Փաստ ինֆո

Դեռևս նախորդ տարի նոյեմբերի 25-ին Վերին Շենգավիթում 37-ամյա կնոջ դանակահարության գործով  նախաքննությունն ավարտվել է եւ գործը գտնվում է դատարանում:

Ավելի վաղ տեղեկացրել էինք, որ 37-ամյա կինը և 34-ամյա Արամը 2014 սկզբներից մինչև 2016թ. սեպտեմբեր ամիսը գտնվել են փաստացի ամուսնական հարաբերությունների մեջ:

Երկուսն էլ Երևան են տեղափոխվել մարզից, մահացած կինը ծնունդով Արմավիրի մարզից էր, իսկ Արամը՝ Արարատի մարզից: Սենյակներ են վարձել նույն տանը։ Վարձակալները  պարզել են, որ երկուսն էլ աշխատում են նույն հյուրանոցում, կինը որպես հավաքարար, իսկ տղամարդը՝ անվտանգության աշխատակից, մտերմացել են ու մի առ ժամանակ համատեղ բնակվել։ Համատեղ կյանքի ընթացքում հաճախ վիճաբանություն է առաջացել եւ ի վերջո բաժանվել են, սակայն վեճերը չեն դադարել։                     

Մեր տեղեկություններով՝ վեճերի պատճառներից մեկը եղել է նաեւ խանդը. Նախկին ընկերուհին խանդել է Արամին՝ մեկ այլ կնոջ հետ հարաբերություններ սկսելու համար։  

Եվ հերթական անգամ,  37-ամյա կինը մի քանի անգամ զանգահարել է Արամին, ով ընկերոջ հետ գտնվել է մայրաքաղաքի ակումբներից  մեկում և չի պատասխանել նրա զանգերին։ Տուն վերադառնալուց հետո, խանդի հողի վրա առաջացած վիճաբանության ժամանակ, Արամը բազմաթիվ հարվածներ է հասցրել նախկին ընկերուհուն, ապա նաև՝ խոհանոցային դանակով հարվածել աջ ազդրին: Գիտակցելով տեղի ունեցածի լրջությունը՝ տղամարդը օգնության է  կանչել  իր նոր ընկերուհուն և շարֆով կապել են նախկին ընկերուհու  վնասված ոտքը, ապա առաջարկել են շտապօգնություն կանչել, սակայն տուժած կինը հրաժարվել է, որից հետո նրանք հեռացել են:

 Արդյունքում՝ կորցնելով մեծ քանակության արյուն, կինը մահացել է։ Ըստ դիակի դատաբժշկական փորձաքննության՝ ստացած վնասվածքների պատճառով  նրան անզգուշությամբ  մահ է  պատճառվել:

Արամին մեղադրանք է առաջադրվել  ՀՀ քրեական օրենսգրքի 112-րդ հոդվածի 2-րդ մասի 14-րդ կետով և նրա նկատմամբ որպես խափանման միջոց է ընտրվել կալանավորումը:

Աղբյուր` Փաստինֆո