Փաստ ինֆո

Երևանի ընդհանուր իրավասության քաղաքացիական դատարանի դատավոր Ռուբեն Ներսիսյանի լիազորությունների դադարեցումից հետո ԲԴԽ-ն կարճել է դատավորի վերաբերյալ կարգապահական վարույթը։

Հիշեցնենք, որ դատավորի լիազորությունների դադարեցման մասին հայտնի էր դարձել նոյեմբերի 20-ին։ ԲԴԽ-ն դատավորի լիազորությունների դադարեցման հիմքում մատնանշել էր Ռուբեն Ներսիսյանի դիմումի հիման վրա դատարանի նախագահի ժպ Ավագ Գաբրիելյանի գրությունը, համաձայն որի՝ Ներսիսյանն ունի առողջական խնդիրներ, որոնք անհամատեղելի են զբաղեցրած պաշտոնի հետ։

Սա է «պաշտոնական» վարկածը, մինչդեռ, շրջանառվող տեղեկությունների համաձայն՝ Ներսիսյանի լիազորությունները դադարեցնելու հարցը եղել է Անդրեասյանի օրակարգում, Ներսիսյանն էլ որոշել է «սեփական» կամքով հեռանալ։

Նկատի ունենալով դատավորի լիազորությունների դադարեցման հանգամանքը՝ ԲԴԽ-ն որոշում է կայացրել Ներսիսյանին կարգապահական պատասխանատվության ենթարկելու մասին ՀՀ ԱՆ միջնորդության վերաբերյալ գործը կարճելու մասին։ Որոշման համաձայն՝ ՀՀ արդարադատության նախարարության կողմից կարգապահական վարույթը հարուցելու առիթը եղել է հարուցող մարմնի կողմից իր լիազորություններն իրականացնելիս առերևույթ կարգապահական խախտման հատկանիշներ պարունակող արարքի ինքնուրույն հայտնաբերումը։ Ասել է թե՝ վարույթը նախաձեռնվել է հենց ՀՀ ԱՆ ուսումնասիրությունների հիման վրա։ Ըստ միջնորդության՝ որ Դատավորի կողմից թույլ են տրվել դատավարական իրավունքի նորմերի՝ Քաղաքացիական դատավարության օրենսգրքի 17-րդ հոդվածի 4-րդ, 8-րդ մասերի, 263-րդ հոդվածի 4-5-րդ մասերի, Ընտանեկան օրենսգրքի 128-րդ հոդվածի 1-ին մասի պահանջների խախտումներ, որոնք նաև հանգեցրել են «Հայաստանի Հանրապետության դատական օրենսգիրք» սահմանադրական օրենքի (այսուհետ՝ Օրենսգիրք) 69-րդ հոդվածի 1-ին մասի 1-ին կետով սահմանված՝ դատավորի վարքագծի կանոնների խախտման։

Նշենք, որ արդեն նախկին դատավոր Ռուբեն Ներսիսյանը Մնացականյանի փեսան է, որը պաշտոններ է զբաղեցրել թե նախկին իշխանությունների, թե Նիկոլ Փաշինյանի պաշտոնավարման օրոք։

Հատկանշական է, որ Ներսիսյանի վերաբերյալ եղել են մի քանի կարգապահական վարույթներ․ որոնցից մեկը հարուցվել էր դեռևս 2019թ՝ ԱՆ նախարար Ռուստամ Բադասյանի կողմից, ԲԴԽ-ն բավարարել էր այդ միջնորդությունը՝ հայտարարելով նկատողություն։ Առավել ուշագրավ է, սակայն, այն հանգամանքը, որ դատավորի նկատմամբ կարգապահական վարույթ հարուցելու հարց բարձրացվել է 2015թ․՝ այսօր արդեն ԲԴԽ նախագահի պաշտոնը զբաղեցնող, այն ժամանակ՝ ՄԻՊ Կարեն Անդրեասյանի հաղորդմամբ, որը վերաբերում էր ԶԼՄ-ներից մեկի դեմ 2014թ կայացված վճռին, սակայն Դատավորների ընդհանուր միության էթիկայի և կարգապահական հարցերի հանձնաժողովը 2015թ․նոյեմբերի 2-ին կայացրած որոշմամբ մերժել է ՀՀ մարդու իրավունքների պաշտպանի հաղորդումը` Կենտրոն եւ Նորք-Մարաշ վարչական շրջանների ընդհանուր իրավասության դատավոր Ռուբեն Ներսիսյանի նկատմամբ կարգապահական վարույթ հարուցելու մասին։

Հեղինակ՝ Իզաբել Սահակյան

Աղբյուր` Փաստինֆո