Փաստ ինֆո

Լոռիում և Տավուշում հեղեղումների հետևանքով կա տարահանված 429 բնակիչ, որոնց թվում 2 հղի կին։ Այդ մասին լրագրողների հետ ճեպազրույցում հայտնել է ՀՀ ՆԳՆ փրկարար ծառայության տնօրեն Կամո Ցուցուլյանը։

«Այս պահի դրությամբ ունենք տարահանված 429 բնակիչ, որոնցից երկուսը հղի կանայք են։ Բնակիչների մեծամասնությունը իրենց հարազատների տներում են, հրաժարվել են մեր առաջարկած աջակցությունից»,-ասաց Ցուցուլյանը։

Նրա փոխանցմամբ՝ շենք-շինություններում շարունաւկվում են մոտոպոմպերի միջոցով իրականացվում են ջրահեռացման աշխատանքներ։
«Սանահին բնակավայրի հետ ճոպանային ճանապարհով կապ ենք ստեղծել, որի միջոցով, եթե անհրաժեշտություն լինի, բնակչությունը կտարհանվի։ Երեկ մարդկանց սնունդ ենք մատակարարել, անհրաժեշտության դեպքում այսօր ևս ճոպանների միջոցով սնունդը կապահովենք»,- ասաց նա՝ ավելացնելով, որ միջոցներ են ձեռնարկվում նաեւ որոշ բնակավայրերի մեկուսացումը վերացնելու ուղղությամբ՝ առնվազն շարժական նոր կամուրջ կառուցելու միջոցով։

Փրկարար ծառայության տնօրենը հայտնել է, որ Ալավերդի համայնքում ունենք մեկուսացված բնակավայրեր։

Պատասխանելով լրագրողի այն հարցին, թե ինչո՞ւ նախապես բնակչության տարահանում տեղի չի ունեցել՝ Ցուցուլյանն ասաց, որ հնարավոր չէ կանխատեսել, թե ջրի մակարդակն ինչ աստիճանի կարող է բարձրանալ։

«Եթե մենք իմանայինք, որ ջրի մակարդակն այսքան կբարձրանա և այսպիսի վնասներ կլինեն, բնականաբար, նախօրոք տարահանում կանեինք և ազդարարում կիրականացնեինք»,- ասաց փոխնախարարը՝ հավելելով, որ այս պահի դրությամբ նոր հեղեղումների վտանգ չկա, քանի որ ջրի մակարդակը մոտ 105 սմ-ով իջել է։

Աղբյուր` Փաստինֆո