Փաստ ինֆո

Հակակոռուպցիոն դատարանում՝ դատավոր Վարդգես Սարգսյանի նախագահությամբ, այս պահին ընթանում է ՀՀ ոստիկանության նախկին պետ Վլադիմիր Գասպարյանի հարցաքննությունը։

Նշենք, որ մինչ Գասպարյանի հարցաքննությանն անցնելը, վերջինս դիմում էր ներկայացրել դատարան՝ հրաժարվելով ցուցմունք տալուց և պնդել իր նախաքննական ցուցմունքը։ Գասպարյանի պաշտպան Ալեքսանդր Կոչուբաևը, սակայն, պարզաբանեց, թե Գասպարյանը չի ցանկանում տեսախցիկերի առջև իր մասնավոր ծառայողական գաղտնիքին վերաբերելի հարցերով ցուցմունք տալ։ Մասնավորապես, փաստաբանի կարծիքով՝ ցուցմունքները՝ բնակարանների հատկացման մասով, պետական գաղտնիք են պարունակում, իսկ աղջկան պաշտոն տալու ցուցմունքից հրաժարվում է, քանի որ անձի մասնավոր կյանքին են վերաբերում և բացառապես փակ դատական նիստում կարող են քննարկվել։ Գասպարյանը համաձայնություն է տվել ցուցմունք տալու՝ միայն դռնակ ռեժիմով, սակայն նախագահողը հորդորեց՝ «ուլտիմատումով» չխոսել․«Եթե ընդառաջեմ Գասպարյանի խնդրանքին, որ ցուցմունք տա դռնփակ ռեժիմով, հաջորդ դատական նիստին կարող է հետևել Գասպարյանի պահանջը, որ առավել մանրամասն ցուցմունք կարող է տալ, եթե ես նրա վերաբերյալ արդարացնող պահանջ ներկայացնեմ»,- ասաց դատավորը։ Նախագահողը նաև նկատեց, որ պետական գաղտնիք պարունակող տվյալների շուրջ ցուցմունք տալը կարող էր անցկացվել դռնփակ ռեժիմով, իսկ ինչ վերաբերում է դստեր դրվագին, ապա նախագահողը հետաքրքրվեց, թե՝ եթե դա մասնավոր կյանքին է վերաբերում, ապա ինչու է Գասպարյանը ԶԼՄ-ներին մանրամասներ հայտնել՝ նշելով շարժառիթների մասին։

«Եթե ՀՀ 7 տարվա ոստիկանապետը, գնդապետ-գեներալը, 30 տարի պետական կարևոր պաշտոն զբաղեցրած անձը չի կարողանում փոքրամարմին լրագրողների ճնշումներից խուսափել, ոչինչ չեմ կարող ասել»,-ասաց դատավորը՝ շարունակելով նիստը դռնբաց ռեժիմով։
Դատարանում հրապարակվեց Գասպարյանի՝ նախաքննական ցուցմունքները, ինչից հետո Գասպարյանը պատասխանեց հարցերին։ Վլադիմիր Գասպարյանը հայտարարեց, որ իրենից երբեք չեն լսել, որ ասի՝ իր նկատմամբ քաղաքական հետապնդում է, ինքը հարգում է իրավապահ համակարգը և չի կարծում, որ քաղաքական խաղ է իր դեմ։ Նրա խոսքով՝ առաջին իսկ օրից ասել է, որ սա քաղաքական հարց չէ, ինքը չի հավատում, որ իր դեմ պատվերով կանեն գործը։

«Ես այն մարդը չեմ, որ իմ դեմ պատվեր անեն, ես ունեմ կենսագրություն, ես պատվավոր դատախազ եմ, պատվավոր չեկիստ եմ, պատվավոր ՔԿ-ի աշխատակից եմ, այդ համակարգերն իմ հարազատ համակարգերն են»,- հայտարարեց Գասպարյանը։
Պատասխանելով հարցին, թե նա բնակարան է նվիրել մի մարդու, որը եղել է իր դստեր պրոդյուսերը՝ Գասպարյանը նշեց, որ իր երեխան երգչուհի չէ, միայն փոքր ժամանակ է երգել, որ երգչուհի լիներ, այսօր էլ կերգեր, այլ ոչ թե կսովորեր համալսարանում՝ քաղաքագիտություն․ «Հետո էլ պետք չէր գովազդել իրեն պրոդյուսեր լինելու համար, թե չէ ուրիշ ուժեղ պրոդյուսեր չկա իմ երեխայի համար։ Եթե ինձ պետք լիներ պրոդյուսեր՝ ինչ ուզենայի, ում ուզենայի անելու էին»։

Ինչ վերաբերում է ոստիկանությունում ծառայություն անցած իր մյուս դստերը, որը ստացել է փոխգնդապետի կոչում, Գասպարյանը նշեց, որ ինքն է խնդրել Լևոն Երանոսյանին՝ աշխատանքի ընդունել իր աղջկան, հետո՝ դուստրը երեխաներ է ունեցել և այլն, պաշտոնից ազատվելուց հետո է Գասպարյանն իմացել, որ հաճախականությունը չի ապահովել, ասել է՝ կտանեք այդ գումարը կմուծեք։ Ըստ ամբաստանյալի՝ ինքը տեղեկացված չի եղել, որ աղջիկն աշխատանքի չի հաճախել։

«Ես ու Երանոսյանը մարտական ընկերներ ենք, անհարմար է զգացել այդ հարցերը բարձրացնի, ամաչելա, լռելա, չեմ ողջունում դա, բայց չեմ էլ մեղադրում։ Էլ չեմ պատասխանում ձեր հարցերին, արդեն նյարդայնանում եմ»,-հայտարարեց Գասպարյանը։

Հիշեցնենք, որ Վլադիմիր Գասպարյանին մեղադրանք է առաջադրվել այն բանի համար, որ նա 1997-2011 թվականներին զբաղեցնելով ՀՀ պաշտպանության նախարարության զինվորական ոստիկանության /2007 թվականի փետրվարի 3-ից ռազմական ոստիկանության / վարչության պետի, ապա ՀՀ պաշտպանության նախարարի տեղակալի պաշտոնները, կատարել է իրեն վստահված ուրիշի առանձնապես խոշոր չափերով գույքի վատնում տեղյակ լինելով ՀՀ պաշտպանության նախարարության թիվ 20440 զորամասի երեք զինծառայողների կողմից իրենց բուն գործառույթները չկատարելու և զորամաս չհաճախելու մասին, որևէ միջոց չի ձեռնարկել, արդյունքում նշված ժամանակահատվածում վատնման եղանակով պետական միջոցներից հափշտակվել է առանձնապես խոշոր չափի գումար:

Բացի այդ, ըստ մեղադրանքի՝ Գասպարյանը 2011-2018 թվականներին զբաղեցնելով ՀՀ կառավարությանն առընթեր ՀՀ ոստիկանության պետի պաշտոնը, հանդիսանալով մշտապես իշխանության ներկայացուցչի գործառույթներ իրականացնող պաշտոնատար անձ, անձնական այլ շահագրգռվածությունից ելնելով, պաշտոնեական դիրքն օգտագործել է ծառայության շահերի հակառակ` ՀՀ ոստիկանության հաշվեկշռում գտնվող 15.000.000, և 10.000.000 ՀՀ դրամ արժողությամբ անշարժ գույքը սեփականության իրավունքով ապօրինի հատկացրել է բնակարանային պայմանների բարելավման կարիք չունեցող ՀՀ ոստիկանության ծառայողներին, ինչի արդյունքում անզգուշությամբ առաջացել են ծանր հետևանքներ:

Նախաքննական մարմնի գնահատմամբ՝ Գասպարյանը կատարել է իրեն վստահված ուրիշի առանձնապես խոշոր չափերով գույքի վատնում` ՀՀ ոստիկանության հաշվեկշռում գտնվող 10.000.000 ՀՀ դրամ արժողությամբ անշարժ գույքը սեփականության իրավունքով ապօրինի հատկացրել է ՀՀ ոստիկանության ծառայողին:

Լևոն Երանոսյանը մեղադրվում է 2015-2018թթ ընթացքում, պաշտոնեական դիրքն օգտագործելով, այլ անձի հետ հանցակցությամբ իրեն վստահված ուրիշի առանձնապես խոշոր չափերով գույքի վատնում, ինչպես նաև՝ պաշտոնեական կեղծիք կատարելու մեջ։ Վարդան Թունյանը մեղադրվում է Լևոն Երանոսյանին պաշտոնեական դիրքը չարաշահելուն դրդելու մեջ, որը մեղադրանքի համաձայն՝ դրսևորվել է ՀՀ ոստիկանության զորքերից մեկի զորամասի դասակի հրամանատար Վահրամ Ղազարյանին զորամասում աշխատանքի ներկայանալուց ազատելու եղանակով։

Բացի այդ, ըստ մեղադրանքի, Թունյանը, զբաղեցնելով ՀՀ ոստիկանության ներքին աուդիտի վարչության պետ-գլխավոր աուդիտորի պաշտոնը և հանդիսանալով մշտապես իշխանության ներկայացուցչի գործառույթներ իրականացնող պաշտոնատար անձ, անձնական այլ շահագրգռվածությունից ելնելով, պաշտոնեական դիրքն օգտագործել է ծառայության շահերին հակառակ, ինչի արդյունքում առաջացել են ծանր հետևանքներ: Բացի այդ, օգտագործելով պաշտոնեական դիրքը , 2014-2018 թվականների ընթացքում կատարել է իրեն վստահված ուրիշի խոշոր չափերով գույքի յուրացում:

Գուրգեն Գրիգորյանին մեղադրանք է առաջադրվել այն բանի համար, որ նա օժանդակել է պաշտոնատար անձ հանդիսացող ՀՀ ոստիկանության զորքերի հրամանատար, ոստիկանության պետի տեղակալ Լևոն Երանոսյանին` ՀՀ ոստիկանության զորքերի թիվ 1033 զորամասի դասակի հրամանատար Վահրամ Ղազարյանին զորամասում աշխատանքի ներկայանալու պարտականությունից ազատելու եղանակով ծանր հետևանքներ առաջացրած պաշտոնեական լիազորությունները չարաշահելուն:

Հեղինակ՝ Իզաբել Սահակյան

Աղբյուր` Փաստինֆո