Փաստ ինֆո

Ես զգուշորեն կարող եմ ենթադրել, որ ամեն դեպքում՝ մինչև ապրիլի 5-ը սահմանին անմիջական սրացում չի լինի։ Այս մասին «Փաստինֆոյի» հետ զրույցում ասաց ռազմական փորձագետ Մհեր Հակոբյանը՝ անդրադառնալով կանխատեսումներին, թե մինչև ապրիլի 5-ը Ալիևի ռեժիմը և նրա դաշնակիցները ցանկանում են հարձակվել Հայաստանի վրա՝ նպատակ ունենալով խափանել Նիկոլ Փաշինյանի հանդիպումը ԱՄՆ պետքարտուղար Էնթոնի Բլինքենի և Եվրահանձնաժողովի ղեկավար Ուրսուլա ֆոն դեր Լյայենի հետ։

«Իհարկե, պատերազմի վտանգ կա, ինչ մնում է զորքերի կուտակումներին, ապա մեր տարածքն այնպիսինն է, որ եթե անգամ այս պահին կուտակումներ չկան՝ մի քանի ժամ անց կարող են լինել։ Ավելին, գաղտնիք չէ, որ 2 կողմերն էլ մարտական վիճակում են կանգնած սահմանին, բայց ես ենթադրում եմ, որ մինչև ամսի 5-ը էսկալացիա չի լինի»,- ասաց փորձագետը։

Նրա դիտարկմամբ՝ Հայաստանի իշխանությունների հայտարարությունները ազնիվ չեն բնագծում կանգնած զինվորի նկատմամբ։ «Քո զորքը կանգնած է այդ բնագծերում և մարտական ծառայություն է իրականացնում, իսկ դու այդ զինվորի համար բարոյական հիմքն ես վերացնում՝ դինադրություն ցույց տալու։ Այդ զինվորը կարող է, չէ՞, ասել, ես ինչի՞ եմ այստեղ կանգնած ու կյանքս վտանգելով մարտական դիրքս պաշտպանում, եթե նման քաղաքական հայտարարություններ են հնչում։

Մյուս կողմից էլ՝ սահմանը դեմարկացված ու դելիմիտացված չէ, իսկ ո՞վ ասաց, որ մենք մեր տարածքի մեջ կանգնած չենք։ Ստացվում է, մեր իշխանությունների համար «google»-տ քարտեզը ճշմարտության վերջին աստիճան է։ Իրականում այդպես չէ, պետք է լինեն իրավական փաստաթղթեր։

Եթե մենք ունենք պատերազմական վիճակ, ո՞նց ենք ասում, որ այդ տարածքները մերը չեն։ Հակառակը պետք է լինի, չէ՞ որ թշմանին նույն Տավուշից է օկուպացրել տարածքներ»,- նշեց Մ. Հակոբյանը՝ բարձրացնելով նաեւ Գեղարքունիքի ու Սյունիքի մեր տարածքների հարցը։

Սյունիքում, ինչպես նկատեց փորձագետը, ասում են՝ «հայ-ադրբեջանական» պայմանական սահման, բայց երբ գալիս է Տավուշին՝ ասում են՝ սովետական սահմանը «սրբազան կով է», դրա հիման վրա տվեք մեզ։

«Այս խնդիրը մեր իշխանություններն այնքան են խճճել ու անտեղի հայտարարություններով բարդացրել, որ իրականում պետք էր ասել՝ հարգելի Ադրբեջան, ուզո՞ւմ ես սահմանները դելիմիտացնել՝ արի խոսենք։

Հիմա, որ Բաքուն ասի՝ հարգելի հայ զինվոր, ձեր ղեկավարն է ասել, որ այդ տարածքը ձերը չէ՝ դու ինչու ես այդտեղ կանգնել՝ էդ զինվորը ի՞նչ պիտի ասի, պիտի ասի, որ ղեկավարը չի՞ հասկանում, թե՞ որ ղեկավարը ճիշտ է։ 2 դեպքում էլ զինվորը ընկնում է պրոբլեմի մեջ», - նկատեց մեր զրուցակիցը։

Հակոբյանի դիտարկմամբ՝ իրավաբանորեն այդ տարածքները վիճելի են, քանի որ հայ-ադրբեջանական սահմանը դեմարկացված ու դելիմիտացված չէ։ Ավելին, դեռ մեծ հարց է, թե արդյոք սովետական սահմանները կիրառելի են, մյուս կողմից էլ՝ Ադրբեջանը չի հանդիսանում խորհրդային Ադրբեջանի իրավահաջորդ։ «Այդ դեպքում ինչպե՞ս է ստացվում, որ իրենք խորհրդային Ադրբեջանի ժառանգությանն են հավակնում, եթե իրենց Սահմանադրությամբ Խորհրդային Ադրբեջանը չարիք են համարում։ Նույն խնդիրը նաև Արցախի հետ կապված էր, Արցախը երբեք չի եղել Ադրբեջանի առաջին հանրապետության կազմում։ Բա, եթե ժխտում են Խորհրդային Ադրբեջանի անցյալը ու իրենց համարում առաջին հանրապետության իրավահաջորդը՝ ինչպե՞ս են Արցախը համարում իրենցը։ Այսինքն, երբ Խորհրդային Ադրբեջանը ձեռք է տալիս՝ վերցնում ես, երբ ձեռք չի տալիս՝ մի կողմ նետում։ Նման բազում խնդիրներ կան, իրավաբաններն ու դիվանագետները այդ խնդիրները պետք է վեր հանեին, ասեին՝ եկեք խոսենք, ոչ թե նշանառության տակ կանգնած զինվորին ասեք՝ գիտեք ինչ, այդ դիրքը քոնը չէ»։
Հակոբյանը նշեց, որ նման հայտարարությամբ Փաշինյանն ու իր թիմը խնդիր է ստեղծում մեզ համար, քանի որ Ադրբեջանը կարող է իր տարածքային ամբողջականությունը «վերականգնելու» դրոշի ներոք

գործողություններ սկսել մեր դեմ։ Ավելին, կարող է հետո էլ ասի՝ մի հատ էլ անվտանգության գոտի եմ ստեղծում, որովհետև այն «ագրեսորն» իմ վրա կրակում է։ Պարզ ասած՝ մենք մեր գլխին սարքում ենք՝ վախենալով թշնամուց, մեր դեմ ցուցմունք ենք տալիս։

Միայն հիմարին կարող է թվալ, որ ինքը այսկերպ խուսափում է պատերազմից։ Հակառակը՝ սա ագրեսորի ախորժակը գրգռում է»,- փաստեց փորձագետը։

Անդրադառնալով Տավուշում հնչեցրած սպառնալիքներին՝ Հակոբյանն ընդգծեց, որ իշխանությունը նրա համար է, որ, պատասխանատվություն վերցնելով, խնդիր լուծի։ «Եթե գնում՝ ասում ես վատ է, արի իրար հետ մտածենք, դրանով պատասխանատվությունը քո վրայից գցում ես։ Դու այդտեղ ես, որ խնդիրները լուծես, չգիտե՞ս լուծումը՝ զիջի տեղդ, ռադ եղի՝ մեկ ուրիշը կգա, գուցե, լուծում կառաջարկի»։

Աղբյուր` Փաստինֆո