Փաստ ինֆո

Սիրիայի խորհրդարանում համայնքի թեկնածուն, ընդհանրապես, ընտրվում է Հալեպից, Դամասկոսից. Առաջադրվում են անկախ թեկնածուներ»,- «Փաստինֆո»-ին ասաց Սիրիայի հայ համայնքի միասնական թեկնածու Մարիա Գաբրիելյանը։ Ինչպես արդեն հայտնել ենք՝ վերջինիս թեկնածությունը պաշտպանել են Հալեպի Հայ առաքելական, կաթոլիկե եւ ավետարանչական եկեղեցիների հոգեւոր առաջնորդները։

Մարիա Գաբրիելյանը լրագրող և իրավաբան է, ով Սիրիայի պատերազմի ընթացքում ակտիվ լուսաբանում էր համայնքի խնդիրները։

Սիրիայի խորհրդարանն ունի 250 պատգամավոր, որը ներառում է 14 նահանգներից ընտրվող պատգամավորներին։ Խորհրդարանի շուրջ 66 %-ը Պաաս կուսակցության անդամներն են, 7%-ը՝ ազգային ճակատի կուսակցություններ, իսկ 27%-ը՝ անկախ պատգամավորներ են։

Սիրիայի վերջին պատերազմից հետո արձանագրված հիմնական փոփոխությունը համեմատաբար կայունութունն է։ Մ. Գաբրիելյանի փոխանցմամբ՝ 2012-2016 թթ. Հալեպում շատ վատ ժամանակաշրջան էր, հնարավոր չէր փողոցով հանգիստ քայլել և երթևեկել, ամեն վայրկյան կարող էր պայթյուն լինել, կրակոցներ։

«Շատ անգամ, տանից դուրս գալով, չգիտեինք՝ վերադառնալու ենք, թե ոչ։ 2017 թվականից հետո իրավիճակը բարելավվել է, քաղաքն ավելի ապահով է, անդորրը վերականգնվել է, թեև երբեմն ծայրամասերում պայթյուններ լինում են, դրանք զինված ահաբեկչական խմբավումների կողմից դրված ականներն են», - ասաց Գաբրիելյանը՝ բարձր գնահատելով Հայաստանից Հալեպ ուղարկված մարդասիրական խմբի կատարած աշխատանքները։ «Հսկայական աշխատանք է կատարվել։ Ականազերծման առաքելության նախկին պատասխանատու, գնդապետ Արկադի Տոնոյանն այս բնագավառում Հալեպում վեց տարի նվիրական աշխատանք ծավալեց, որի շնորհիվ հայության ու Հայաստանի անուններն արեգակ փայլեցին», - ասաց Գաբրիելյանը։

Այս պահին Հալեպահայ համայնքի կողմից միասնական պատգամավորի թեկնածու լինելը մեր զրուցակիցը լինելը որակեց ծայրահեղ պատասխանատվություն։ Նրա փոխանցմամբ՝ չափազանց կարևոր խորհրդարանական ընտրություններ են սպասվում՝ համեմատաբար կայունացած ժամանակաշրջանի համար։

Վերադարձը՝ նախապատերազմյան երկրի կայունությանը՝ տնտեսական ու քաղաքական առումով, ըստ Մարիայի, դեռ երազանքի նման է։ «Պատերազմի տարիներին երկրի ենթակառույցները քանդվել են, գործարանները կողոպտվել Թուրքիայի կողմից։ Սարսափելի սղաճ է աշխատավարձի, եկամտի ու ծախսի մեջ կա հսկայական վիհ՝ անհամապատասխանություն։ Քաղաքական առումով այսօր շատ բան է փոխված»,- նշեց մեր զրուցակիցը՝ ավելացնելով, որ անցած տարվա ամենակարևոր իրադարձություններից մեկն այն էր, որ Սիրիան, մեկ տասնամյակ անց, վերադարձավ Արաբական պետությունների Լիգա, սկսեց կրկին մասնակցել նիստերին։ Միաժամանակ արաբական և ոչ արաբական երկիրներ ուղղակիորեն թե անուղղակիորեն վերականգնում են իրենց դիվանագիտական հարաբերությւնները Սիրիայի իշխանությունների հետ։ Կա քննարկում անգամ Սիրիա-Թուրքիա հարաբերութունները վերակենդանացնելու ուղղությամբ, սակայն Սիրիան ունի նախապայման, այն է՝ Թուրքիան պետք է վերադարձնի Սիրայի Արաբական Հանրապետության օկուպացրած հողատարծքները։ Պատգամավորի թեկնածուի գնահատմամբ՝ Սիրիայի քաղաքական այսօրվա դաշտը տարբերվում է նախորդ տարիներից։ Փորձագետների կարծիք կա, որ Սիրիայի՝ աշխարհաքաղաքական դիրքավորման թղթածրարի հանգուցալուծումը հասունացել է և 2025 թվականին զգալի բարեփոխում կլինի։ Ինչ վերաբերում է Իսրայելա-պաղեստինյան պատերազմին, ապա, նրա խոսքերով, այն իր վատ ազդեցությունն է գործում է նաև Սիրայի վրա. Իսրայելը մերթընդմերթ ռմբակոծում է Սիրիայի տարբեր տարածքները՝ պատճառելով մարդկային եւ նյութական կորուստներ։

Նշենք, որ Սիրիայի խորհրդարանական ընտրություններում, բացի հայ համայնքի միասնական թեկնածուից, առաջադրվելու մասին հայտնել է եւս մեկ հայ թեկնածու, սակայն բացառված չէ, որ լինեն նաեւ այլ հայ թեկնածուներ։

Աղբյուր` Փաստինֆո