Փաստ ինֆո

Բելոռուսի հետ հարաբերությունները վաղուց էին փչացած, այլ հարց է, որ եթե պետությունների միջև հարաբերությունները փչացած են լինում, ապա պետությունների ղեկավարները փորձում են դրանք կարգավորել, ոչ թե հիստերիկ, ոչ ադեկվատ, էմոցիոնալ հայտարարություններով դրանք էլ ավելի սրել։ Դա դիվանագիտական լեզու չէ և դա քաղաքական լեզու չէ։ Այս մասին «Փաստինֆոյի» հետ զրույցում ասաց քաղաքական վերլուծաբան Արմեն Բաղդասարյանն՝ անդրադառնալով Նիկոլ Փաշինյանի հայտարարությանը, թե ինքը և ՀՀ որևէ բարձրաստիճան պաշտոնյա այլևս Բելոռուս չի այցելի, քանի քանի դեռ Լուկաշենկոն է այդ երկրի ղեկավարը։

«Կան պրոբլեմներ եւ պետք է հասկանալ այդ պրոբլեմների պատճառները, փորձել դրանք կարգավորել, ոչ թե նեղացած օրիորդի կեցվածքով խռովել։ Միջազգային հարաբերություններում դա չի աշխատում»,- ասաց վերլուծաբանը։

Դիտարկմանը, որ, օրինակ, չնայած Թուրքիայի հետ դարավոր ու ավելի խոր թշնամական հարաբերություններին՝ փորձ է արվում հարաբերություններ հաստատել ու բանակցություններ վարել, Ադրբեջանի հետ ենք բանակցում, իսկ Բելառուսի հետ բանակցելու ցանկություն չունենք՝ Բաղդասարյանը պատասխանեց, որ Փաշինյանը դա անում է, քանի որ իր արտաքին քաղաքականության հիմնական գաղափարը արևմուտքի հետ հարաբերությունները կարգավորելն ու Ռուսաստանի հետ հարաբերությունները խզելը։ «Քանի որ Բելոռուսը ռուսական ծիրում է՝ դրա համար էլ այդ քաղաքական բևեռի հետ հարաբերությունները խզում է, իսկ Արևմուտքի հետ հարաբերությունները փորձում կարգավորել, սա է պատճառը, որ Նիկոլ Փաշինյանի իշխանությունը գերադասում է Թուրքիայի հետ աշխատել, իսկ Բելառուսի հետ՝ ոչ»։

Անդրադառնալով ՀԱՊԿ-ի վերաբերյալ Փաշինյանի հայտարարություններին, թե հաջորդ քայլը լինելու է ՀԱՊԿ-ից դուրս գալը, իսկ թե երբ՝ կորոշենք՝ Բաղդասարյանն ասաց, որ Նիկոլ Փաշինյանը փոքր ինչ չափազանցնում է, երբ ասում է, որ մենք կորոշենք, թե երբ դուրս կգանք ՀԱՊԿ-ից։

«Ավելի հավանական է, որ երբ իրեն կասեն, որ ինքը պետք է ՀԱՊԿ-ից դուրս գա, ինքը դուրս կգա։ Այնպես չէ, որ ինքն այդ որոշումը կայացնելու է միանձնյա և ինքնագլուխ, նման աշխարհաքաղաքական հարցերում՝ նա ակնհայտորեն առաջնորդվում է դրսի հրահանգներով և հենց դրսի վրա աշխատելով էլ հայտարարություններ է անում, հաճախ անհավասարակշիռ և էմոցիոնալ»։

Հարցին, թե արդյո՞ք հաշվարկված են այն բոլոր խնդիրները, որոնք կարող ենք ունենալ՝ ՀԱՊԿ-ից դուրս գալու դեպքում՝ Բաղդասարյանն ասաց, որ եթե Նիկոլ Փաշինյանը նման հաշվարկներ անելու ընդունակ լիներ, ապա Հայաստանն ու Արցախն այսօրվա իրավիճակում չէին լինի։

Աղբյուր` Փաստինֆո