Փաստ ինֆո

Երևանի Ավան և Նոր Նորք վարչական շրջանների ընդհանուր իրավասության դատարանը` նախագահությամբ դատավոր Սամվել Ուզունյանի, քիչ առաջ ավարտել է ավազակային հարձակման փաստով հարուցված և ՀՀ զինվորական դատախազությունից ստացված քրեական գործով հերթական դատական նիստը:

Վարդան Սարգսյանին, Դավիթ Սարգսյանին, Ռադիկ Հովագիմյանին, Գևորգ Աբրահամյանին և Գևորգ Հովակիմյանին մեղադրանք է առաջադրվել այն բանի համար, որ Վարդան Սարգսյանն ունենալով ֆինանսական մեծ պարտքեր և համաքաղաքացի, ՀՀ ոստիկանության զորքերի թիվ 1033 հատուկ միջոցների կիրառման վաշտի հրաձիգ, կրտսեր սերժանտ Գևորգ Հովակիմյանից տեղեկացված լինելով ՀՀ ՈԶ թիվ 1033 զորամասի աշխատավարձերի կանխիկ բաժանման, ինչպես նաև այն մասին, որ աշխատավարձերը բերվում է 3 անձանց ուղեկցությամբ «Գազ 24-10» մակնիշի ավտոմեքենայով, եղբոր` Դավիթ Սարգսյանի հետ մտադրվել են իրականացնել ավազակային հարձակում և հափշտակել այդ գումարը:

Վերոնշյալի նպատակով Վ. Սարգսյանը 2011թ. մարտին ստեղծել է կազմակերպված կայուն խումբ` իր ծրագրի մասին տեղեկացրել է իրեն պատկանող «Դ և Վ» տաքսի ծառայության վարորդ Ռադիկ Հովագիմյանին, վերջինիս որդուն` ՀՀ ՈԶ 1033 զորամասի պայմանագրային զինծառայող Գևորգ Հովակիմյանին, համաթաղեցի, իրենց մտերիմ` Գևորգ Աբրահամյանին, և ստանալով նրանց համաձայնությունը, ավազակությամբ հափշտակել է թիվ 1033 զորամասի աշխատավարձերի առանձնապես խոշոր չափերի հասնող գումարը:

Ըստ մեղադրական եզրակացության, ավազակային հարձակումն իրականացնելու նպատակով ձեռք են բերել ավտոմեքենա, զենք, դիմակներ, կատարել են դերաբաշխում, ապա հետևել են Գազ 24-10 ավտոմեքենային և դարանակալել:

27.04.201 թ. հերթական դարանակալման ժամանակ տեսնելով, որ «Գազ 24-10» մակնիշի, 62 ՍՍ 243 պետհամարանիշի ավտոմեքենան դուրս է եկել զորամասի տարածքից և այնտեղ, բացի վարորդից, գտնվում են 2 կին և 1 տղամարդ, հասկացել են, որ նրանք ուղևորվում են գումարը բերելու: Ժամը 13:30-ի սահմաններում ՀՀ ՈԶ թիվ 1033 զորամասի հաշվապահ Լյուդմիլա Սաֆարյանը, գանձապահ Ռուզաննա Ասատրյանը, նույն զորամասի սպա Կարեն Աթիկյանը և ենթասպա Ալեքսանդր Դեմիրխանյանը վերջինիս վարած «Գազ 24-10» մակնիշի հիշյալ ավտոմեքենայով զորամասի աշխատավարձը (93 720 000 դրամ գումարը) հաշվապահությունից ստանալուց հետո, ուղևորվել են թիվ 1033 զորամաս:

Տեղափոխվող գումարը ավազակությամբ հափշտակելու համար պայմաններ ստեղծելու նպատակով, Գևորգ Աբրահամյանն իր վարած «Մոսկվիչ 21412» մակնիշի ավտոմեքենան դիտավորությամբ դուրս է բերել հանդիպակաց երթևեկելի ուղեմաս և բախվել «Գազ 24-10» մակնիշի ավտոմեքենային: Բախման հետևանքով Դեմիրխանյանը կանգնեցրել է իր վարած ավտոմեքենան, իսկ Գ. Աբրահամյանը, ըստ մշակված ծրագրի ցանկանալով գրավել ուղևորների ուշադրությունը և նրանց վախեցնելու նպատակով աղաղակել է, թե մեքենայում դրված գազի բալոնը կպայթի, ապա ոտքով դիմել է փախուստի: Այդ պահին Ռ. Հովագիմյանն իր վարած «ՎԱԶ 2107» մակնիշի ավտոմեքենայով մոտեցել է «Գազ 24-10» մեքենային, դրանից իջել են Վարդան և Դավիթ Սարգսյաններն ու «Գազ 24-10» ավտոմեքենայի ուղևորների դիմադրությունը կոտրելու և նրանց պահպանության տակ գտնվող գումարը հափշտակելու նպատակով, նրանց կյանքի և առողջության համար վտանգավոր բռնություն գործադրելու սպառնալիքով, իրենց մոտ եղած 1 հատ գազային և 1 հատ օդամղիչ ատրճանակներն ուղղել են նրանց վրա:

Դարձյալ մեղադրական եզրակացության համաձայն` Դեմիրխանյանը գումարի անվտանգ տեղափոխման համար հատկացված ինքնաձիգն ուղղել է հանցագործների վրա, իսկ Ռ .Հովագիմյանն իր վարած «ՎԱԶ 2107» մակնիշի ավտոմեքենայով դիտավորությամբ վրաերթի է ենթարկել Դեմիրխանյանին ու դիմել փախուստի: Վ. և Դ. Սարգսյանները, հանդիպելով մեքենայի ուղևորների դիմադրությանը, չկարողանալով գումարը հափշտակել, դիմել են փախուստի: