Փաստ ինֆո

Եթե շատ համառոտ ասենք՝ շարժումը գնում է սխալ ճանապարհով, այդ պատճառով որևէ արդյունք չի գրանցել։ Այս մասին «Փաստինֆոյի» հետ զրույցում ասաց քաղտեխնոլոգ Արմեն Բադալյանը՝ անդրադառնալով «Տավուշը հանուն հայրենիքի» շարժման՝ մինչև երկուշաբթի վերցրած դադարին։

«Փողոցային պայքարով իշխանափոխություն չես կարող անել, սա սխալ մեթոդոլոգիա է, շարժման առաջնորդները պետք է մտածեն և շարժման ռազմավարությունն ամբողջությամբ փոխեն։ Փողոցային պայքարով՝ վրան կդնես, թե՝ ոչ, միտինգ կանես, թե՝ ոչ, միևնույն է՝ իշխանափոխություն չես կարող անել։ Պետք է ամբողջովին փոխել պայքարի ռազմավարությունը, եթե պայքարի ռազմավարությունը չփոխվի՝ հնարավոր չի լինի ոչինչ անել։ Պետք է նստեն մտածեն, ակնհայտ է, որ այս ճանապարհը ոչ մի տեղ չի տանում, բացի ծեծ-ջարդից, ոստիկանական բախումներից։ Արմատական փոփոխություններ է պետք կատարել պայքարի ռազմավարության մեջ։

Շարժման առաջնորդները պետք է հականան, որ պայքարը սխալ տեղ է տանում, այս ճանապարհով կարելի է 1 ժամ կռվել, կամ 100 տարի կռվել, բայց դա արդյունքի չի տա, ոչ մի տարբերություն, 1 ժամ կկռվեք, թե 100 տարի, արդյունք չի տալու»։

Նրա դիտարկմամբ, եթե շարժման առաջնորդները մտածում են, որ փողոցը 100-200 հազար մարդ կլցնեն ու Փաշինյանը հրաժարական կտա՝ այդպես չի լինի։ «Փաշինյանը պաշտոնապես 680 000 ձայն է ստացել, ինչո՞ւ պետք է 100-200 հազարի դեպքում հրաժարական տա։ Չի տա, եթե, իհարկե, չկան նախօրոք պայմանավորվածություններ, որ Նիկոլն այս ճանապարհով զիջելու է իշխանությունը, եթե նման պայմանավորվածություն չկա՝ ուրեմն այս տարբերակով հնարավոր չէ նրան ստիպել հրաժարական տալ։ Եթե պայմանավորվածություն լինի՝ իշխանությունը հանձնելու՝ կհանձնեն, բայց այս պահին նման պայմանավորվածության նշաններ չեն երևում, իսկ եթե չկա և մարդիկ գնում են սխալ ճանապարհով, ապա ոչ մի տեղ էլ չենք հասնի»։

Անդրադառանլով ԱԺ-ում հունիսի 17-ին իրականացվելիք արտահերթ նիստին, որի ընթացքում փորձելու են անվստահության ուղերձ հղել կառավարությանը՝ Բադալյանն ասաց, որ եթե ընդդիմությունը չունի համապատասխան լծակ՝ ստիպելու ՔՊ-ին, որ անվստահության գործընթացին մասնակցի, ապա սա ընդամենը ավելորդ աղմուկ է բարձրացնելու, ուրիշ ոչինչ։

Դիտարկմանը, թե ընդդիմության հիմնավորումն այն է, որ նաև իմպիչմենտի համար է անհրաժեշտ մեծ հանրային ճնշում՝ նա պատասխանեց, որ հանրային բավարար ճնշում չկա ու չի լինելու։ «Հանրությունը թույլ է, չի կարող ճնշել, ժամանակն է սա հասկանալու»։

Բադալյանի խոսքերով՝ տարբերակ կա, սահմանադրությունը իշխանափոխության հնարավոր տարբերակներն առաջարկում է։ «Թե որն է այդ տարբերակը՝ իրենք պիտի մտածեն, պարզապես, պետք է սահմանադրությունը ևս մեկ անգամ ընթերցեն ու կրեատիվ մոտեցում դրսևորեն։ Կարդալը քիչ է, պետք է նաև հասկանալ, ու կրեատիվ մոտեցում դրսևորել։

Մեր ընդդիմադիր շարժումների ու գործիչների խնդիրը հենց կրեատիվ, նորարարական մոտեցումների բացակայությունն է, բոլորն առաջնորդվում են 30 տարի առաջվա դասախոսություններով, բայց հիմա ժամանակները փոխվել են, չի կարելի 1910 թ-ի կինոտեսախցիկով «Ավատար» նկարել, չի ստացվի, իսկ իրենք ուզում են դա անել, դրա համար էլ չի ստացվում»

Աղբյուր` Փաստինֆո