Փաստ ինֆո

Տավուշի մարզի սահմանամերձ գյուղերի բնակիչները դեմ են տարածքներ հանձնելուն ու ՀՀ վարչապետ Նիկոլ Փաշինյանին ուղղված դիմումի ստորագրահավաքը նախաձեռնել են հենց բնակիչները։

Նախօրեին Սուրբ Աստվածածին եկեղեցում միասնական աղոթք է տեղի ունեցել, որին միացել էր նաեւ Շիրակի թեմի առաջնորդը։ «Մեծ պահքի ընթացքում տարբեր եկեղեցիներում միասնական աղոթքներ ենք անում, այս անգամ որոշեցինք Ոսկեպարի եկեղեցում անել աղոթքը։ Առաջին անգամը չէ, հաճախ ենք բարձրանում Ոսկեպարի Սուրբ Աստվածածին եկեղեցի։ Այն սահմանապահ է և բնակչները ոգեշնչվում են, իրենք էլ մեծ բազմությամբ բարձրանում մեր այցերի ժամանակ, դա շատ է օգնում այս լարված մթնոլորտում։ Այս անգամ մեզ միացավ նաև Շիրակի թեմի առաջնորդը»,- «Փաստինֆո»-ի հետ զրույցում նշեց Տավուշի թեմի առաջնորդ Բագրատ արքեպիսկոպոս Գալստանյանը։

Նրա փոխանցմամբ՝ Տավուշի մարզի գյուղական համայնքների բնակիչների նախաձեռնությամբ ակտիվ ստորագրահավաք է սկսվել։ Այն նոր է մեկնարկել եւ արդյունքների մասին խոսելը վաղ է։ Սրբազանը նշեց, որ ինքը եւս չի շտապում թվերը ճշտել,բայց տեղյակ է, որ բազմաթիվ գյուղեր միացել են։ «Բնակիչները դեմ են շարունակական զիջելու այս քաղաքականությանը»,- արձանագրեց Բագրատ Սրբազանը։ Թերեւս դա է Նիկոլ Փաշինյանի այցի նպատակը. Տավուշի թեմի առաջնորդի դիտարկմամբ՝ բնակիչների հետ հանդիպումներն ապակողմնորոշող բովանդակություն են ունենալու։ «Ինչպես Արցախի դեպքում էր տարբեր ժամանակներում տարբեր տեղեկություններ հաղորդում, համոզում, որոնք շատ շուտ հերքվում էին և վերջը եղավ այն, ինչ եղավ» , - մտահոգված նշեց Բագրատ Սրբազանը։

Նա ափսոսանք հայտնեց, որ ուշ է իմացել Փաշինյանի այցի մասին և չի հասցնի ներկա գտնվել, թեև նորմալ կլիներ, որ Հայ Առաքելական Եկեղեցու տվյալ մարզի թեմի առաջնորդին տեղեկացնեին այցի մասին, ինչը, բնականաբար, չի արվել։

Միասնական աղոթքի ժամանակ Բագրատ Սրբազանը հիշեցրել է, որ Ոսկեպարը միայն գյուղի տները չեն, Ոսկեպարը մեծ հասկացություն է, շատ բան է ներառում , այդ թվում՝ ենթակառուցվածքներ։ Թեմերի առաջնորդները միասնական աղոթքից հետո Ոսկեպար գյուղում հանդիպում են ունեցել բնակիչների հետ, որին ներկա են եղել նաև Ոսկեպարի բնակիչ, բանակային կորպուսի շտաբի նախկին պետ, գնդապետ Միհրան Մախսուդյանը, ԵԿՄ Տավուշի մարզային կազմակերպության ղեկավար Յուրա Հարությունյանը։ Այդ հանդիպման ժամանակ է ներկայացվել բնակիչների ստորագրավաք-դիմումը ՝ ուղղված վարչապետ Նիկոլ Փաշինյանին։ Ստորագրահավաքը նախաձեռնած բնակիչները դիմումի մեջ արձանագրում են, որ դեմ են սահմանագոտում Ադրբեջանին տարածքներ հանձնելուն։

Աղբյուր` Փաստինֆո