Փաստ ինֆո

Կոնդի բնակիչներն այսօր բողոքի ակցիա էին իրականացնում Երևանի քաղաքապետարանի մոտ՝ պահանջելով հանդիպում քաղաքապետ Տիգրան Ավինյանի հետ։ Նրանց պնդմամբ՝ ընտրություններից առաջ Ավինյանը խոստացել է անհատույց տրամադրել իրենց տների սեփականության նոր վկայականները՝ բնակելի տարածքների ճշգրտված տվյալներով, մինչդեռ 2023 թ-ի դեկտեմբերին ավագանու կայացրած որոշմամբ բնակիչները պետք է վճարեն իրենց սեփականության հանդիսացող տարածքների կադաստրային արժեքի 2 տոկոսը։

Բնակիչները հիշեցնում էին նաև, որ կառավարությունը 52 մլն դրամ էր հատկացրել պետբյուջեից, որպեսզի իրենց տարածքների ներքին և արտաքին չափագրումները կատարվեն։

«Փաստինֆոյի» հարցին, թե արդյոք փաստաթղթերի չտրամադրումը կապված է Կոնդն իրացման գոտի դարձնելու հետ՝ Կոնդի բնակիչ Նաիրա Երեմյանը հայտնեց, որ նախ ծրագրի երկրորդ փուլը դեռ տեղի չի ունեցել, , մյուս կողմից էլ, քանի դեռ իրենց փաստաթղթերը իրենց չեն տվել՝ թույլ չեն տալու, որ որևէ ծրագիր իրականացվի։

«Էդ ծրագում էլ աբսուրդ բաներ կան։ Մինչև մեր փաստաթղթերը չտան՝ որևէ մեկը Կոնդ չի մտնի, իրենք թող չշփոթեն, մենք ոչ Հյուսիսային պողոտա ենք, ոչ էլ՝ Ֆիրդուս, մենք՝ կոնդենցիներով համախմբված ենք, եթե դանակը ոսկորին հասավ՝ բոլորս պոնտենցիալ հանցագործ ենք, ամեն մարդ իր տունը կպահի, ընդ որում, եթե յուրաքանչյուր քաղաքացի իր տունը պահեց, երկիրն էլ կպահի»,- նշել է բնակչուհին։
Մեկ այլ բնակիչ էլ պատմեց, որ կոնդի տների մեծամասնությունը հողից ու քարից տներ են ու 1.5 մետրոնց պատեր ունեն։ «Նախկինում, որ չափագրել են՝ չափել են ներսից՝ ներս։ Ըստ օդում պտտվող լուրերի՝ իշխանավորներն արդեն այն ժամանակ մի քանի հազար քառակուսի տարածք են ունեցել, դրա համար էլ իրական չափերից փոքր թվերով են չափագրել։

Մեր տները հին են, ու տրամաբական կլիներ, որ մեր գույքահարկը տարիների ընթացքում նվազեր, բայց հեղափոխությունից առաջ իմ տան գույքահարկը եղել է 27 հազար դրամ, հիմա դարձել է 130 հազար, այս տարի 139 հազար պիտի վճարեմ, իսկ հաջորդ տարի մոտավորապես 400 հազար դրամ, թոշակառու մարդ եմ, 400 հազար ո՞նց վճարեմ։ Ինձ ծանուցում է եղել այն մասին, որ նախկին 470 քառակուսի մետրի փոխարեն նոր չափագրման արդյունքում հիմա 512 քառակուսի մետր է դարձել, նոր վկայականը ստանալու համար ես պետք է վճարեմ 1 մլն 400 հազար դրամ, բայց ես ինչի համար պիտի վճարեմ, բարեխիղճ վճարել եմ հարկերը, ո՞նց եմ հիմա մուծելու, իմ թոշակով էդ էդքան գումար որտեղի՞ց եմ վճարելու»։

Ակցիայի ընթացքում բնակիչներից մի քանիսը բարձրացան քաղաքապետարան՝ քաղաքապետ Տիգրան Ավինյանի հետ հանդիպման ակնկալիքով, բայց պարզվել էր, որ նրանց այնտեղ սպասում էր միայն նամակների բաժնի աշխատակիցը։ Բնակիչները հրաժարվել էին նրան ներկայացնել իրենց պահանջները։

Կոնդեցիները Երևանի ավագանու «Մայր Հայաստան», «Ազգային առաջընթաց», «Հանրապետություն» խմբակցությունների անդամների հետ զրույցում պահանջեցին ավագանու արտահերթ նիստ հրավիրել ու քննարկել իրենց հարցը։
«Հանրապետություն» խմբակցության անդամ Անի Խաչատրյանի՝ Տիգրան Անինյանը հետ հանդիպում կազմակերպելու խոստումից հետո, բանկիչները որոշեցին սպասել մինչև հաջորդ հինգշաբթի, եթե հանդիպումը չկայանա՝ բնակիչները շարունակելու են իրենց պայքարը։

Աղբյուր` Փաստինֆո