Փաստ ինֆո

ՀՀԿ փոխնախագահ Արմեն Աշոտյանը միջնորդություն ներկայացրեց՝ ԵԺԿ կոնգրեսին մասնակցելու համար Բուխարեստ մեկնելու համաձայնություն ստանալու վերաբերյալ։

«Փաստինֆո»-ի հաղորդմամբ՝ պաշտպան Ռուբեն Մելիքյանը հայտնեց, որ Արմեն Աշոտյանն ԵԺԿ-ի կողմից հրավեր է ստացել՝ Բուխարեստում ԵԺԿ համաժողովին մասնակցելու վերաբերյալ, ինչը նոր հանգամանք է՝ Աշոտյանի խափանման միջոցի փոփոխման համար։ ՀՀԿ փոխնախագահ Արմեն Աշոտյանը ևս դիրքորոշում ներկայացրեց՝ նշելով, որ դեռևս նախաքննության փուլում միջազգային կառույցներից իր նկատմամբ հետապնդումը դիտարկվել է որպես մաքուր քաղաքական հետապնդում, քաղաքական գործունեությանը խոչընդոտում։

«Ես խոչընդոտվել եմ այս ընթացքում 3-4 եվրոպական կարևոր հավաքների մասնակցությանը՝ նախաքննության փուլում։ Դատաքննության փուլում առաջին անգամ է, որ միջնորդում ենք, քանի որ ԵԺԿ-ն կարևորագույն կառույց է»,- նշեց Աշոտյանը՝ հավելելով, որ իր մասնակցությունը՝ որպես ՀՀԿ փոխնախագահի, որպես պատվիրակության ղեկավարի՝ հիմնավոր է՝ Հայաստանի արտաքին քաղաքական և անվտանգային բազմաթիվ մարտահրավերների պայմաններում՝ եվրոպական իշխող վերնախավի հետ հարաբերությունների, հայկական կողմի ասելիքը հստակեցնելու, ազգային, պետական շահերը ճիշտ ներկայացնելու հրամայականով։

«Խոստանում եմ՝ ոչ միայն վերադառնալ Հայաստան․ այլև՝ «Նուբարաշեն» ՔԿՀ-ի 10-րդ խուց՝ այնտեղ աշխատելուց, հայկական շահերը ներկայացնելուց հետո, որ Դուք որևէ կասկած չունենաք, որ իմ խափանման միջոցը փոխվի, ինչի համար մի շարք հիմքեր կան։ Ավելին, եթե դրա կարիքը կա, կարող եք սահմանել ազդեցիկ գրավ՝ խնդրեմ»,- նշեց Աշոտյանը՝ հավելելով, որ խոսքը չորս օրվա աշխատանքային այցի մասին է։

Արմեն Աշոտյանն ընդգծեց՝ իր գնալը կարևոր է՝ Արցախի և Հայաստանի համար, հետո՝ կարող են վերադարձնել իրեն իր խուց։ Հանրային մեղադրողն առարկեց միջնորդության դեմ՝ նշելով, թե առանց Աշոտյանի մասնակցությամբ ՀՀԿ-ն կարող է իր մասնակցությունն ապահովել։
«Ինչ վերաբերում է պնդմանը, թե Աշոտյանի մասնակցությամբ է հենց պայմանավորված Հայաստանի՝ անվտանգության, պետականության հետ կապված հարցերը, ապա ՀՀ-ում կան համապատասխան պետական մարմիններ, գերատեսչություններ, որոնք զբաղվում են այդ հարցերով»,- նշեց դատախազը։

Դատարանը հեռացավ առանձին սենյակ՝ որոշում կայացնելու և քիչ անց հրապարակեց որոշում՝ միջնորդությունը մերժելու մասին։

Հիշեցնենք, որ քրեական վարույթի շրջանակներում կալանքի տակ է ՀՀԿ փոխնախագահ Արմեն Աշոտյանը։ Արմեն Աշոտյանի նկատմամբ հնարավոր հետապնդում հարուցելու հարցը լայն տարածում ստացավ հատկապես նախորդ տարվա վերջերին, երբ ԵՊԲՀ նախկին ռեկտոր Միքայել Նարիմանյանի նկատմամբ քրեական հետապնդում հարուցվեց՝ դեռեւս 2015 թ. համալսարանից խոշոր չափերի ենթադրյալ հափշտակության առթիվ հարուցված քրեական գործի շրջանակներում։ Դեռևս այդ ժամանակ մամուլը գրել էր, որ Նարիմանյանին ձերբակալելու հիմնական նպատակն Արմեն Աշոտյանի դեմ ցուցմունք կորզելն էր։ 2022թ. նոյեմբերի 16-ի կեսգիշերին Արմեն Աշոտյանին «Զվարթնոց» օդանավակայանում թույլ չեն տվել մեկնել ՀՀ-ից՝ պատճառաբանելով, թե նա մեղադրյալ է։ Նույն օրը երեկոյան Արմեն Աշոտյանը հրավիրվել է ՀՀ ՔԿ, որտեղ նրան մեղադրանք է առաջադրվել պաշտոնեական լիազորությունները չարաշահելու և փողերի լվացման հատկանիշներով։ Նրա նկատմամբ որպես խափանման միջոց է կիրառվել բացակայելու արգելքը։

Հեղինակ՝ Իզաբել Սահակյան

Աղբյուր` Փաստինֆո