Փաստ ինֆո

ՀՀ Գեղարքունիքի մարզի ընդհանուր իրավասության դատարանը՝  դատավոր Յուրիկ Իսկոյանի նախագահությամբ, ՀՀ ՊՆ N զորամասի պարենային պահեստի պահեստապետ, ենթասպա Կարեն Թադևոսյանին հանցավոր է ճանաչել յուրացման փորձ կատարելու մեջ և  դատապարտել տուգանքի 500 000  ՀՀ դրամի չափով:

Իրեղեն ապացույց ճանաչված սննդամթերքը, որն ամբաստանյալից անկախ պատճառով չի հաջողվել  յուրացնել՝ 75կգ ռագուն, 201.6կգ մսաբուսական պահածոն, 30կգ շաքարավազը (անհատական), 9.7 կգ մարինադը, 300 հատ ծխախոտը, 50կգ ալյուրը, 16կգ պանիրը, 6կգ արագ պատրաստվող փլավը, 80 հատ ձուն, 20 կգ հաճարը, 23 հատ խտացրած կաթը, 5 կգ մարգարինը, 5 կգ կարագը, 10 հատ ձկան պահածոն, 4.7 կգ մսի պահածոն, 3 կգ ոլոռը, 5 հատ բուսական յուղը, 20 կգ աղը, 9 հատ օշարակը, 1կգ թեյը, 5-ական կգ մակարոնն ու  սպիտակաձավարը, դատավճռով  թողնվել է  զորամասի տնօրինությանը:

Ըստ ՀՀ քրեական օրենսգրքի 34-179 հոդվածի 2-րդ մասի 1-ին կետով առաջադրված մեղադրանքի, պայմանագրային հիմունքներով ծառայող Կարեն Թադևոսյանը՝  օգտագործելով իր պաշտոնեական դիրքը, 2012թ. հոկտեմբերի 1-ից մինչև 28-ը ընկած ժամանակահատվածում իր պատասխանատվության տակ գտնվող,  իրեն վստահված զորամասի պարենային պահեստից յուրացման նպատակով ստեղծել է զգալի չափերով` 411 900 ՀՀ դրամ արժողությամբ  սննդամթերքի ավելցուկ և այն հետագայում յուրացնելու նպատակով տեղափոխել ու թաքցրել է պարենային պահեստին հարակից շինությունում, սակայն իր կամքից անկախ հանգամանքներով հանցագործությունն ավարտին չի հասցրել:

Մինչ դատաքննությունը սկսելն ամբաստանյալ Կարեն  Թադևոսյանը միջնորդել էր  դատական քննությունն անցկացնել արագացված կարգով՝  հայտարարելով, որ  առաջադրված մեղադրանքն իրեն պարզ է, համաձայն է մեղադրանքի հետ: Դատարանը բավարարել էր միջնորդությունը:

Պատիժ նշանակելիս դատարանը հաշվի էր առել, որ ամբաստանյալն անկեղծորեն զղջացել է կատարած հանցավոր արարքի համար, նախկինում դատված և արատավորված չի եղել, խնամքին են գտնվում 14 տարին չլրացած երկու երեխաները, 2-րդ խմբի հաշմանդամ մայրը տառապում է չարորակ ուռուցքով, խնամքին են գտնվում նաև կինն ու  եղբայրը: