հետևաբար չկա նաև այն բողոքարկելու իրավական կարգ:

Այսինքն, հանձնաժողովի նախագահը կարող է անել պոպուլիստական հայտարարություններ, բարձրացնել սեփական վարկը տնտեսվարող ընկերությունների վարկի հաշվին, և վերջինները դրա դեմ չեն էլ բողոքի:
Հանձնաժողովը ստանձնել է սպառողների շահերի պաշտպանի դերը, որն, ի դեպ, հանուն ճշմարտության ասենք, իր գործառույթների թվում է: Եվ սա թերևս գովելի կլիներ, եթե հանձնաժողովն իր այս գործառույթն իրականացներ չմոռանալով իր մյուս` ոչ պակաս կարևոր գործառույթների մասին ևս:

Առնվազն տարօրինակ է որ մենաշնորհների տակ կքած մեր տնտեսության մեջ այս պետական կառույցը վաղուց արդեն ոչ մի հակամրցակցային երևույթ չի գտել: Մեր շուկայում, որտեղ մի գիշերվա մեջ կարող են բարձրանալ տարբեր ընկերություների ներկրած միևնույ ապրանքների գները, ընդ որում, հենց նույն չափով, այս պետական կառույցը հակամրցակցային համաձայնությունների հոտ անգամ չի առնում, ու մի երկրում, որի նույնիսկ շարքային քաղաքացիներն են անվրեպ հասկանում, թե որ խոշոր խաղացողները ու ինչ մեթոդներով են շուկայից դուրս մղում իրենց խանգարող փոքրերին, այս մարմինն այդ ամենին այդպես էլ անհաղորդ է մնում: Առնվազն տարօրինակ է:
Այս ամենով հանդերձ, ՏՄՊՊՀ-ն պետական համակարգի մի մասն է, և պարտավոր է ինչ-որ կերպ արդարացնել իր գոյությունն ու գործունեությունը, չմոռանանք նաև մեր`  ՀՀ հարկատումներիս պետությանը վճարած գումարների հաշվին: Իսկ դրա լավագույն տարբերակը դատարկաբանությունն է, կամ շարքային պոպուլիզմը, ինչն էլ հերթական անգամ արվեց հենց մարտի 14-ին հրավիրված նիստում: