Փաստ ինֆո

Հայաստանի Հանրապետության վերահսկիչ պալատը (ՎՊ) որոշել է այս տարի վերահսկել նաև բնապահպանության ոլորտը` սկսելով 2 ուղղությունից.

1. Խոսրովի արգելոցի պահպանության, գիտական ուսումնասիրությունների, անտառատնտեսական աշխատանքների ծառայություններ:
2. Բնապահպանական պետական տեսչության աշխատանքների օրինականությունն ու արդյունավետությունը:

Վերահսկողությունն իրականացվելու է հետևյալ ուղղություններով` մթնոլորտային օդի պահպանություն, ջրային ռեսուրսների օգտագործում և պահպանություն, հողերի պահպանության, ընդերքի օգտագործում և պահպանություն, կենդանական և բուսական աշխարհի օգտագործում և պահպանություն, վտանգավոր նյութեր և արտադրության ու սպառման թափոններ, բնապահպանական և բնօգտագործման վճարներ:

Ս.թ. փետրվարի 8-ին բնապահպանական հասարակական կազմակերպությունների ներկայացուցիչների հետ հանդիպման ժամանակ տեղեկացնելով այս մասին, ՎՊ-ի նախագահ Իշխան Զաքարյանը պարզաբանել է, որ բնապահպանության ոլորտում առկա խնդիրների հասարակական հնչեղությունը հաշվի առնելով, հիշյալ խնդիրների նկատմամբ վերահսկողությունը ներառվել է պալատի 2013 թ. գործունեության տարեկան ծրագրի աշխատանքային պլանում: Ըստ պալատի նախագահի, վերոնշյալ ստուգումները հնարավորություն կտան մտնել բնապահպանական ցանկացած ոլորտ:

Ի. Զաքարյանի հավաստմամբ, որոշ պաշտոնյաներ պատասխան են տալու Նուբարաշենի աղբավայրում մեթանից էլեկտրաէներգիա ստանալու ճապոնական ծրագրի ձախողման և նրա համար, որ 53 հեկտարի փոխարեն, ճապոնական կողմին աղբավայրից հատկացվել ընդամենը 7 հա տարածք:

Համապատասխան մոտեցման պարագայում բնապահպանները պատրաստ են համագործակցել, ինչի մասին հայտնել են հիշյալ կառույցի ղեկավարին: Նրանք առաջարկել են վերահսկողություն իրականացնել հատկապես Թեղուտի հանքավայրի շահագործման օրինականության, բազմաբնույթ նախագծերին «Բնապահպանական փորձաքննություն» ՊՈԱԿ-ի կողմից տրվող դրական եզրակացությունների համապատասխանության, Խոսրովի արգելոցի Գիլանի տեղամասում ապօրինի կառույցի առկայության և այլ խնդիրների նկատմամբ: Նաև հավաստել են, որ ոլորտում անօրինություններին վերջ տալու ժամանակն է, այլապես վաղն ուշ կլինի: Ճշտենք, որ որոշ հարցերում, օրինակ, Սևանա լճի սիգի արդյունագործական ձկնապաշարների ոչնչացման, արդեն ուշ է:

Բնապահպան Լևոն Գալստյանի տեղեկացմամբ, պալատի նախագահ Իշխան Զաքարյանը չի ժխտել այն միտքը, որ բնապահպանության ոլորտի առանձին ուղղություններում պետական քաղաքականությունը, ըստ էության, ձախողված է:

Ըստ Կանաչների միության նախագահ Հակոբ Սանասարյանի, միայն Հրազդանի, Հանքավանի և Թեժ սարի հանքերը շահագործելու հետևանքով կվտանգվի ամբողջ Արարատյան դաշտը:
ՎՊ-ի նախագահն առաջարկել է, որ բնապահպանական վերահսկողություն իրականացնող հանձնախմբի աշխատանքներին մասնակցեն նաև ոլորտի հասարակական թևի ներկայացուցիչները: Մնացյալը ցույց կտա ժամանակը:

Հեղինակ` Արթուր Հովհաննիսյան