Փաստ ինֆո

Կիրանցում վճռվում է ամբողջ հայոց պետականության ոչ միայն ներկայի հարցը, այլև՝ գալիքը։ Այն ապօրինի գործընթացը, որ սկսել են ՀՀ կառավարությունը՝ իր տարաբնույթ գործընկերների հետ, մեզ համար անընդունելի են։ Այս մասին Կիրանցից իր ուղերձում հայտարարել է ՀԱԵ Տավուշի թեմի առաջնորդ Բագրատ արքեպիսկոպոս Գալստանյանը։

Անդրադառնալով երեկ Կիրանցում տեղի ունեցած իրադարձություններին՝ Սրբազանը մանրամասներ հայտնեց։
«Երեկ գիշեր մգեցված ապակիներով, առանց պետհամարանիշի մեքենայով, անհայտ ինքնության մարդիկ գաղտագողի մուտք են գործել այն հատվածները, որոնք իբր պետք է հանձնվեն։ Ժողովուրդը պահանջեց, որ անհայտ մեքենայից մարդիկ դուրս գան ու բանական զրույցի բռնվեն, ինչու են գաղտագողի գալիս: Եթե ձեր գործն անկեղծ է, ինչո՞ւ եք այդպիսի ծածկույթով գալիս։ Երբ ժողովուրդն իրավամբ ընդվզեց, ոստիկաններն ուժ կիրառեցին»,- նշեց Սրբազանը՝ հավելելով, որ ողջամիտ կասկածներ կային, որ այդ մեքենայի մեջ Մհեր Գրիգորյանն ու Շահին Մուսթաֆաևն են եղել․« Վստահաբար չեմ ասում, բայց դուք իրավունք եք տվել ամեն ենթադրություն անելու։ Եթե այդքան պարզ, ազնիվ, շիտակ էիք, թող ուղղությունը տային, մարդիկ էլ իրենց գործն անեին։ Ես չեմ ասում վստահաբար, որ այդպես է, գուցե անձնապես չեմ հավատում, բայց դուք եք իրավունք տվել՝ նման կասկածներ ունենալու»։

Ինչ վերաբերում է ոստիկանների՝ «սևբերետավորների» գործողություններին, Բագրատ Սրբազանը նշեց, թե իրեն Տավուշի մարզային վարչության պետը, փոոստիկանապետը հավաստիացրել են, թե լուսաձայնային նռնակ իրենք չեն կիրառել։
«Ժողովուրդն էլ ինձ ասաց, որ իրենք չեն նետել, երևի երկնքից ասուպ է ընկել։ Դրանից հետո բորբոքումներ ստացան, երկու ոստիկան վիրավորում ստացան, փառք Աստծո՝ ծանր վնասվածքներ չունեցան, դեպքից հետո գնացել այցելել եմ հիվանդանոց, օրհնել, աղոթք արել, որ շուտափույթ ապաքինվեն »,-ասաց Սրբազանը՝ հավելելով, որ հոգևորականներն իրենից առաջ էին այցելել։ Բացի այդ, վիրավորումներ են ստացել նաև գյուղի բնակիչներից երկու կին և մեկ աղջնակ, որին անձամբ տեսել է Սրբազանը։

«Սիրելի՛ ոստիկաններ, էս ձեր խնդիրը չի, մի մտեք դրա մեջ։ Դուք մասնակից եք լինում մի այնպիսի գործընթացի, որը վճռելու է մեր երկրի ճակատագիրը։ Այն երկրի, որին դուք, ենթադրաբար, ծառայում եք։ Ես վստահ չեմ, որ երեկ գիշերը դուք տուն եք գնացել ու հանգիստ քնել եք, որ ոտնակոխ եք արել երեխաների, կանանց։ Ինչի՞ համար, որ պայքարում են հանուն իրենց հայրենիքի՞։ Մի մտեք սրա արանքը, մի մտեք։ Ձեզ մխրճել են այն գործընթացի մեջ, որը ճակատագրական է։ Գիտեմ, թե ինչպիսի ծանր հոգեվիճակում եք գտնվում, մտածեք, թե ինչին եք դուք ծառայում։ Սա իմ հոգևոր տարածքն է, և որևէ մեկը, ով էլ ուզում է լինի աստիճանով, իրավունք չունի ո՛չ սպառնալիքով խոսելու, ո՛չ էլ, առավել ևս, ոտնակոխ անելու իմ ժողովրդին։ Ասելիք ունեք՝ եկեք ասեք ու նաև կստանաք ձեր պատասխանները»,-ասաց Սրբազանը։
Նա ոստիկաններին հորդորեց իրենց պահել այնպես, ինչպես վայել է հայ տղամարդուն․ «Դուք ծառայության մեջ եք, դուք ծառա չեք»։

Աղբյուր` Փաստինֆո