Փաստ ինֆո

Ես ուզում եմ օրինակ բերեմ Արմավիրի Մարգարա գյուղից, տներից 50 մետր էն կողմ սահմանն է ու թուրքական զորքը, շատ վաղուց։ Մեր նպատակը տենց իրավիճան ստանալն է։ Այս մասին Տավուշի մարզի Կիրանց գյուղի բնակիչների հենդիպմանն ասել է ՀՀ վարչապետ Նիկոլ Փաշինյանը։

Նա նշեց, որ որոշում է կայացվել աշխատանքային խումբ ձևավորել և սահմանամերձ շրջանների վարչական ղեկավարները հիմա ներգրավված են սահմանազատման և սահմանագծման աշխատանքներում։ Փաշինյանը նաև հանձնարարական տվեց փոխվարչապետ Մհեր Գրիգորյանին՝ հաջորդ շաբաթվանից նրանց տեղեկատվություն տալ, որպեսզի տեղում աշխատանք իրականացվի ու նրանք էլ բնակիչների այդ աշխատանքներից տեղեկություն տան։

Նա նաև ընդգծեց, որ սա բավական դժվար պրոցես է, բայց ինքն այս պրոցեսի նկատմամբ դրական է տրամադրված, քանի որ սահման են ստանալու երկրի ողջ տարածքի համար, իսկ սահմանը պաշտպանության մեխանիզմն է, խաղաղության որոշակի երաշխիք։

«Ես ուզում եմ, որ սա տեղի ունենա, որովհետև ես հասկանում եմ, որ երբ հասանք վերջնակետի՝ մեր ծննդավայրի համար ապահովելու ենք անվտանգություն ու բարեկեցություն։ Ես սա ուզելով եմ ձեզ ասում, դժվար է, հեշտ չի, բայց ես գիտեմ, որ մենք պետք է անցնենք սրա միջով, որ անվտանգություն, ապահովություն և երկիր ապահովենք։ Ես հասկանում եմ, որ ռիսկեր կան, ձեր հոռետեսությունը անհիմն չի, բայց ես կարող եմ ասել, որ էսօրվա վիճակը լավատեսության ոչ մի հիմք չի տալիս։ Մենք պետք է առաջ գնանք լավատեսություն կառուցելով»։

Փաշինյանը նաև վստահեցրեց, որ միլիմետրի ճշտությամբ գիտի, թե որտեղ են մեր սահմանները։

«Մեր մոտ կա 1976 թ-ի քարտեզը, այսինքն, նոր չի տպած էդ քարտեզը, որ մենք ասենք, այ, մի գիծ ծռեցինք, էս արինք, էն արինք, եթե օրինակ ձեր ասած էդ կամուրջով կիլոմետրանոց հարց լուծվեր՝ կասեի հա, բայց էդ կամուրջով մետրանոց հարց է լուծվում։ Պետք լինի՝ նոր ճանապարհ էլ կսարքենք, բայց սա ճանապարհի հարց չի, սա Տավուշի և ՀՀ անվտանգության մասին է, մենք պետք է գնանք լուծումների։ Պատկերացրեք, թե ինձ ինչքան մոտ է այս թեման, ինչքան ձեզ է մոտ, այնքան ինձ, մեր նպատակն այն չէ, որ ասեք, վայ՝ 50 մետր էն կողմ Ադրբեջան է, ասեք, ինչ լավ է, որ 50 մետր էն կողմ Ադրբեջան է, մենք էնտեղ առևտուր կանենք, տնտեսություն կկառուցենք, կարող է մի հատ անցակետ էլ կառուցենք՝ ավտոները գան-գնան՝ վճարեն ՀՀ-ին, մեր մտածածը դա է։ Դուք հիմա կարող եք ասել՝ 100 տոկոսով երաշխավորո՞ւմ ես, որ էդպես է լինելու, ես էլ կարող եմ ասել, որ չեմ երաշխավորում, բայց մենք քայլ- քայլ կգնանք կհասնենք դրան, բայց եթե մենք այդ քայլերը չանենք, երաշխավորում եմ, որ պայթյուն է լինելու մեր տարածաշրջանում, որովհետև 30 տարի մենք ապրել ենք բեսպրիդելի միջավայրում, մենք ասում ենք, որ բեսպրիդելի միջավայրը պետք է դադարեցվի»։

Աղբյուր` Փաստինֆո