Փաստ ինֆո

Համացանցում  ապրիլի 13-ի  առավոտյան տարածվել են  օրեր առաջ ավտոմեքենայից հարյուրավոր միլիոններ հափշտակած ավազակային հարձակման մասնակիցների ձերբակալության կադրերը:
 
Տեսանյութում երևում է, թե ինչպես են ՀՀ իրավապահ մարմինները  ստուգում մեքենաները, որոնցից մեկի  ժամանակ լսվում է ոստիկանի ձայնը` «կանդալ բերեք, կանդալ»: Մեքենայի մեջ հայտնաբերվել է գողոնը:

Ինչպես արդեն հայտնել ենք` 2024 թվականի ապրիլի 10-ին՝ ժամը 07:55-ին, քաղաքացուց ահազանգ է ստացվել այն մասին, որ իր ազգականների վրա տեղի է ունեցել զինված հարձակում և նրանց թալանել են։

Արմավիրի մարզի Փարաքար համայնք տանող ճանապարհին հայտնաբերվել է «Հունդաի Սոնատա» մակնիշի ավտոմեքենա, իսկ մայթեզրին գտնվել են 3 անձ, որոնց ձեռքերին ամրակցված են եղել ձեռնաշղթաներ։
 
Նախնական տվյալներով` ապրիլի 10-ին՝ ժամը 07:10-ի սահմաններում դիմակավորված, ատրճանակներով զինված առնվազն 4 անձ ավտոմեքենայով կանգնեցրել են  վերը նշված 3 անձանցից մեկի վարած «Հունդաի Սոնատա» մակնիշի ավտոմեքենան, վարորդին ու 2 ուղևորներին բռնություն գործադրելով իջեցրել ավտոմեքենայից, պառկեցրել գետնին ու ձեռնաշղթաներ հագցրել։
 
Այնուհետև, արցունքաբեր գազ կիրառելով՝ երեքին էլ նստեցրել են ավտոմեքենան, հափշտակել բեռնախցիկում գտնվող ճամպրուկների և  պայուսակների մեջ  եղած մոտ 1 միլիարդ 24 միլիոն ՀՀ դրամ գումարին համարժեք, շուրջ 36 կիլոգրամ ոսկյա երեք ձուլակտորներ, մոտ 1 միլիարդ 216 միլիոն ՀՀ դրամին համարժեք 293 միլիոն ռուբլի գումարը և դիմել փախուստի: 
 
Ապրիլի 11-ին իրավապահները Արմավիրի  մարզում հայտնաբերել էին ավազի մեջ կիսաթաղված վիճակում գտնվող«Porsche Cayenne» մակնիշի ավտոմեքենա, որով ենթադրաբար եղել են ավազակային հարձակում իրականացնողները, իսկ այսօր էլ կասկածյալներին են ձերբակալել:
 
 

Աղբյուր` Փաստինֆո