Փաստ ինֆո

Ասկերանի քաղաքապետ Հայկ Շամիրյանի նկատմամբ հետապնդումներն իրականացվում են՝ Տավուշը հանուն հայրենիքի շարժմանը մասնակցելու համար։ Այս մասին «Փաստինֆո»-ի հետ զրույցում ասաց փաստաբան Վահե Եփրիկյանը։

Հիշեցնենք, որ Ասկերանի նախկին Հայկ Շամիրյանը ձերբակալվել է երեկ՝ իր իսկ բնակարանից։ Շամիրյանին մեղադրանք է ներկայացվել ՀՀ քրեական օրենսգրքի 255-րդ հոդվածի 3-րդ մասի 3-րդ կետով՝ առանձնապես խոշոր չափերով խարդախության և 457-րդ հոդվածի 1-ին մասով՝ փաստաթղթի կեղծման հատկանիշներով։ Շամիրյանի նկատմամբ կալանավորումը որպես խափանման միջոց ընտրելու վերաբերյալ միջնորդություն է ներկայացվել դատարան, որը քննվում է այսօր՝ Ռազմիկ Մարիկյանի նախագահությամբ։

Փաստաբան Վահե Եփրիկյանը «Փաստինֆո»-ի հետ զրույցում մանրամասնեց, որ Ասկերանի համայնքը՝ ինչպես ցանկացած այլ համայնք՝ ունեցել է գույք, այդ թվում՝ մեքենա։

«Այս տարի՝ հունվար ամսին, քանի որ համայնքի ղեկավարն է, և արցախահայերը ունեն նյութական խնդիրներ, փորձել է այդ համայնքային գույքն իրացնի, վաճառի, որ այդ հասույթից կարողանա խնդիրներ լուծել, այդ թվում՝ պատերազմում զոհված անձանց հարազատների համար, առողջական խնդիրներ ունեցող արցախցիների հարցերը լուծելու համար։ Քանի որ մասնագիտությամբ իրավաբան չէ, խորը մասնագիտացում չունի, դիմել է ՃՈ, որտեղից իրեն հուշել են, որ պետք է ավագանու նիստ հրավիրել, համայնքային գույքը դարձնել մասնավոր, որ կարողանան գրանցել, պարոն Շամիրյանն էլ, լինելով իրավահպատակ մարդ, վարվել է այնպես, ինչպես իրեն հորդորել, ուղղորդել է ՃՈ-ն։ Դրանից ամիսներ անց, երբ արդեն մեկնարկեց օրվա իշխանության դեմ ակտիվ պայքարը՝ Բագրատ Սրբազանի առաջնորդությամբ «Տավուշը հանուն հայրենիքի» շարժումը, Շամիրյանը, ունենալով որոշակի այլ քաղաքական հայացքներ, հանդիպել է Բագրատ Սրբազանին, մասնակցել խաղաղ հավաքներին և կարծում եմ՝ օրվա իշխանության տրամաբանությամբ, օրվա իշխանության ամենաօդիոզ ներկայացուցիչներից մեկի՝ Խաչատուր Սուքիասյանի ելույթի տրամաբանությամբ, ռեպրեսիվ մեքենայի արդյունավետության բարձրացման տրամաբանությամբ պարոն Շամիրյանը գտնվում է ՁՊՎ-ում»,- ասաց փաստաբանը՝ նշելով, որ մեղադրանք է առաջադրվել մի քանի ամիս անց, մեղադրանքն էլ՝ «ապուշ» մեղադրանք է։ Փաստաբանն ուշադրություն հրավիրեց այն հանգամանքին, որ գործը, թեև խարդախության մասին է, բայց տուժող չկա, իբրև քննում են որոշակի համայնքին պատկանող գույք, որը ևս չունենք․ «Ադրբեջանի Հանրապետությու՞նն է տուժողը, լու՞րջ։ Սա անհասականալի է՝ իրավաբանության տեսակետից։ Ի վերջո, քանի՞ խարդախություն անող է գնում ու ինչքան պետական մարմին կա՝ պտտվում, հարցնում, թե ինչ անի, իրեն հորդորում են, ասում՝ այսպես արա, ամիսներ անց՝ նույն պետության այլ իրավակիրառ մարմին ասում է՝ հանցագործություն ես արել։ Եթե այստեղ ինչ-որ մեկը տեսնում է իրավաբանություն, ապա՝ աչքը լույս, երրորդ աչք է բացվել»։

Փաստաբանը նկատեց՝ իրենց համայնքին պատկանող ավտոմեքենան փորձել են վաճառել՝ համայնքի անդամների կարիքները բավարարելու համար, ո՞րն է այստեղ ապօրինությունը․ «Խարդախությունը պետք է դրսևորվի երկու եղանակով՝ կամ խաբեությամբ, կամ վստահությունը չարաշահելու եղանակով, եթե երկու եղանակներից մեկը չկա, ապա խարդախություն էլ չկա։ Հիմա ու՞մ է խաբել և ում վստահությունն է չարաշահել։ Սա խեղկատակություն է »։

Եփրիկյանն ամփոփեց զրույցը՝ Նիկոլը պետք է հեռացվի խոսքերով։

Հեղինակ՝ Իզաբել Սահակյան

Աղբյուր` Փաստինֆո