Փաստ ինֆո

Նոյեմբերի 9-ի փաստաթղթում չկա կետ, որ չկա որևէ բան այն մասին, որ միջանցք է անցնելու Հայաստանի տարածքով, և չկա, որևէ բան, որ Ռուսաստանը ՀՀ-ում պետք է որևէ բան վերահսկի։

Այս մասին հայտնել է Նիկոլ Փաշինյանը Մյունխենի և հարակից շրջանների հայ համայնքի ներկայացուցիչների հետ հանդիպման ժամանակ։
«Խոսք է գնում տարածաշրջանային կոմունիկացիանների մասին և դուք գիտեք նաև, որ մեր դիրքորոշումը ամբողջական ներկայացնելու համար մենք ստեղծել և առաջարկել ենք «խաղաղության խաչմերուկ» նախագիծը»,- ասել է Փաշինյանն ու նշել, որ Ադրբեջանի ղեկավարի կողմից օգտագործվող խոսույթն արդեն ազդանշան է, որ կան վտանգներ։

«Ի՞նչպես պետք է դիմակայել այդ վտանգներին։ Առաջին հերթին դա միջազգային հարաբերություններում պետք է կառավարել։ «Խաղաղության խաչմերուկ»-ի ստեղծման պատճառներից մեկը ո՞րն էր, որ Ադրբեջանը փորձում էր տպավորություն ստեղծել, թե մենք չենք ուզում ճանապարհ տանք որևէ մեկին։

Այս ինչ խոսվում է, թե Ռուսաստանը պետք է մեր տարածքում որևէ բան վերահսկի, այդպիսի բան չկա, 9-րդ կետում այդպիսի բան չկա գրած, էլ չեմ ասում, որ եռակողմ հայտարարության այն մնացած կետերը, ըստ էության, Ադրբեջանը և ՌԴ-ն ճղել, գցել են մի կողմ։ Էդ ո՞նց կարա լինի, որ մնացած կետերը չլինեն, էդ մի կետը լինի։

9-րդ կետի վրա հղումը, արդեն էլ արդիական չի, որովհետև և ՌԴ-ն և Ադրբեջանը նախորդ կետերով իրանց պարտավորությունները ամբողջությամբ խախտել են, այսօր ԼՂ-ում հայ չկա»,- ասել է Փաշինյանը։

Աղբյուր` Փաստինֆո