Փաստ ինֆո

Կգա ժամանակը՝ մենք հանգամանորեն կասենք, թե ինչ ենք նկատի ունեցել, երբ ասել ենք, որ Արցախի էջը մեզ համար փակված չէ։ Այս մասին լրագրողների հետ զրույցում ասաց ՀՀ երրորդ նախագահ Սերժ Սարգսյանը։

Անդրադառնալով արցախահայության՝ Արցախ վերադառնալու հարցին՝ նախագահ Սարգսյանն ասաց, որ արցախահայությանը հարցնեն, թե ինչ պայմաններում են պատրաստ վերադառնալու Արցախ․ «Այն, որ վերադարձը ցանկալի է՝ դա միանշանակ է, բայց այնտեղ պետք է լինեն համապատասխան պայմաններ, թե ինչպիսի պայմաններ՝ չեմ կարող ասել, չիմանալով նրանց կարծիքը»։

Ինչ վերաբերում է ԵՄ ղեկավար Շառլ Միշելի հայտարարությանը, թե արցախահայերն Ադրբեջանի սահմանդրությանը պետք է ապավինեն, Սարգսյանն ասաց. «Դա չի կարող լինել երաշխիք, այդպիսի խոսքեր շատ ենք լսել։ Դա ուղղակի զրո երաշխիք է»։

Բացի այդ, Սերժ Սարգսյանը նշեց, որ Սամվել Շահրամանյանի՝ Արցախի Հանրապետությունը լուծարելու մասին հայտարարությունը ոչինչ չի նշանակում, որևէ հայտարարությամբ չի կարող ԼՂՀ-ն լուծարվել։ Անդրադառնալով Արցախի իշխանությունների՝ Հայաստանում գործունեության մասին՝ Սարգսյանը նախ նշեց, որ Արցախի իշխանությունները չեն լուծարվել, ապա ավելացրեց․ «Այս իշխանություններից ամեն ինչ էլ սպասելի է. ի՞նչ է նշանակում՝ լուծարում են, ենթադրենք լուծարում են, իրենք հո հավերժ չե՞ն լինելու: Դա բնականաբար, շատ կախված է նաև այն մարդկանցից, որոնք բռնի տեղափոխվել են Հայաստան: Եթե նրանք ցանկություն չունենան, ապա ոչ մի բան էլ հնարավոր չի լինելու անել»։

Աղբյուր` Փաստինֆո