Փաստ ինֆո

«Թուրքիան փորձում է օգտագործել իր ազդեցությունը Հարավային Կովկասում, և դա նրան հաջողվում է առաջին հերթին Ադրբեջանի հետ առանձնահատուկ հարաբերությունների հաշվին։ Ինչպես նաև Ռուսաստանի դեմ հմուտ մանևրելու հաշվին, և նաև Ռուսաստանի հետ, ինչը կաթվածահար է անում կամ թուլացնում Ռուսաստանի ցանկացած գործողություն՝ ուղղված թուրքական ազդեցության դեմ։ Նշեմ նաև հայկական ղեկավարության թուլությունը, որը չկարողացավ պահպանել երբեմնի դիրքերը։ Վրաստանի հետ սիրախաղ անելու Թուրքիայի փորձերը դեռևս ոչնչով չեն ավարտվել»,- «Փաստինֆո»-ի եթերում հայտարարել է իսրայելցի ռազմաքաղաքական մեկնաբան, իսրայելական «Նատիվ» գաղտնի հատուկ ծառայության նախկին ղեկավար Յակով Քեդմին՝ մեկնաբանելով Հարավային Կովկասում ուժերի դասավորությունը։

Փորձագետը կարծում է, որ Մոսկվայի և Երևանի միջև հարաբերությունների սառեցումը տեղի է ունեցել Նիկոլ Փաշինյանի գործողությունների հաշվին. Նա սկսեց փորձել կարգավորել հարաբերությունները Ֆրանսիայի, ԱՄՆ-ի եւ այլ արեւմտյան երկրների հետ, սակայն օբյեկտիվ իրականությունն այն է, որ տնտեսապես Հայաստանն այլ ելք չունի, քան հույսը դնել Ռուսաստանի եւ ԱՊՀ երկրների հետ հատուկ հարաբերությունների վրա։ Աշխարհում այլևս չկա մեկը, ով կարող է այսօր Հայաստանին քիչ թե շատ նորմալ տնտեսական զարգացում ապահովել, - շարունակում է զրուցակիցը։

Հարցին, թե արդյոք Փաշինյանին կհաջողվի «նստել երկու աթոռի վրա», Յակով Քեդմին պատասխանել է. «դա կախված է նրանից, թե նա կշարունակի իր երկրի համար աղետալի սխալներ թույլ տալ, թե ոչ։ Ես նկատի ունեմ այն, ինչ տեղի ունեցավ վերջին պատերազմում, ինչպես նաև Փաշինյանի հրաժարումը ազգային շահերի մի մասից, որին Հայաստանը միշտ հավատարիմ է եղել։ Եթե նա շարունակի նման սխալներ թույլ տալ, ապա դա կարող է վատ ավարտ ունենալ»:

Խոսելով այն մասին, թե կստորագրվի արդյոք խաղաղության պայմանագիր, և ինչ կտա այն մի իրավիճակում, երբ Ադրբեջանը պահանջում է մշտական զիջումներ, իսկ Հայաստանն անխոնջ համաձայնում է դրանց, փորձագետը նկատեց, որ Արևելքում տեղի է ունենում մի քաղաքականություն, երբ թույլին միշտ ճնշում են։ Ինչ վերաբերում է Պեսկովի հայտարարությանը, թե «կողմերը մոտ են խաղաղության պայմանագրի կնքմանը», ապա այն ինքնին ոչ մի բանի մասին չի խոսում, բացի նրանից, որ խոսակցություններ են եղել։ Իսկ թե ինչ է խոսել Փաշինյանն Ալիևի հետ և ինչի մասին է խոսել Պուտինի հետ, մենք չգիտենք»։

«Ադրբեջանը լրացուցիչ պահանջներ ունի Հայաստանի նկատմամբ և փորձելու է դրանք իրագործել։ Իսկ հետո ամեն ինչ կախված կլինի նրանից, թե որքանով է ներկայիս հայկական իշխանությունը պատրաստ հետագա զիջումների»,- հայտարարել է Յակով Կեդմին։

Լանա Մշեցյան

Աղբյուր` Փաստինֆո