Փաստ ինֆո

Մեր բանակը հիմա ավելի վատ վիճակում է, քան 1990-ականներին էր, երբ նոր էր ձևավորվում հայկական բանակը, դա նրանից էր, որ 1990-ականներին ժողովրդի մեջ կար միասնություն, կար պայքարի մոլուցք, եթե մի մարդ հասկանում էր, որ չի կարող կռվել, ամեն բան անում էր՝ ռազմաճակատի համար։

Իհարկե, կային դասալիքներ, նրանք առևտրականներն էին, որոնք հայրենիք չունեն, նրանց հայրենիքը իրենց գրպանն էր, մարդիկ, եղան՝ փախան, բայց այն ժամանակ թասիբ կար, այն ժամանակ մեկը մեկին պահելու, հայրենքի գիտակցությունը կար։ Ի վերջո, մի քիչ էլ սովետական դաստիարակությունը կար։ Ես լավ եմ հիշում, թե այն ժամանակ մեզ համար ինչ էր հայրենիքը, իսկ հիմա հայրենիք են գոռում միայն նրա համար, որ փող ու պաշտոն ստանան։

Այս մասին «Փաստինֆոյի» հետ զրույցում ասաց ԱՏԱՆ ռազմահայրենասիրական կազմակերպության շտաբի պետ Եփրեմ Մարգարյանը։

Արդյոք մեր բանակն այսօր բարեփոխվում է՝ հարցին ի պատասխան Մարգարյանը նկատեց, որ մասսայաբար չպետք է խոսվի այն մասին, ինչ արվում է բանակում, որովհետև դա լրացուցիչ օգնելու է հակառակորդին։

«Բայց այդ համագործակցությունը, որ մենք ունենք բանակի հետ ինձ հիմք է տալիս ասելու, որ բավական բան է արվում։ Բայց մենք պետք է նաև հասկանանք մեր ֆինանսական վիճակը, բայց ամենակարևորն այն է, որ մենք ունենք կադրային պակաս։

Այժմ շատ սպաներ ուսուցանված են հետխորհրդային մեթոդիկայով, իսկ հիմա աշխատանք է տարվում, որպեսզի սպայակազմը, որ հիմա ուսուցանվում է՝ սկսի տիրապետել նոր մեթոդիկայի։ Հիմա շատ բաներ կան, որոնք դուրս է գալիս հետխորհրդային ստանդարտներից, սա, իհարկե, չի կարելի շատ մասսայական ու ցուցադրական անել։ Այն, ինչ նոր է, պետք չէ հանրայնացնել»։

Դիտարկմանը, թե շատերն ասում են, որ բանակի ողնաշարը կոտրված՝ Մարգարյանը պատասխանեց․ «Էն ալկագոլիկները ու նարկոմանները, որոնք միրուքները պահած հանուն մի քանի կոպեկի վազում՝ իրենց գցում են դիրքեր, առանց համապատասխան ուսուցում ստանալու, կրթության ու մակարդակ ունենալու, պետք է փնովեն զինվորին ու բանակին, պիտի բանակին գցեն, որ իրենք բարձրանան, պիտի ցույց տան, որ իրենք լավն են։ Մինչ օրս այն, ինչ պահվել է՝ բանակի շնորհիվ է, ոչ թե աշխարհազորի, նույն 18 տարեական զինվորի շնորհիվ է։

Էսօր բոլորը մեկը մյուսին դավաճան է ասում, բայց նրանք, ովքեր բանակում եղած բարոյահոգեբանական վիճակից են խոսում՝ նրանք ի՞նչ են արել բանակի համար, որ կարողանան բանակից խոսել»։

Նրա կարծիքով՝ այսօր բանակում առկա խնդիրները դպրոցից են գալիս։ «Կրթական մակարդակն է թույլ, զինվոր չեն կարողանում կրթել, երեխան չգիտի ազգային հերոսն ինչ է, դրա համար էլ մեր վիճակն այս է։ Չի կարելի էսօր հույսը դնել 60-70 տարեկան ֆիդայինի վրա։ Թող ներող լինեն տղերքը, բայց փտած գերանից տուն չեն սարքում»։

Դիտարկմանը, թե այսօր շատ է խոսվում այն մասին, որ մեր բանակը պատրասատ չէ նոր դիմակայության՝ նա նշեց, որ 30 տարի Ադրբեջանը լուռ տարավ իր բոլոր նվաստացումները, ու իր ողջ միջոցները ներդրեց ուժեղ բանակ ունենալու համար։ «Ներդրում արեց, ու այսօր 600 արտասահմանյան ուժեղ հրահանգիչներ աշխատում են ադրբեջանական բանակում, իսկ մենք մեր հույսը դրել ենք ֆիդայի տղերքի վրա։

Իսկ ով է ասում չենք կարող հիշեք Սարդարապատը, թուրքական զորքն ինչքան էր, հայկականն ինչքան էր։ Ցեղասպանությունից մազապուրծ եղած ժողովուրդն հակահարված տվեց ու դուրս շպրտեց թուրքին։

Մենք կարող ենք՝ անկախ նրանից, թե ինչ ռեսուրս ունենք, մեզ միայն թասիբ է պետք ունենալ, իսկ մենք մեր մեջ թասիբն ենք սպանել», - եզրափակել է զինվորականը։

Աղբյուր` Փաստինֆո