Փաստ ինֆո

Փետրվարին նախատեսված ընտրությունների կապակցությամբ ԵԱՀԿ-ը և ԵՄ-ն ՀՀ իրավապահ մարմինների աշխատակիցներին ուսուցանում են ընտրակեղծիքների գործերի քննության առանձնահատկությունները: Երևանում այսօր մեկնարկեց ընտրակեղծիքների և կոռուպցիայի գործերի քննության թեմայով Հայաստանի իրավապահ մարմինների աշխատակիցների համար նախատեսված եռօրյա դասընթացը:

Հայաստանում ԱՄՆ դեսպանատան հետ համագործակցությամբ և Եվրամիության ֆինանսական աջակցությամբ ԵԱՀԿ երևանյան գրասենյակի կազմակերպած հիշյալ միջոցառմանը մասնակցում են մոտ 60 դատախազներ ու փաստաբաններ, ինչպես նաև հասարակական կազմակերպությունների ներկայացուցիչներ, որոնք ակտիվորեն ներգրավված են ընտրությունների գործընթացին:

Սեմինարի ընթացքում քննարկվելու են ընտրությունների հետ կապված հանցագործությունների գործերի քննությունը, ինչպես նաև քաղաքացիական գործերի շրջանակներում ընտրական խախտումների լուծման հնարավոր միջոցները, այդ թվում` ընտրությունների հետ կապված բողոքները: Ընտրությունների վերաբերյալ բողոքներին ուղղակիորեն առնչվող համապատասխան մարմինների ղեկավարները միջոցառման ընթացքում ներկայացնելու են իրենց տեսակետները հնարավոր ընտրական հանցագործություններին պատշաճ դատախազական արձագանքի վերաբերյալ:

«Այս միջոցառումը նպատակ ունի աջակցելու ընտրակեղծիքների վերացմանն ուղղված Հայաստանի իշխանությունների շարունակական ջանքերին և ապահովել լիարժեք համապատասխանություն միջազգային ջանքերին,- ասաց ԵԱՀԿ երևանյան գրասենյակի ղեկավարի տեղակալ Վիլյամ Հանլոնը։ - Հուսով եմ, որ փորձի փոխանակումը օգտակար կլինի մասնակիցների համար փետրվարին կայանալիք նախագահական ընտրությունների ընթացքում հնարավոր խախտումների դեմ պայքարելու հարցում»:

Ըստ ՀՀ գլխավոր դատախազ Աղվան Հովսեփյանի, այսօր իշխանությունները հիմք ընդունելով նախկին փորձը, ամեն ինչ անում են, ստեղծել են բոլոր նպաստավոր պայմանները, որպեսզի ունենանք բացառիկ ընտրություններ մեր անկախության այս ամբողջ ընթացքում:

- Հայաստանի իրավական համակարգը լուրջ խնդիրներ ունի լուծելու, հիմնականում պետք է ապահովի ընտրությունների օրինականությունը` իր գործառույթների շրջանակում,- ասաց Ա. Հովսեփյանը և հավելեց, որ իրավապահ ոլորտը, նախևառաջ, պետք է համապատասխան պայմաններ ապահովի, որպեսզի ընտրողները կարողանան ազատ, առանց խոչընդոտների, անարգել իրականացնել իրենց ընտրական իրավունքը:

Բացի վերոնշյալից, իրավապահ ողջ համակարգը համատեղ պետք է իրականացնի համապատասխան միջոցառումներ, որպեսզի կանխի ընտրախախտումները: Դա շատ էական է, որովհետև կանխելն ավելի կարևոր գործ է, քան հետագայում ստիպված լինելը այդ հանցագործությունները բացահայտել և պարզել մեղավորներին:

Գլխավոր դատախազը կարևորեց նաև ընտրախախտումներ վերաբերյալ հաղորդումների, դիմումների, ահազանգերի գրանցումը և հաշվառումը, դատավարական համապատասխան ընթացքով դրանց լուծումը և, ի վերջո, օրինական որոշումներ կայացնելը, ինչպես նաև իրենց իրականացրած ողջ գործառույթների թափանցիկության ապահովումը, ինչը կատարվելու է հանրությանը լայնածավալ իրազեկմամբ:

ՀՀ արդարադատության նախարարի կարծիքով, լավ, ժողովրդավարական ընտրություններ անցկացնելու համար անհրաժեշտ են երեք նախապայման` ընտրական օրենսդրությունը, որը նախկինի համեմատ բարեփոխված է, կա առաջընթաց, հասարակության քաղաքական-իրավական կուլտուրայի որոշակի աստիճանը, որպեսզի հասկանանք ընտրությունների դերը, նշանակությունը մեր կյանքում (Հ. Թովմասյանի հավաստմամբ, այս առումով, ցավոք, դեռ բոլոր հարցերը լուծված չեն), ինչպես նաև իշխանությունների քաղաքական կամքը` երկրում անցկացնելու ժողովրդավարական ընտրություններ: Ինչպես արդարադատության նախարարը նշեց, այս վերջինի դրսևորումները թե օրենսդրական, թե գործնական այն քայլերն են, որոնց մենք այսօր ականատես ենք լինում:

- Ոստիկանությունը լիարժեք վերցնում է իր վրա ամբողջ պատասխանատվությունը իր լիազորությունների սահմաններում,- մեկ անգամ ևս հայտարարեց ՀՀ ոստիկանապետ Վլադիմիր Գասպարյանը և հավելեց, որ բոլոր ընտրատեղամասերում արդեն կատարված են որոշակի պատասխանատուների նշանակումները:

ԿԸՀ-ի նախագահ Տիգրան Մուկուչյանն իր հերթին հավաստեց, որ բոլոր դիմումներին պատշաճ ընթացք կտրվի, հանձնաժողովի բոլոր որոշումները կլինեն պատճառաբանված: Նա տեղեկացրեց նաև, որ արդեն սկսվել է ընտրատարածքային ընտրական հանձնաժողովների անդամների ուսուցման գործընթացը:

-«Հայաստանի Հանրապետության հատուկ քննչական ծառայության մասին» օրենքի 2-րդ հոդվածի համաձայն` ծառայությունն իրականացնում է նաև ընտրական գործընթացների հետ կապված քրեական գործերով նախաքննություն,- ասաց ՀՔԾ պետ Անդրանիկ Միրզոյանը և թվարկեց այդ առումով ծառայության լիազորությունները, որոնք վերաբերում են ՀՀ քր. օր.-ի հոդվածներից չորսով քրեական գործերի հարուցմանը և քննությանը:

Ա. Միրզոյանը նշեց նաև, թե ինչ է անհրաժեշտ բարեփոխել ՀՀ քրեական օրենսգրքում, որպեսզի ընտրակաշառք տալու հետ կապված բացահայտումները չդժվարանան: