Փաստ ինֆո

Երևան քաղաքը գտնվում է կիսաանապատային զոնայում և պարզ է, որ 1950-ականների վերջում կանաչապատումը կատարվել է մասնագիտացված կառույցների կողմից։ Ընդ որում՝ բոլոր այդ աշխատանքները հենց այնպես չեն արվել, լուրջ մասնագետներ, բուսաբաններ, դենդրոլոգներ են աշխատել այդ ուղղությամբ։ Այս մասին «Փաստինֆո»-ի հետ զրույցում ասաց բնապահպան Սիլվա Ադամյանն՝ անդրադառնալով Երևանի քաղաքապետարանի այսօրվա գործակարգավարական նիստում Տիգրան Ավինյանի այն պնդմանը, թե գիտնականների կողմից առկա է որոշում, որ թեղիները Երևանի համար նպաըակահարմար չեն ու դեռևս չկա հակառակի մասին գիտական մոտեցում։ Նա նաեւ ավելացրել էր, որ եթե այլ գիտական պնդում չկա, ուրեմն էմոցիոնալ և սիրողական մակարդակի խոսակցություններ են ու այն ծառերը, որոնք փոխարինվում են, իսկապես կորցրել են ֆունկցիոնալությունը։

«Էդ, որ հիմա քաղաքապետարանում ասում են՝ նպատակահարմար չեն թեղիները Երևանի համար, իրենք պետք է դրա հիմքերը ներկայացնեն, այդ ինչն է պատճառը, որ հանկարծ նպատակահարմար չեն գտնում։ Ժամանակին բոլոր հիմքերը եղել են պնդելու, որ թեղին նպատակահարմար է եղել ու գիտնականներն էլ ապացուցել են, ու բերել, տնկել են ու հիմա ստացել ենք հասուն լավ ծառեր Երևանի համար։ Ուզում եմ հասկանալ, թե որտե՞ղ է այդ եզրակացությունը, որ կառույցներն են նման մասնագիտական եզրակացություն տվել»,- ասել է բնապահպանն ու ավելացրել, որ խիստ քննադատել է այդ գիտնականներին, որոնց ցուցակը տրամադրվել էր քաղաքապետարանի կողմից։ Ըստ այդ եզրակացության՝ այդ ծառերը չի կարելի այլևս տնկել Երևանում և այլ ծառերի անհրաժեշտություն կա, Բայց Բուսաբանության ինստիտուտը, Հիդրոէկոլոգիայի գիտական կենտրոնը, ԳԱԱ կենդանաբանության ինստիտուտը որոշում են կայացրել պաշտոնական ուսումնասիրություն անել և եզրակացություն տալ։

«Այսինքն, քաղաքապետարանը պաշտոնապես նամակ չի հղել այդ ինստիտուտներին ու պաշտոնական եզրակացություն էլ նրանցից չի ստացել, փոխարենը մի քանի մարդկանց ստորագրությամբ նման հիմնավորում է եղել, բայց նշածս ինստիտուտների գիտնականներն ասում են, որ այդ եզրակացությունը չեն հաստատում և իրենց եզրակացությունը պետք է տան, մենք սպասում ենք նշածս ինստիտուտների եզրակացությանը»,- նշեց մեր զրուցակիցը։

Անդրադառնալով Ավինյանի պնդմանը, թե չկա հակառակ պնդում՝ Ադամյանն արձագանքեց, «էդ ոնց չկա է, իրենք տեղյակ չեն, թող գնան Բուսաբանության ինստիտուտ, թող գիտնականներին ու փորձագետներին հարցնեն, թող կարդան 1960-ականներին լույս ընծայված «Երևան քաղաք» գիրքը, որ չեն կարդում, անգրագետ են, ո՞վ է մեղավոր, մենք այդ գրականությունը ունենք, թե ոնց է կանաչապատվել Երևանը, ով և ինչպես է հիմնավորել, թող բացեն կարդան, ախր, կարդալ գիտե՞ն, որ կարդան։ 1950-60-ականներին 2 գիրք է լույս ընծայվել, թող կարդան և հասկանան»։

Նա ընդգծեց, որ այս իշխանությունը, անգրագետ լինելով, ինչ-որ փոփոխություններ է անում, փորձարկումներ՝ Երևան քաղաքի վրա։ «Էս մարդիկ եկել, ասում են սակուրան շատ օգտակար է, բայց մասնագետներն էլ ասում են, որ դա մեզ համար՝ Հայաստանի ու Հայաստանի կլիմայի համար ոչ այդքան նպատակահարմար ծառ է։ էդ մարդիկ ուղղակի դիզայնի մասով փոփոխություն են անում, որ ասեն, տեսեք, փոփոխություն ենք կանում, բայց ես նաև կոռուպցիոն ռիսկերը չեմ բացառում, քանի որ, ըստ «Հետքի» հոդվածի, այն կազմակերպությունը որ գնում ու բերում է այդ ծառերը պատկանում է քաղաքապետին։ Բնական է, որ այստեղ փողերի լվացման ու կոռուպցիոն ռիսկեր կան»,- նշեց նա։

Դիտարկմանը, թե քաղաքապետը պնդում է, որ դրանք կենսունակ չեն՝ Ադամյանը պատասխանեց, որ արտերկրում տասնյակ ծառեր է տեսել, որոնք ավելի քան 100-150 տարեկան են։ «Ընդ որում՝ փողոցում այդ ծառերի վրա պետությունը վահանակներ է ամրացնում ու գրում, ծառը 100 տարեկան է՝ պաշտպանվում է պետության կողմից։ Այսինքն, մենք այդ մշակույթը չունենք, գալիս են, հինը ջարդում, ավիրում են, բայց դրանք հաստաբուն ծառեր են, դրանց սաղարքները մեծ են, դրանց վրա թռչուները կարող են բնադրվել, դրանք պաշտպանում են մեր մայթերը, մեր քաղաքացիներին՝ կլիմայական փոփոխություններից, բայց այդ ՝ դրանք արժեք են, դա պատմություն է։ Ես չեմ խոսում փտած ծառերի մասին, չեմ բացառում, որ եղել են այդպիսիք, բայց ես տեսել եմ այդ հատած ծառերը, որոնք խոնավ էին»,- մտահոգությունը հայտնեց Ս. Ադամյանը։

Նա նաև ընդգծեց, որ թեև հիմա ասում են պրոցեսը կանգնել է, բայց ինքը տեղեկատվություն ունի, որ հիմա էլ «Հաղթանակի զբոսայգում» ծառեր են հատում։ Այսինքն, հատում են, որ կարուսելներ տեղադրեն։

«Ես չեմ բացառում նաև, որ տասնյակ տարիների հիշողություն ունեցող ու արժեք ներկայացնող կաղնիներն էլ որոշեն փոխել»,- ավելացրեց նա։

Աղբյուր` Փաստինֆո