Փաստ ինֆո

Ըստ Ալումյանի՝  նախաքննությունն ընթանում է Զինվորական դատախազի կողմի ի սկզբանե նախանշված ճանապարհով։ Ի հիմնավորումն՝ փաստաբանը նշեց, Զինվորական դատախազ Գևորգ Կոստանյանը դեռեւս տեղեկություններ չունենալով  գործի մանրամասների մասին  արդեն հեռու գնացող հայտարարություններ էր  անում:

Նշենք, որ 4 օր առաջ Արտակ Բուդաղյանի փաստաբանը  միջնորդություն է ներկայացրել իր պաշտպանյալի նկատմամբ քրեական հետապնդումը դադարեցնելու վերաբերյալ:

Ինչ վերաբերում է շրջանառվող այն լուրերին,  որ Սուրիկ Խաչատրյանը եղել է պատշգամբում և որ ինքն է կրակել, Հայկ Ալումյանը նշեց. «չի կարելի ասել, որ դրանք օդի մեջ ասված բաներ են և հիմքեր չկան,  չի կարելի նաև ընկնել ծայրահեղության մեջ, հայտարարություններ անել կասկածի տակ դնելով որևէ մեկի անմեղության կանխավարկածը և եթե ես ասում եմ, որ տեսանյութը մոնտաժված է նկատի չունեմ,  որ չմոնտաժված տեսանյութում պատշգամբում երևում է  Սուրիկ Խաչատրյանը»:

Ի դեպ նշենք, որ մինչ այս պահը գնդապետ Արտակ Բուդաղյանը ցուցմունք է տվել հոսպիտալում՝ 2 անգամ, ընդ որում նա այդ ժամանակ գտնվել է ծանր հոգեկան և ֆիզիկական վիճակում:

Չնայած նրան, որ Գլխավոր դատախազությունը փաստաբանի դիմումին դեռ պաշտոնական պատասխան չի տվել, սակայն որոշ լրատվամիջոցներում մեկնաբանություններ եղել են հարցի հետ կապված, ինչը փաստաբանը որակեց, ոչ թե մերժողական այլ  «ծաղրողական»:

«Եվ եթե Գլխավոր դատախազությունը չնշի,թե որ օրենքով Զինդատախազը նման լիազորություններ ունի, ես պարզապես կհայտարարեմ և կհիմնավորեմ, որ Զինդատախազն անցնում է իր լիազորությունների սահմանները»,- ասաց Հայկ Ալումյանը:

Անդրադառնալով միջադեպի փաստաբանի խոսքով  ոչ մոնտաժված տեսանյութին՝ վերջինս նշեց, որ այդ տեսանյութերի բնօրինակները կան առնվազն 2 վայրում՝ քննությունը կատարող մարմնի և տեսանյութը մոնտաժողի մոտ:

Ինչ վերաբերում է Սուրիկ Խաչատրյանի տան խուզարկությանը, այս դեպքում էլ Ալումյանը կարծում է, որ այն կատարվել է օրենքի կոպիտ խախտումներով, ինչն էլ հնարավություն է տվել չգրանցված զենքը թաքցնել: Հարցի հետ կապված փաստաբանը դիմել է Հանրապետության ոստիկանապետին՝ ծառայողական քննություն կատարելու խնդրանքով: