Փաստ ինֆո

Կովկասում խաղաղության հաստատումը շատ կարեւոր է, ուստիեւ եվրոպական կառույցները ողջունում ու հորդորում են, որ Հայաստանն ու Ադրբեջանը ստորագրեն խաղաղության պայմանագիրը։ Եւ դա տեղի ունենա հենց այս տարվա ընթացքում։ ՀՀ իշխանություններն էլ ներկայացնում են, որ պատրաստ են «խաղաղության գործընթացին», սահմանազատման ու սահմանագծման գործընթացին, սակայն ջանք չեն գործադրում, որ Եվրոպան նկատի այն խնդիրները, որոնք կան։ «Փաստինֆո»-ի հետ զրույցում ասել է Բրյուսելում ՀՅԴ Հայ դատի Եվրոպայի գրասենյակի հաղորդակցության և հանրայաին կապերի պատասխանատու Սարինե Աբրահամյանը։

Նրա արձանագրմամբ՝ Եվրոպայի տարբեր կառույցների միջոցով գործընթացն ուղեկցվում է ողջույններով, սակայն անտեսվում է հանգամանքը, որ տեղի է ունենում Հայաստանի ինքնիշխան տարածքի խախտում, որ Տավուշում ոտնահարվում են հայ բնակիչների իրավունքները։ Փոխարենը՝ կա բավականին մեծ ճնշում Հայաստանի վրա, որպեսզի գնան այդ զիջումներին և լինի վերջնական, այսպես կոչված, խաղաղության պայմանագիրը։
Արդյոք կա՞ որևէ ճնշում Ադրբեջանի նկատմամբ՝ «Փաստինֆո»-ի հարցին ի պատասխան Սարինե Աբրահամյանը նկատեց, որ նման բան տեսանելի չէ։

«Չենք տեսնում, որ կա ճնշում Ադրբեջանի վրա, գուցե կան ինչ - որ ճնշումներ նաև իրենց վրա, որ գնան դեպի խաղաղության պայմանագիր, բայց շատ տեսանելի չեն։ Գուցե կլինեն այլ թեմաներով՝ ինչ-որ բանաձևեր, օրինակ՝ Եվրախորհրդարանի մակարդակով, որ Ադրբեջանը ժողովրդավար երկիր չէ, պետք է լինի ավելի ժողովրդավար, ընտրությունները բաց և թափանցիկ չէին եւ այլն։Օրինակ, Եվրախորհրդարանի ընդունած վերջին բանաձևը, որով ափսոսանք էր հայտնել, որ Շառլ Միշելը շնորհավորել էր Ալիևին՝ ընտրությունից հետո»,- ասաց մեր զրուցակիցը՝ նշելով, որ Եվրախորհրդարանում կա մթնոլորտ, որ Ադրբեջանը չպետք է խախտի պարտավորությունները, լինի ավելի ժողովրդավար՝ նաև իր քաղաքացիների համար, բայց դրանից ավելի որևէ այլ ճնշում տեսանելի չէ։

Ստեղծված պայմաններում ինչ հնարավորություններ կան՝ բանակցային գործընթացում հայկական շահն առաջ մղելու համար՝ հարցին ի պատասխան Ս.Աբրահամյանը նկատեց, որ բոլորովին այլ մթնոլորտում տեղի կունենային բանակցությունները, եթե Հայաստանում լիներ իր երկրի համար մտածող իշխանություն։ «Այս պահին մենք որևէ ձևով չենք տեսնում, որ այսօրվա իշխանությունները, Փաշինյանն այդ կամքն ու կարողությունն ունեն՝ հայկական շահերն առաջ առաջ տանելու համար։ Ես վստահ եմ, որ եթե լիներ ազգային իշխանություն, դա կկարողանար ու կփոխեր այսօրվա հայկական կողմի նարատիվը, այդ դեպքում նաև կարծում եմ ԵՄ-ի վերաբերմունքը կփոխվեր մեր հանդեպ։Այսօրվա վերաբերմունքը մեծ հաշվով գալիս է նաև ՀՀ իշխանությունների պատճառով։ Դժվար է կանխատեսումներ անել, բայց այլ մթնոլորտում կլիներ, գուցե Ադրբեջանի նկատմամբ էլ ինչ-որ ճնշումներ կլինեին, ճնշելու համար էլ թեմա պետք է տալ, եթե չեն տալիս ինչո՞ւ ճնշեն, երբ շահ էլ չունեն»,- նշեց Հայ Դատի գրասենյակի ներկայացուցիչը։

Աղբյուր` Փաստինֆո