Փաստ ինֆո

Ես չեմ ուզում անշնորհակալ բախտագուշակությամբ զբաղվել և ասել, թե ինչ են ուզում փոխել գործող սահմանադրության մեջ, եթե չեզոք մասնագիտական կարծիք ասելու լինեմ, ապա այո, Հայաստանը օբյեկտիվորեն կարիք ունի նոր Սահմանադրության, բայց այսօրվա գործող իշխանությունը, թե գաղափարախոսությամբ, թե տեսլականով, թե փաստացի մասնագիտական ունակություններով հազարավոր կիլոմետրերով հետո է, որպեսզի կարողանա որակական բարձր չափանիշներով Սահմանադրություն գրել։ Այս մասին «Փաստինֆոյի» հետ զրույցում ասաց սահմանադրագետ Վարդան Այվազյանը։

Ինչպես արդեն հայտնել ենք՝ ՀՀ վարչապետ Նիկոլ Փաշինյանն այսօր արդարադատության նախարարությունում հայտարարել է, որ պետք է ունենանք նոր Սահմանադրություն, որը Հայաստանի Հանրապետությունն ավելի մրցունակ և կենսունակ է դարձնում աշխարհաքաղաքական նոր պայմաններում:

«Այսինքն, ես կիսում եմ մասնագիտական կարծիքը, որ մենք որակյալ Սահմանադրության կարիք ունենք, բայց նաև համոզված եմ, որակյալ սահմանադրություն սրանք չեն կարողանալու գրել, հետևաբար, եթե ոչ բացասական, ապա ոչ մի դրական հետևանք այդ Սահմանադրությունը չի ունենալու»։

Դիտարկմանը, որ Փաշինյանի նախորդիվ արված հայտարարությունները նկատի ունենանք առ այն, որ հենց մեր Անկախության հռչակագիրն է այսօր մեր անկախության համար գլխավոր սպառնալիքը, ապա հնարավոր է, որ փորձ արվի վերանայել հենց Հռչակագրի վրա կատարված վկայակոչումները՝ նա պատասխանեց, որ այդ հարցն ավելի շատ քաղաքական է, ու որպես իրավաբան՝ իրեն պատիվ չի բերում մեկնաբանել վարչապետի խոսքերը։

«Ես միայն կարող եմ արձանագրել, որ եթե անգամ իրենց ցանկությունները բարի են, ապա իրենց մասնագիտական ունակություններով իրենք ի վիճակի չեն մեզ համար գրել ճիշտ և որակյալ Սահմանադրություն։ Թե հիմա ուզում են նենգափոխեն Սահմանադրությունը, այնպես անեն, որ այն բխի իրենց շահերից և այլն, դա արդեն քաղաքական տիրույթում է։ Երբ արդեն նախագիծը լինի ու այդ մտավախությունները դրանում արտացոլված լինեն՝ մենք այդ փաստը կարող ենք քննարկել ու լուծումներ առաջարկել»,- նշել է Այվազյանը։

Աղբյուր` Փաստինֆո