Փաստ ինֆո

Արմավիրի մարզի Փարաքար համայնքում 42-ամյա Նվարդ Նալչաջյանի սպանության գործով մեղադրյալ, 18-ամյա Գևորգ Գարեգինյանին բանակային զորակոչի ընթացքում զինկոմիսարիատի կողմից ուղեգիր էր տրվել՝ պայմանավորված «վարքի» խանգարում ախտորոշմամբ, մինչդեռ, նախաքննության փուլում Գարեգինյանի նկատմամբ դատահոգեբանական-դատահոգեբուժական փորձաքննություն չի իրականացվել։ Չի բացառվում, որ փորձաքննություն նշանակելու հարցը բարձրացվի արդեն դատական քննության փուլում։ Այս մասին «Փաստինֆո»-ի հետ զրույցում հայտնեց պաշտպան Արթուր Գրիգորյանը։

Հիշեցնենք, որ 42-ամյա Նվարդ Նալչաջյանի սպանությունը տեղի է ունեցել 2023թ․ հունիսի 18-ին՝ Փարաքարում։ Քրեական վարույթի շրջանակներում ձերբակալվել, ապա՝ կալանավորվել է 18-ամյա Գևորգ Գարեգինյանը։ Ըստ իրավապահ մարմինների՝ դեպքը տեղի է ունեցել շահադիտական նպատակներով։ Մասնավորապես, նախաքննության վարկածով, Գևորգ Գարեգինյանը, նպատակադրվելով իր մտերիմ Նվարդ Նալչաջյանից ավազակության եղանակով խոշոր չափերի գույք հափշտակել, 2023 թվականի հունիսի 18–ին՝ ժամը 20:00-ի սահմաններում, վերջինիս հետ հանդիպել է Արմավիրի մարզի Փարաքար համայնքում, որտեղ Նվարդ Նալչաջյանին պատկանող «Միցուբիշի» մակնիշի, 34 DU 176 հաշվառման համարանիշի ավտոմեքենայով շրջել են, ապա մեքենան կայանել են Փարաքար համայնքի «Ծիրանանոց» կոչվող հատվածում, որտեղ ժամը 21:00-ի սահմաններում Գևորգը Նալչաջյանին սպանել է՝ պարանոցը սեղմելու միջոցով խեղդամահ անելով՝ վերջինիս «Այֆոն 13 պրո մաքս» մոդելի բջջային հեռախոսը և «Միցուբիշի» մակնիշի 34 DU 176 հաշվառման համարանիշի ավտոմեքենան հափշտակելով համար։

Դրանից հետո, կպչուն ժապավենի օգնությամբ կապել է Նվարդ Նալչաջյանի ոտքերը, մեջքի հետևում ձեռքերը, բերանը և վերջինին պատկանող «Միցուբիշի» մակնիշի 34 DU 176 հաշվառման համարանիշի ավտոմեքենայով տեղափոխել Փարաքար համայնքի գերեզմանատան հարակից տարածքում գտնվող և չշահագործվող քարի արտադրամասի տարածք, դին հրելով գցել է առկա ձորակը և վրան քարեր լցնելով՝ ծածկել այն, ապա հափշտակած «Միցուբիշի» մակնիշի ավտոմեքենայով հեռացել նշված վայրից: Դրանից հետո՝ 2023 թվականի հունիսի 20-ին Նվարդ Նալչաջյանից հափշտակված «Այֆոն 13 պրո մաքս» մոդելի բջջային հեռախոսն իր ընկերոջ միջոցով վաճառել ու դրա դիմաց ստացել է 200.000 ՀՀ դրամ, իսկ «Միցուբիշի» մակնիշի 34 DU 176 հաշվառման համարանիշի ավտոմեքենան օգտագործել է իր կարիքների համար, մինչև իրավապահ մարմինների կողմից հայտնաբերվելը։ Մեղադրանքում առկա մյուս դրվագը վերաբերում է՝ հայհոյանք հնչեցնելու հարցի շուրջ առաջացած վիճաբանությանը, որի ընթացքում Գարեգինյանն, ըստ մեղադրանքի, դանակով հարվածել է Կարեն Գասպարյանին, ապա նաև՝ նրա հորը։

18-ամյա երիտասարդի պաշտպանը, սակայն, պնդում է՝ Նվարդ Նալչաջյանի մահն անզգուշության հետևանք է։

«Գործով հանգամանքներ կան, որ գուցե վիճելիության ոլորտում դիտարկվեն, բայց մի բան ակնհայտ է՝ թե՛ տուժողը, թե՛ մեր պաշտպանյալը մարտարվեստով են զբաղվել։ Դեպքի օրը մեր պաշտպանյալը տուժողի խնդրանքով խեղդող հնարք է ցույց տվել և խեղդող հնարքից ազատվելու տարբերակներ են պարապել՝ հենց ավտոմեքենայի սրահում։ Այդ խեղդող հնարքի հետևանքով, որոշ ժամանակ անց, մեր պաշտպանյալը նկատել է, որ անշարժացել է տուժողը, հետո տեսել է, որ մահացել է»,- «Փաստինֆո»-ի հետ զրույցում նշեց պաշտպան Արթուր Գրիգորյանը՝ հավելելով, որ իր պաշտպանյալի ցուցմունքները և դիակի դատաբժշկական փորձաքննության եզրակացությունը համընկնում են։ Մասնավորապես, դիակի փորձաքննության եզրակացությամբ նկարագրվել է մահ պատճառելու մեխանիզմը, համաձայն որի՝ սեղմման հետևանքով խնձորակը ներս է ընկել, ինչի հետևանքով անձը մահացել է․ «Խնձորակի՝ ներս ընկնելն առանձնապես մեծ «ջանքեր» չպահանջող հանգամանք է, ընդամենն անփութության հետևանք է։ Դիակի ԴՏՓ եզրակացությամբ հաստատվել է այն, ինչը մեր պաշտպանյալն իր ցուցմունքներում նկարագրել է։ Եթե մեր պաշտպանյալը ցանկանար սուտ ցուցմունք տալ՝ քրեական պատասխանատվությունից խուսափելու կամ իր ճակատագիրը մեղմելու համար, կարող էր բոլորովին այլ բան ասել։ Մարդն ընդունել է իր առնչությունը, նկարագրել մեխանիզմը, որը հաստատվել է»։ Ինչ վերաբերում է կնոջ հեռախոսը վերացնելու հանգամանքին, պաշտպանը նշեց, որ դա «մատի փաթաթան դարձնելով»՝ ասում են, թե հեռախոսին տիրանալու նպատակով սպանություն է կատարվել, մինչդեռ, պաշտպանի դիտարկմամբ՝ ցանկացած անձի՝ անգամ ոչ իրավաբանի համար, պարզ է, որ «ավելի լավ է կողոպուտի համար դատապարտվել, քան՝ սպանության համար, կարող էր ընդամենը ձեռքից վերցնել, դիմել՝ փախուստի»։ Պաշտպանի խոսքով՝ Գարեգինյանի հետագա գործողությունները, այդ թվում՝ տուժողի դին ժապավենով կապելը, թաղելը, հեռախոսը վերցնելը, պետք է պարզվի օբյեկտիվ քննությամբ՝ դատահոգեբանական-դատահոգեբուժական համալիր փորձաքննությամբ։ Ըստ ԱՀԿ համապատասխան դասակարգման՝ «վարքի» խանգարման այս ախտորոշման դեպքում անձի մոտ կարող է առաջանալ վնաս պատճառելու անհաղթահարելի ձգտում՝ պահի ազդեցությամբ, չի բացառվում, որ կարող է անմեղսունակության հարց բարձրացվել․ «Հետագայում նշում է, որ զղջում է կատարվածի համար, բայց չի բացառվում, որ հենց այդ հնարքը ցույց տալու պահին դերի մեջ մտած լինի, իր ուժերը կառավարած չլինի։ Պաշտպանյալս էլ՝ Գևորգ Գարեգինյանը, զբաղվում էր՝ « մարտեր առանց կանոնների» ոճով։ Կան մի շարք տեսանյութեր, որտեղ երևում է, թե ինչպես է նա հաղթում բավականին լուրջ գոտեմարտերում։ Հիմա ասում են, թե հեռախոսի համար է իբրև սպանել»։

Ըստ փաստաբանի՝ փորձաքննությամբ պետք է պարզել, թե արդյո՞ք դեպքից հետո Գարեգինյանի գործողությունները կարող են պայմանավորված լինել վարքի խանգարումով, որքանով են գիտակցված եղել, մինչդեռ, նախաքննության ընթացքում փորձաքննություն իրականացնելու միջնորդությունը մերժվել է, որևէ հանգամանք չի պարզվել։

«Ավելին, ոչ միայն սպանությունը շահադիտական նկատառումներով են վերագրում՝ բավարար չէ, այլև՝ վերագրում են այլ կերպ՝ նույն հոդվածի շրջանակներում՝ այլ հանցագործությունը թաքցնելու նպատակով, այլ հանցագործությունն էլ՝ ավազակային հարձակումը։ Այսինքն՝ իրավաբանության հերն անիծել են։ Այսինքն՝ ինչքան հնարավոր է՝ այդ երիտասարդի վրա քրեական օրենսգրքով մոտավոր հոդվածներ բարդել՝ մեղադրանքի կողմի աղճատված պատկերացներում»,-նշեց փաստաբանը։

Դիտարկմանը, որ մեղադրյալը ճանաչել է տուժողին, մտերիմ հարաբերություններ են ունեցել, հետևաբար, կողոպուտի դեպքում տուժողը կճանաչեր իրեն, արդյո՞ք հեռախոսը զննության ենթարկվել է, հնարավո՞ր է՝ որևէ տվյալներ լինեին մեղադրյալի վերաբերյալ, ինչու է հեռախոսը վերցրել՝ պաշտպանն արձագանքեց, որ գործում առհասարակ որևէ տվյալ առկա չէ՝ հեռախոսում որևէ տվյալի վերաբերյալ, նման հանգամանք բացակայում է, իսկ ինչ վերաբերում է կողոպուտին, ապա հեռախոսին տիրանալու ցանկացած տարբերակ կարող էր կիրառվել, բայց ճանաչելով, այդքան մտերիմ լինելով հանդերձ՝ հեռախոսի համար սպանելը՝ մեղադրանքի կողմի ցանկությունն է եղել՝ գործն այդպես տեսնելու։ Փաստաբանը հիշեցրեց՝ չփարատված կասկածը պարտավոր են մեկնաբանել հօգուտ մեղադրյալի, մինչդեռ, այս դեպքում մեկ սցենար են մշակել, ամեն ինչ անում են՝ այն իրագործելու համար։ Բացի այդ, պաշտպանը մտահոգիչ է գնահատում ՀՀ նոր քրեական դատավարության օրենսգիրքը, որի պարագայում՝ լրիվ, բազմակողմանի, օբյեկտիվ քննություն կատարելու պարտականությունն այսօր այլևս գոյություն չունի, քանի որ գործը դատարան ուղարկելու համար օրենսգրքում նշված է, որ «եթե քննիչը գտնում է, որ հավաքված ապացույցների հիման վրա դատարանի կողմից մեղադրյալի դատապարտումը մեծապես հավանական է՝ գործն ուղարկվում է դատարան»։
«Այսինքն՝ «Նաստրադամուսները» գտել են, բաժակ նայողի մոտ են գնացել, ներքին կապուղիներով ճշտել են, որ բավարար է՝ անձին դատապարտելու համար, դրա համար էլ մերժել են փորձաքննություն անցկացնելու միջնորդությունը՝ պատճառաբանելով, որ դրա կարիքը չկա»,- նշեց պաշտպանը՝ հավելելով, որ դա գալիս է նրանից, որ օրենքը մշակողները, կիրառողները կարծում են, որ պաշտպանության կողմի հետ մրցակցող կողմ են, մինչդեռ, այն դեպքերում, երբ հանրային հարաբերություններ են, կողմերի հավասարությունը մեղադրյալի, պաշտպանության կողմի համար է, որ էապես անբարենպաստ իրավիճակում չհայտնվի՝ մեղադրանքի կողմի համեմատ։ Պաշտպանը պատրաստվում է դատարանում ևս միջնորդել՝ դատահոգեբանական-դատահոգեբուժական փորձաքննություն նշանակել։

Նշենք, որ քրեական գործն այժմ գտնվում է Արմավիրի մարզի ընդհանուր իրավասության դատարանի դատավոր Արթուր Ադամյանի վարույթում՝ նախնական դատալսումների փուլում։ Դատարանը որոշում է կայացրել երեք ամսով երկարացնելու Գարեգինյանի կալանավորման ժամկետը։

Հեղինակ՝ Իզաբել Սահակյան

Աղբյուր` Փաստինֆո