Փաստ ինֆո

Նախ պետք է հասկանանք, թե ինչի համար են առաջարկում ներդնել ինչ-որ համակարգ, դրա արդյունավերությունը և տնտեսական մասը դեռ պետք է քննարկել։ Ես հարց եմ տվել նախարարին, օրինակ բերել, ասել եմ, եթե ես ունեմ 100 լիտր ջուր, տեղադրում եմ իրենց ուզած համակարգը ու 40 տոկոսը ջրի հետ եմ բերում, բայց էլի սկզբնաղբյուրից վերցնում եմ 100 լիտր ջուր, դրա արդյունավետությունը ո՞րն է։

Այս մասին «Փաստինֆոյի» հետ զրույցում ասաց Ձկնաբույծների միության տնօրեն Գոռ Գրիգորյանն՝ ընդգծելով, որ սա նշանակում է, որ որոշ ժամանակ անց 40 լիտր նվազեցնելու են ջրառը։

«Նախարարն այս հարցին չի պատասխանում, ասում է՝ դա կքարկնենք աշխատանքային խմբի մակարդակով, բայց այդ աշխատանքային խումբը չկա։ Իսկ 40 տոկոսով ջրառի կրճատումը կհանգեցնի աշխատատեղերի կրճատման, հարկերի նվազման և բազում այլ խնդիրների»։
Նա նաև նշեց, որ ջրային ավազանի հետ կապված խնդիրներ կան, բայց իրենք դրա լուծումն առաջարկում են։

«Պետք չէ այդ խնդիրը փաթաթել ձկնաբույծի պարանոցին, ու ասել, թե դուք ամենաշատ ջուրօգտագործողն եք, ձեզանից պիտի սկսենք։ Իրենք արդեն իրենց գույքագրման արդյունքներն ունեն, որ թեև այսօր 700 հատ ապօրինի հոր կա, որոնք ուղղակի թափվում է գետերը, այդ ջուրը չի օգտագործվում։ Մենք առաջարկում ենք այդ հորերը կոնսերվացնել, կամ բերել փականային ռեժիմի։ Եթե դա ցանկալի արդյունք չտա՝ նոր քննարկենք ձկնաբուծարաններին տրվող ջուրը փակելու տարբերակը։ Մենք վստահ ենք, որ 700 հորը փակելու դեպքում տնտեսավարողի ջուրը փակելու անհրաժեշտություն չի լինի»։

Աղբյուր` Փաստինֆո