Փաստ ինֆո

Դուք չեք մնալու։ Կամ մենք ենք մնում այս երկրի տեր կամ դուք։ Սա հստակ ջրբաժան է ։ Այսօր տեղի ունեցած ճեպազրույցում ասել է Հայ առաքելական եկեղեցու Տավուշի թեմի առաջնորդ Բագրատ արքեպիսկոպոս Գալստանյանը։

Նրա արձանագրմամբ՝ սահմանազատման գործընթացը պետք է տեղափոխվի օրենքի դաշտ՝ լուծվի ՀՀ հանրապետության օրենքների և միջազգային պայմանագրերի շրջանակում։ «Ուրիշ ճանապարհ չկա, եթե համընդհանուր սահմանազատում, սահմանագծում են ուզում անել, ուրեմն պետք է լինի ըստ կարգի ու կանոնի, որոշակի սկզբունքներով, քարտեզներով, հանրաքվեով, միջազգային պայմանագրերի ու երաշխավորների ներկայացությամբ։ Չի կարող լինել հատվածական, մեկի կամքով»,- ասել է Սրբազանը։

Անդրադառնալով իր դեմ սկսված տեղեկատվական սեւ արշավին՝ սրբազանն ասել է. «մեզ՝ կոնկրետ ինձ, այս ժողովրդին, կամ որևէ հայրենատեր մարդու, ծաղրողներն ովքե՞ր են՝ իշխանության գրչակներն ու ամենաստորին աստիճանի մարդիկ, իրենց հարբեցողությամբ, սեռական կողմնորոշումներով, և ադրբեջանցիները։ Իրար հետ համատեղ, ձեռք ձեռքի բռնած, սիրուն, մեր վրա ուրախանում են, ծաղրում են, պիտակավորում: Դե գնացեք իրար հետ ձեռք ձեռքի ու տեսեք, որ նույնն եք։ Ինձ ինչ-որ բաներ են ասում և իրենք, և ադրբեջանիցները։

Նա հիշեցրեց Նիկոլ Փաշինյանի՝ ԱԺ ամբիոնից արած հայտարարությունը, թե որոշ հոգևորականներ Ոսկեպարի եկեղեցու տեղը չեն իմացել, ապա նշեց. «Ոսկեպարի եկեղեցու մասին բարբաջում էր մի հոգի։ Ինչպե՞ս կարող է երկրի ղեկավարն ամենաբարձր ամբիոնից խոսել ինչ-որ կեցվածքներով, ձևերով, արտիստիկ ու փորձել հրահրել մարդկանց այդ ուղղությամբ։ Ամոթ։ Տեսաք պատասխանը»։

Հոգեւոր հոր արձանագրմամբ՝ իշխանության սուտը մեր աչքի առջև է, գյուղացիների հետ գալիս, խոսում են, հետո գնում քարտեզ են հրապարակում։ «Գյուղացիների, էս հերոսական ժողովրդի խնդի՞րն է սահման գծելը, պատասխանատվությունը ուզում են բարդել մեր սիրելի ժողովրդի վրա ու փորձել մոլորեցնել։ Խաբողը, սուտասանը չի կարող լինել այս ժողովրդի տերն ու ծառան, եթե սուտ է , ուրեմն սուտ է ամեն ինչի մեջ»,- նշել է Սրբազանն՝ ավելացնելով, որ իշխանության համար մեծ լուր ունի. «Դուք չեք մնալու։ Կամ մենք ենք մնում այս երկրի տեր կամ դուք։ Սա հստակ ջրբաժան է։ Մենք որևէ տեղ գնալու մտադրություն չունեն, հետևաբար որոշեք, թե դուք ուր եք գտնվելու»։

Աղբյուր` Փաստինֆո